Дәүләт Советы Рәисе Фәрит Мөхәммәтшин бүген видеоэлемтә режимында узган Россия Закон чыгаручылар Советы Президиумы утырышында катнашты. Анда илнең пространстволы үсеше стратегиясен эшләү, югары белем бирү системасын трансформацияләү мәсьәләләре буенча фикер алышынды һәм "Россия Федерациясендә нотариат һәм нотариаль эшчәнлек турында" федераль закон проектының төп тезислары тыңланды. Утырышны Федерация Советы Рәисенең беренче урынбасары Андрей Яцкин һәм Дәүләт Думасы Рәисе урынбасары Ирина Яровая үткәрделәр.

Россия Закон чыгаручылар Советы Президиумы утырышын ачканда, Федерация Советы Рәисенең беренче урынбасары Андрей Яцкин билгеләп үткәнчә, соңгы елларда илнең пространство үсешен билгели торган төп факторлар булып Россия Федерациясе Хөкүмәтенең кризиска каршы гамәлләре тора. "Шул исәптән төбәк үсеше дәүләт сәясәтенең яңа нигезләрен эшләргә кирәк", - диде ул.

Сенатор фикеренчә, яңа документ илнең һәм аның төбәкләренең социаль-икътисадый үсеше фаразларының нигезе булырга тиеш.

Үзенең кереш сүзендә Дәүләт Думасы Рәисе урынбасары Ирина Яровая Россия хезмәт базарының эшче кадрларга ихтыяҗын канәгатьләндерү максатыннан квалификацияле белгечләрне сыйфатлы әзерләү өчен югары белем бирү системасын трансформацияләүнең мөһимлеген билгеләп үтте. "Икътисадны әзерлекле кадрлар белән тәэмин итү бурычларын хәл итү максатында безнең тарафтан югары уку йортларына максатчан җыю турында закон эшләнде, - дип ассызыклады ул. - Башкарма органнарга бу юнәлештә эш бирүчеләр белән активрак хезмәттәшлек итәргә һәм укучыларга максатчан белем бирүнең мөмкинлекләре турында мәгълүмат бирергә кирәк. Белгечләрне максатчан җыю механизмының потенциалы бик зур".

Ирина Яровая а мәгариф турындагы федераль законнарга үзгәрешләрне гамәлгә ашыру мәсьәләләре буенчаКазанд уздырылган киңәшмәне искә төшерде һәм максатчан җыю механизмын эшләү һәм гамәлгә кертү буенча Татарстан тәҗрибәсенә игътибар итәргә чакырды.

2030 елга кадәрге чорга РФ пространстволы үсеш стратегиясен эшләү һәм төбәкләр икътисады өчен квалификацияле кадрлар әзерләүдә яңа алымнар өлешендә югары белем бирү системасын трансформацияләү барышы турындагы мәгълүматны РФ Икътисади үсеш министры Максим Решетников һәм РФ Фән һәм югары белем министры урынбасары Дмитрий Афанасьев тәкъдим иттеләр.

Утырышның көн тәртибендәге мәсьәләләр буенча фикер алышуда Федерация Советының һәм Дәүләт Думасының профильле комитетлары, федераль министрлыклар һәм ведомстволар вәкилләре катнашты.

РФ Закон чыгаручылар Советы Президиумы шулай ук "Россия Федерациясендә нотариат һәм нотариаль эшчәнлек турында" Федераль закон проектын әзерләү турындагы мәгълүматны тыңлады, аны РФ юстиция министры Константин Чуйченко тәкъдим итте.