Бүген Дәүләт Советында Мәгариф, мәдәният, фән һәм милли мәсьәләләр комитеты һәм комитет каршындагы Эксперт советының уртак утырышы булды, анда депутатларга Татарстан Министрлар Кабинетының 2025 елдагы эше турында хисап тәкъдим иттеләр. Комитет рәисе Айрат Зарипов үткәргән утырышта ТР Дәүләт Советы Рәисе вазыйфаларын башкаручы Марат Әхмәтов, тармак министрлыклары һәм ведомстволары вәкилләре катнашты.

Комитет утырышында хөкүмәт эше турындагы хисапны республиканың мәгариф һәм фән министры урынбасары Рамил Хәйруллин һәм Татарстан мәдәният министры урынбасары Ленар Хәкимҗанов тәкъдим итте.

Республика технологик лидерлык буенча илкүләм проектларны, «Яшьләр һәм балалар», «Гаилә», «Кадрлар» яңа илкүләм проектларны гамәлгә ашыруда катнаша, аларның чаралары Россиянең «Мәгарифне үстерү», «Россия Федерациясенең фәнни-технологик үсеше» дәүләт программаларына кертелгән.  «2025 елда федераль бюджеттан республика мәгариф системасына 15 млрд сумнан артык акча җәлеп ителде, республика бюджетыннан финанслашу 2,5 млрд сум тәшкил итте», – дип белдерде республиканың мәгариф һәм фән министры урынбасары Рамил Хәйруллин.

Татарстанда 1894 мәктәпкәчә белем бирү учреждениесе һәм 1390 гомуми белем бирү оешмасы эшли.

Республиканың мәгариф системасында 77 меңгә якын педагог эшли, шул исәптән 32 меңнән артык укытучы һәм 14 меңнән артык тәрбияче. Яшь белгечләрне җәлеп итү һәм беркетү максатларында мәгариф хезмәткәрләренә ярдәм итүнең берничә чарасы гамәлгә ашырыла: ай саен өстәмә түләүләр һәм түләүләр, индивидуаль торак төзелеше өчен җир кишәрлеген түләүсез файдалануга бирү һәм грант программалары.

2025/26 уку елында 45 югары белем бирү учреждениесе эшчәнлек алып бара. Аларда 155 025 студент белем ала, шуларның 20 меңнән артыгы – 14 якын һәм 104 ерак чит ил гражданнары.

2025 елда Татарстан Республикасында 10 яңа мәгариф объекты файдалануга тапшырылган, шулардан – 980 урынга исәпләнгән 5 мәктәпкәчә учреждение (Питрәч, Лаеш, Биектау районнарында һәм Казан шәһәрендә) һәм 4 меңнән артык урынга исәпләнгән 5 гомуми белем бирү учреждениесе (Казан, Яр Чаллы, шулай ук Лаеш, Тукай, Кукмара районнарында). Узган елда тагын 256 мәгариф объектында ремонт эшләре башкарылган.

Мәгариф һәм фән министрлыгы эшенең мөһим юнәлешләреннән берсе – туган телне саклау һәм үстерү өчен шартлар тудыру. «Җәйге каникуллар чорында илебезнең 30 субъектыннан олимпиада, конкурс призерлары, җиңүчеләре катнашында татар телендә сөйләм практикасы белән 9 профильле смена оештырылды. Соңгы 3 елда балаларның туган телләрен өйрәнү, туган телдә укыту һәм тәрбияләү күрсәткечләре тотрыклы булып кала», – дип белдерде Рамил Хәйруллин.

 «Физика-математик алга китеш» проектын гамәлгә ашыру дәвам итә. Проект эшләгән ике ел эчендә 40 физика-математика сыйныфы, 3300дән артык укучыны үз эченә алган 170 математика һәм 30 геометрия түгәрәге оештырылган, 3000гә якын укучы һәм 356 педагог катнашында 6 фестиваль үткәрелгән, 5-9 сыйныф укытучылары өчен LMS-система эшләнгән. 

2025 елгы бердәм дәүләт имтиханы нәтиҗәләре буенча Татарстанда 313 – 100 баллык нәтиҗә, шуларның 13е ике фәннән 200 балл җыйган. Математика, рус теле һәм сайлап алынган фәннәр буенча БДИ нәтиҗәләре республикада Россиядәге уртача күрсәткечләрдән югарырак.

Мәдәният өлкәсендә дәүләт сәясәте 2030 елга кадәр Татарстан мәдәниятен үстерү стратегиясе нигезендә гамәлгә ашырыла, дип сөйләде республика мәдәният министры урынбасары Ленар Хәкимҗанов.  Татарстанда барлыгы 3749 мәдәният учреждениесе эшли.

«Гаилә кыйммәтләре һәм мәдәният инфраструктурасы» Федераль проекты кысаларында Татарстан Республикасында 2025 елда гомуми суммасы 371 млн сумлык 10 чара гамәлгә ашырылды»,  – дип сөйләде Ленар Хәкимҗанов.

2025 елда Мәдәният министрлыгы тарафыннан текст авторлары, композиторлар һәм җыр башкаручылар, СВОда катнашучылар,  һәм республикада яшәүче сугышчан хәрәкәтләр ветераннары арасында беренче республика патриотик җыр конкурсы уздырылган. Гала-концерт һәм җиңүчеләрне бүләкләү 2025 елның 12 июнендә Россия көнен бәйрәм итү кысаларында оештырылган.

Музей фондлары күләме буенча Татарстан Идел буе федераль округында беренче урында тора. Республиканың музей челтәре, структур бүлекчәләрне дә кертеп, 182 дәүләт һәм муниципаль челтәр берәмлеген үз эченә ала, шулардан 13 дәүләт һәм 50 муниципаль музей һәм аларның филиаллары.

Фикер алышуга йомгак ясап, Дәүләт Советы Рәисе вазыйфаларын башкаручы Марат Әхмәтов ике көн дәвамында барлык профильле комитетлар утырышларында Министрлар Кабинеты хисабы каралуын билгеләп узды. «Без тулаем Хөкүмәтнең эшеннән канәгать, чөнки, дөньяда катлаулы вәзгыятькә карамастан, республика елны шактый уңышлы тәмамлады: 5,7 трлн тулай төбәк продукты, 1,6 трлн сум инвестицияләр. Быел да өч ай нәтиҗәләре буенча республика икътисады уңай динамика күрсәтә. Без караган мәсьәләләрнең бер өлеше – Хөкүмәт һәм Татарстан Рәисенең масштаблы эшенең бик аз өлеше генә», – дип басым ясады  Марат Әхмәтов.