Җиденче чакырылыш Дәүләт Советына депутатлар сайлау кампаниясе оешкан төстә узды. Бу хакта бүген видеоэлемтә режимында узган «Бердәм Россия» партиясенең Югары советы Бюросы һәм Генераль советы Президиумының уртак утырышында Дәүләт Советы Рәисе, «Бердәм Россия» партиясенең төбәк бүлеге Секретаре Фәрит Мөхәммәтшин белдерде.

"Партиягә зур ышаныч күрсәтелде. Республика парламентына сайланган  100 депутатның 86сы «Бердәм Россия»дән сайлануы – бик зур җаваплылык. Халык яңа сайланган депутатлар актив булыр, гомумреспублика бурычларын хәл итү буенча эшләрләр дип ышана һәм өметләнә», – дип билгеләп үтте Фәрит Мөхәммәтшин журналистлар белән аралашканда.

Парламент башлыгы якындагы көннәрдә хәл ителәчәк беренче чираттагы бурычлар турында искәртте – бу парламент фракцияләрен, профильле комитетлар һәм комиссияләр, Дәүләт Советы Президиумын формалаштыру буенча оештыру эшләре. "Татарстанлылар үз кандидатлары өчен тавыш бирде, безне сайлау кампаниясе барышында алынган наказларны үтәү буенча да зур эш көтә. Иң мөһиме – республикабызның үсеш темпларын саклап калу һәм үстерү», – дип басым ясады Фәрит Мөхәммәтшин, сайлаучыларга ышанычлары өчен рәхмәт белдереп.

Генераль совет Президиумы һәм Югары Совет бюросының уртак утырышында сайлауларның беренчел нәтиҗәләре ясалды. «Бердәм Россия» партиясе 35 мең мандатка 36 меңнән артык кандидат тәкъдим итте һәм барлык төбәкләрдә дә ышанычлы җиңү яулады, илнең алдынгы сәяси көче статусын тагын бер тапкыр исбатлады, дип билгеләп үтте «Бердәм Россия» Югары Советы Рәисе Борис Грызлов. «Бу кампаниянең төп нәтиҗәсе дип мин моңарчы күрелмәгән яңарту дәрәҗәсен саныйм. Партиядән җиңүчеләрнең 80% тан артыгы – яңа кешеләр. Без кадрлар ротациясенең партия өчен никадәр мөһим булуын бик яхшы аңлыйбыз», – диде ул.

Закон чыгару җыелышларына сайлаулар 13 төбәктә узган. Ил буенча «Бердәм Россия»нең уртача нәтиҗәсе – 64,6%. Татарстан сайлауга килү күрсәткечләре буенча лидерлар өчлегендә аталды. ТР Үзәк сайлау комиссиясе мәгълүматлары буенча, тавыш бирүнең беренчел нәтиҗәләре буенча беркетмәләрнең 100 % работ эшкәрткәннән соң, бердәм республика сайлау округы буенча «Бердәм Россия» Бөтенроссия сәяси партиясе 76,75% җыйган.