Бүген Татарстан Республикасы Дәүләт Советы Рәисе Фәрит Мөхәммәтшин Башкортстан Республикасы Дәүләт Җыелышы – Корылтае Рәисе Константин Толкачев белән очрашты. Очрашу Фәрит Мөхәммәтшинның Уфага эш сәфәре кысаларында Башкортстан парламентында узды.

Төбәк закон җыеннары җитәкчеләре парламентара диалогны киңәйтү мәсьәләләре турында фикер алыштылар, шулай ук законнар үсешенә һәм төрле дәрәҗәләрдә хезмәттәшлекне ныгытуга бәйле мәсьәләләргә кагылдылар. Искәртәбез, Татарстан һәм Башкортстан парламентарийларын күптәннән хезмәттәшлек һәм уртак закон чыгару традицияләре бәйли. Республикаларның закон чыгару органнары арасында парламентара хезмәттәшлекнең барлык өлкәләрен җайга сала торган берничә килешү һәм беркетмә төзелгән.

Константин Толкачев республикалар алдында торган актуаль бурычларны хәл итү өчен Татарстан һәм Башкортстан парламентарийларының уртак эшенең мөһимлегенә басым ясады. "Безнең төбәкләрнең бай тарихы һәм мәдәни элемтәләре бар, без аларны сакларга һәм үстерергә омтылабыз. Закон чыгару инициативалары буенча уртак эш безгә гражданнарыбыз өчен нәтиҗәле чишелешләр табарга мөмкинлек бирә, – дип билгеләде ул. – Бүген хезмәттәшлекнең гамәлдәге механизмнарын саклап калу гына түгел, ә заманча мәсьәләләрне хәл итү өчен яңа ысуллар булдыру да мөһим. Без законнар үсешендә зур потенциал күрәбез, ул безнең төбәкләрнең икътисадын, социаль өлкәсен һәм экологиясен ныгытуга ярдәм итәчәк”.

Очрашуда катнашучылар Татарстан Республикасы Дәүләт Советы һәм Башкортостан Республикасы Дәүләт Җыелышы – Корылтае арасында имзаланган парламентара хезмәттәшлек турындагы килешү нигезләмәләрен гамәлгә ашыруга аерым игътибар бирделәр. Документ Закон чыгару эшчәнлеге мәсьәләләре буенча гамәлләрне координацияләүне, законнар әзерләүдә һәм кабул итүдә тәҗрибә уртаклашуны, шулай ук халык арасында парламент эшчәнлеген популярлаштыру өчен уртак чаралар уздыруны күздә тота. Парламентарийлар килешүне гамәлгә ашыру буенча актив эшне дәвам итәргә һәм уртак эшчәнлекнең яңа юнәлешләрен үстерергә әзер булуларын расладылар.