Татарстан шефлыкка алган Лисичанск һәм Рубежное шәһәрләренә (ЛХР) «Бердәм Россия» партиясенең төбәк бүлеге, Дәүләт Советы депутатлары һәм парламент аппараты инициативасы буенча җыелган, гомуми авырлыгы 100 тоннага якын булган чираттагы гуманитар йөк килеп җитте. Гуманитар колоннаны Дәүләт Советы депутатлары Азат Җиһаншин һәм Ринат Фазылов, Теләче һәм Чирмешән районнары башлыклары Айрат Фәтхуллин һәм Рамил Айбатов, партиянең төбәк башкарма комитеты җитәкчесе Марат Сәмигуллин озатып барды.

Яңа төбәкләр белән эшләүче ТР вице-премьеры Фәнил Әһлиуллин белән бергә алар Рубежное гуманитар үзәгендә булдылар, анда вакытлыча шәһәр башлыгы вазыйфаларын башкаручы ЛХР Герое Евгений Шаталин белән очраштылар. Татарстанның гуманитар эшчәнлегенең төп мәсьәләләре, хезмәттәшлекнең перспектив юнәлешләре турында фикер алыштылар. Инфраструктураны, мәгариф учреждениеләрен һәм спорт объектларын торгызу мәсьәләләренә аерым игътибар бирелде.

Дәүләт Советы депутаты, "Татагролизинг" АҖ генераль директоры Азат Җиһаншин мондый эшнең актуальлеген ассызыклады.  "Шәхсән минем өчен бу сәфәр бик мөһим, – диде Азат Җиһаншин. – Монда мин тиз арада хәл итүне таләп итә торган катлаулы вәзгыятьне күрдем. Гуманитар миссия белән килгәндә без, һичшиксез, кешеләр белән очрашабыз, җирле халык белән сөйләшәбез, киләчәктә һәрьяклап ярдәм күрсәтү өчен аларның проблемалары турында белешәбез”.

Сәфәр барышында Татарстан делегациясе шулай ук Рубежноедагы 2 нче мәктәптә булды, анда ремонт-торгызу эшләренең икенче этабы турында фикер алыштылар. Хәзерге вакытта мәктәпкә җылылык бирелгән, уку сыйныфлары эшли, ә педагоглар белем бирү процессын дәвам итәләр.

"Бүген миңа имтиханнарга әзерләнүче 11 сыйныф укучылары белән аралашырга туры килде. Без аларны Татарстанга чакырдык, үзебезнең югары уку йортларында һәм урта махсус уку йортларында укуларын дәвам итәргә, һөнәр алырга һәм алга таба туган җирләренә кайтып яисә Татарстанда калып республика һәм бөтен ил файдасына эшләргә тәкъдим иттек», — диде Азат Җиһаншин. 

Азат Җиһаншин хезмәттәшләренә гуманитар миссиядә актив катнашулары өчен аерым рәхмәт белдерде: «Мин Фәнил Әһлиуллинга һәм Марат Сәмигуллинга гуманитар йөкләрне озатып барулары, игътибарлары булулары һәм даими ярдәмнәре өчен рәхмәт белдерәсем килә. Алар еш кына алгы сызыкка чыгалар, безнең сугышчылар белән очрашалар, аларның ихтыяҗлары турында белешәләр һәм аларның сорауларын хәл итәргә тырышалар. Гуманитар ярдәм кысаларында алар һәрвакыт диярлек иң кирәкле әйберләрне алып баралар, шул исәптән фронт сызыгына да”.

Депутат, махсус хәрби операция зонасында үз бурычларын үтәүче татарстанлылар белән очрашканнан соң, Татарстанга кайткач һичшиксез аларның гаиләләре белән очрашачакларын, фронттан сәламнәр тапшырачакларын һәм гаиләләргә һәрьяклап ярдәм күрсәтәчәкләрен әйтте.

"Киләчәктә дә бу эшне дәвам итәрбез дип ышанам, – диде Азат Җиһаншин. – Без Җиңү безнең якта булачагына шикләнмибез".