Бүген Дәүләт Советы каршындагы Яшьләр парламенты, Татарстанның  пилотсыз һава суднолары узышлары федерациясе һәм «Патриот» яшьләрне хәрби хезмәткә әзерләү республика үзәге арасында хезмәттәшлек турында өч яклы килешү имзаланды. Документка Дәүләт Советы каршындагы Яшьләр парламенты рәисе Дамир Нургалиев, ТР дроннар узышы Федерациясе Президенты Рәсүл Миңнеханов һәм "Патриот" республика спорт-патриотик һәм хәрби хезмәткә әзерлек үзәге директоры Дмитрий Литвинов кул куйдылар.

Дроннар узышы Федерациясе һәм "Патриот" үзәге эшчәнлеге белән без беренче көн генә таныш түгел, күп кенә чараларны һәм проектларны иңгә - иң куеп гамәлгә ашырабыз, - дип ассызыклады Дамир Нургалиев, - бүген имзаланган өч яклы килешү аларның санын берничә тапкырга арттырырга мөмкинлек бирәчәк". Дамир Нургалиев билгеләп үткәнчә, яшьләр парламенты пилотсыз һава суднолары узышлары Федерациясе һәм патриотик тәрбия үзәге арасында хезмәттәшлекне ныгыту идеясе белән чыкты. Аның әйтүенчә, килешү киләчәктә хезмәттәшлек өчен нигез булачак, аерым алганда, «Патриот» үзәге дроннар узышлары федерациясенең яшь пилотларына алар базасында күнегүләр ясау мөмкинлеге бирергә әзер.

«Бүгенге көндә республика территориясендә үсеп килүче буынны һәрьяклап үстерү өчен барлык кирәкле шартлар булдырылган, - дип ассызыклады Татарстан Республикасы дроннар (пилотсыз һава суднолары) узышлары федерациясе президенты Рәсүл Миңнеханов. - Дроннар узышы Федерациясе командасы Бөтенроссия ярышларында җиңеп чыкты. Егетләрнең алдагы җиңүләренә өметләнәбез. Без үз чиратыбызда, куелган барлык максатларны тормышка ашыру өчен бөтен көчебезне куячакбыз".

Бер ай элек ТР Дәүләт Советы каршындагы Яшьләр парламенты һәм «Татарстан Республикасы пилотсыз һава суднолары узышлары федерациясе» төбәк физкультура-спорт иҗтимагый оешмасы арасында хезмәттәшлек турында килешү имзаланган иде. Очрашу вакытында спортчыларга күнегүләр өчен мәйданчык бирү мәсьәләсе куелган иде.

«Патриот» үзәге директоры Дмитрий Литвинов билгеләп үткәнчә, Татарстанда гадәттәгечә патриотик тәрбия һәм хәрби хезмәткә әзерлек мәсьәләләренә зур игътибар бирелә. Бу юнәлештә Татарстан күп төбәкләр өчен үрнәк булып тора. Россиядә беренче хәрби-патриотик тәрбия үзәге Татарстанда 2007 елда ачыла.

 «Бездә ел саен өч меңгә якын укучы хәрби хезмәткә әзерлек буенча җыеннар уза, - дип сөйләде Дмитрий Литвинов. - Биш көнлек җыеннар вакытында балалар, тактик медицинаны да кертеп, беренчел белемнәр алалар. Шунысы мөһим, хәзер без дроннар узышы Федерациясе белән хезмәттәшлек итә башладык, бу безгә яшьләрне бу юнәлештә дә комплекслы әзерләү мөмкинлеге бирәчәк».

Бүген үк Дәүләт Советында яшь парламентарийларның Җиңү юбилеена багышланган чараларда катнашу мәсьәләләре күтәрелде. Аерым алганда, Дамир Нургалиев хәзер яшьләр парламенты «Патриот» үзәге белән берлектә бөек Ватан сугышында Җиңүнең 80 еллыгына чираттагы иҗади конкурс әзерләве турында сөйләде. Яшь парламентарийлар мәктәп укучыларыннан алып Урта һөнәри уку йортлары студентларына кадәр, яшьләрне мөмкин кадәр күбрәк җәлеп итәргә планлаштыралар.