Дәүләт Советы Рәисе, «Бердәм Россия» партиясенең Татарстан төбәк бүлеге Секретаре Фәрит Мөхәммәтшин Дмитрий Медведевның төбәк иҗтимагый кабул итү бүлмәсендә гражданнарны кабул итте.

Парламент башлыгына техник фәннәр докторы, А.Н. Туполев исемендәге Казан милли тикшеренү техник университеты (КНИТУ-КАИ) профессоры Владимир Костин мөрәҗәгать итте. Ул эчке су транспорты судноларының берсенә әтисенең исемен биреп, аның истәлеген мәңгеләштерүдә ярдәм итүне сорый.

Профессорның әтисе Алексей Михайлович Костин бөтен гомерен елгачылыкка багышлаган. 1951 елда Горький су транспорты инженерлары институтын тәмамлаган Алексей Михайлович участок башлыгы, Горький елга портында баш диспетчер булып эшли, аннары пассажирлар ташу хезмәте башлыгы урынбасары, Идел елгасының берләштерелгән пароходчылыгы  идарәсенең портлар хезмәте башлыгы була. Алексей Михайлович 20 елдан артык Казан елга портын җитәкли. Алексей Михайлович Бөек Ватан сугышында катнашкан, 1 нче дәрәҗә Ватан сугышы ордены, Кызыл Йолдыз ордены, медальләр белән бүләкләнгән.

Фәрит Мөхәммәтшин мөрәҗәгать итүчене игътибар белән тыңлады, мәсьәләне өйрәнергә, профильле министрлыкларга һәм ведомстволарга тиешле мөрәҗәгатьләр юлларга вәгъдә итте.

Татарстанның атказанган укытучысы, пенсионер Сәидә Әхмәрова да Фәрит Мөхәммәтшинга шундый ук сорау белән мөрәҗәгать итте. Хезмәт ветераны елга пароходчылыгы судноларының берсенә тормыш иптәше, атказанган хезмәткәр Рәшит Әхмәров исемен бирүдә ярдәм итүен сорый.  Рәшит Хәмзә улы Әхмәров «Татфлот» суднолар йөрү компаниясен җитәкләгән.

Тагын бер мөрәҗәгать Казанда яшәүче Илсөяр Низамовадан килгән. Ул махсус хәрби операциядә катнашучылар өчен тернәкләндерү үзәген төзүдә ярдәм күрсәтүне сорый. Кабул итүдә Илсөяр Низамова проектны оештыру һәм финанслау буенча үз тәкъдимнәрен җентекләп бәян итте, булачак проектны күрсәтте. Планда – Казанның Мамадыш трактында дүрт катлы үзәк төзү, әмма хәзерге вакытта проектны алга таба гамәлгә ашыру өчен җир кишәрлеге алу мәсьәләсе хәл ителмәгән. «Гади генә мәсьәлә түгел, әмма инициатива яхшы һәм игелекле, Әгәр планнарны тормышка ашырып булса, бу бөтен республика өчен социаль әһәмияткә ия проект булачак», – диде Фәрит Мөхәммәтшин.