Бүген Дәүләт Советында Торак сәясәте һәм инфраструктура үсеше комитеты утырышы узды, анда парламентарийлар территорияләрне комплекслы үстерү, шул исәптән социаль инфраструктура мәсьәләләре буенча фикер алыштылар. Моннан тыш, утырышта торак-коммуналь хуҗалык һәм юл эшчәнлеге өлкәсендә республика законнарына үзгәрешләр кертү турында закон проектлары каралды. Торак сәясәте һәм инфраструктура үсеше комитеты рәисе Андрей Егоров үткәргән утырышта ТР Транспорт һәм юл хуҗалыгы министры Фәрит Хәнифов катнашты.

Утырышта төп доклад белән «Татарстан Республикасы пространстволы планлаштыру институты» дәүләт бюджет учреждениесе директоры Олег Григорьев чыгыш ясады. 

Аның әйтүенчә, Казан янында социаль инфраструктураның җитешсезлеге күзәтелә. Мисал итеп Олег Григорьев Казан белән бердәнбер юл тоташтырган Көек бистәсен китерде. «Иртәнге бөкеләрдә сәгать ярым торалар, бу бистә халкы өчен зур проблемага әйләнә, - дип ассызыклады пространстволы планлаштыру институты җитәкчесе. - Социаль һәм инфраструктура объектларын параллель үстерү мәсьәләсе халык өчен дә, төзүчеләр өчен дә актуаль. Төзелеш министрлыгында социаль объектлардан башка торак төзүне булдырмау турында сөйлиләр. Нәкъ менә шуңа күрә Казан агломерациясендә хәзер транспорт инфраструктурасы булган урыннарда да мәйданчыклар "туктап тора". “Зур Яшел Үзән " территориясен күздә тотам. Бу территориядә социаль объектлар булмау аркасында кайбер объектларга старт бирелми, чөнки балалар бакчалары һәм мәктәпләр төзү буенча аңлау юк».

Олег Григорьев билгеләп үткәнчә, Татарстанда территорияләрне комплекслы үстерү программасы гамәлдә, әмма бу инструмент зур үсеш алмаган. «Республикада территорияләрне комплекслы үстерү механизмы нигездә торак булмаган төзелешләргә генә кулланыла, - дип басым ясады Олег Григорьев. - Торак объектларны ТКҮ режимында төзү тәҗрибәсе әлегә юк. Аны эшләргә кирәк. Мондый форманы Мәскәүдә, Мәскәү астында, Санкт-Петербургта актив кулланалар. Бу шәһәрләрдә мондый форма үзен бик нәтиҗәле күрсәтте».

Пространствоны планлаштыру институты директоры шулай ук территорияләрне параллель үстерүнең башка механизмнары турында сөйләде. Мәсәлән, Мәскәүдә актив кулланыла торган инфраструктура килешүләре, шулай ук Мәскәү, Санкт-Петербург, Пермь һәм башка шәһәрләрдә кертелгән инфраструктура җыемнары. «Бу төзүчеләр муниципалитетларга яңа инфраструктура булдыруны финанслау өчен түли торган түләү. Инвестор инфраструктура килешүе төзи, аның буенча инфраструктура һәм социаль объектлар үсешенә үз теләге белән билгеле бер сумманы күчерә», - дип ассызыклады Олег Григорьев.

Бүгенге комитет утырышында республика территориясендә автомобиль юллары һәм юл эшчәнлеге турындагы республика законына үзгәрешләр кертү турындагы закон проекты каралды. Закон проекты республика законнарын федераль законнарга туры китерү максатыннан эшләнгән.

Элемтә операторларының һәм автомобиль юллары хуҗаларының үзара хезмәттәшлеген оптимальләштерү максатларында, шулай ук автомобиль юлларында элемтә инфраструктурасын үстерүне тизләтү, элемтә булу  зоналарын арттыру һәм, нәтиҗәдә, юлларда элемтә хезмәтләре күрсәтүнең сыйфатын яхшырту өчен бүленгән полосалар һәм юл буе полосалары чикләрендә элемтә линияләрен һәм элемтә корылмаларын урнаштыруны һәм эксплуатацияләүне хокукый җайга салуның аерым мәсьәләләрен төгәлләштерүгә юнәлдерелгән үзгәрешләр кертелә.

Моннан тыш, закон проекты, автомобиль юллары һәм юл эшчәнлеге турындагы законнарда билгеләнгән үзенчәлекләрне исәпкә алып, шәһәр төзелеше эшчәнлеге турындагы законнар нигезендә элемтә линияләрен һәм элемтә корылмаларын төзү һәм капиталь ремонтлау, аларны автомобиль юлларының бүленгән полосалары һәм юл буе полосалары чикләрендә файдалану мөмкинлеген билгели.

Шулай ук автомобиль юлларына бүленгән полосалар чикләрендәге җир кишәрлекләреннән элемтә линияләрен һәм элемтә корылмаларын гавами сервитут шартларында урнаштыру максатларында файдалану мөмкинлеге дә карала.