Казанда Ватан Геройлары көненә багышланган тантаналы чаралар уза. Илебездә 9 декабрьдә билгеләп үтелә торган истәлекле дата 2007 елда РФ ФС Дәүләт Думасы карары белән билгеләнде. Бүген Галиәсгар Камал исемендәге Татар дәүләт академия театрында Россия Геройларын, Социалистик Хезмәт Геройларын һәм Россия Хезмәт Геройларын, Хезмәт Даны орденының тулы кавалерларын, шулай ук аларның гаилә әгъзаларын хөрмәтләделәр. Республика Рәисе, парламент депутатлары, Татарстан Хөкүмәте исеменнән тантаналы чарада катнашучыларны Ватан Геройлары көне белән Дәүләт Советы Рәисе Фәрит Мөхәммәтшин котлады. Бәйрәм тантанасында ТР Дәүләт Киңәшчесе, РФ Хезмәт Герое Минтимер Шәймиев катнашты.

Фәрит Мөхәммәтшин быел бәйрәмнең федераль һәм республика дәрәҗәсендә игълан ителгән Ватанны саклаучылар елында һәм Җиңүнең 80 еллыгында үткәрелүен искәртте. «Бу истәлекле дата безгә Ватан өчен батырлык һәм кыюлыкның мәңгелек кыйммәтләрен, буыннар бәйләнешен  искә төшерә, – дип басым ясады Фәрит Мөхәммәтшин. – 2007 елдан башлап 9 декабрь дәүләт дәрәҗәсендә Россия Геройларын, Хезмәт Геройларын, Советлар Союзы, Социалистик Хезмәт Геройларын, Сугышчан Дан Орденының һәм Хезмәт Даны Орденының тулы кавалерларын искә алу һәм хөрмәтләү көне итеп билгеләнде. Татарстанда бу мактаулы исемлеккә барлыгы 439 Ватан Герое исеме кертелгән».

Хәзерге вакытта Татарстанда 16 Россия Герое, 8 Социалистик Хезмәт Герое, 3 Хезмәт Даны орденының тулы кавалеры, 2 Хезмәт Герое яши.

Фәрит Мөхәммәтшин Татарстанның үсешенең нигез ташы салган ветераннарның, шулай ук махсус хәрби операциядә катнашучыларның өлешләрен аерым билгеләп үтте. «Сезнең ныклык – барлык буыннар өчен үрнәк, – дип билгеләп үтте парламент җитәкчесе. – Ватанга тугры һәм фидакарь хезмәт итү традицияләрен дәвам итеп, бүген дә батырлык һәм намуслылык үрнәге булган кешеләр алдында баш иябез. Сүз махсус хәрби операциядә катнашучылар турында».

Фәрит Мөхәммәтшин сүзен йомгаклап, киләсе ел Татарстанда Хәрби һәм хезмәт батырлыгы елы дип игълан ителүен искәртте. «Бу изге традицияләрнең турыдан-туры дәвамы булыр, Ватанга фидакарь хезмәт итүнең какшамаслыгын кабат ассызыклар дип ышанам», – дип басым ясады парламент җитәкчесе һәм геройларга һәм ветераннарга нык сәламәтлек, күңел җылысы һәм якыннарының кайгыртуын теләде.

Россия Федерациясе Президентының Идел буе федераль округындагы Тулы вәкаләтле вәкиле Игорь Комаров исеменнән бәйрәм тантанасында катнашучыларны Татарстан Республикасы буенча баш федераль инспектор Виктор Демидов котлады. «Бу – Ватаныбызның батыр, көчле патриотлары бәйрәме, без аларга чиксез рәхмәтле, – диде Виктор Демидов. – Без Ватаныбыз Геройларына чын күңелдән ихтирам белән дә карыйбыз. Яраткан күпмилләтле Ватаныбызга тугры һәм риясыз хезмәт итүегез өчен сезгә зур рәхмәт».

Бүген шулай ук Бөек Җиңүнең 80 еллыгы уңаеннан «Җиңү» («Победа») Россия оештыру комитетының истәлекле медальләре тапшырылды. Бүләкләргә Татарстан Республикасында «ЮНАРМИЯ» бөтенроссия балалар-яшүсмерләр хәрби-патриотик иҗтимагый хәрәкәтенең төбәк бүлекчәсе башлыгы, «Россия ветераннар берлеге» Гомумроссия ветераннар иҗтимагый оешмасының «ТР Ветераннар берлеге» оешмасы рәисе Александр Бородин, Татарстан Республикасы ветераннар (пенсионерлар) төбәк иҗтимагый оешмасы рәисе Хәбир Иштирәков, «Хәрби Дан Клубы» Патриотик тәрбиягә һәм эзләнү эшенә ярдәм итү ассоциациясе рәисе  Михаил Черепанов, Казан шәһәре башкарма комитеты җитәкчесенең социаль мәсьәләләр буенча урынбасары Азат Абзалов, Казан шәһәре башкарма комитетының мәдәният идарәсе җитәкчесе Алия Заһидуллина, «Хәтер китабы» мемориалы мөдире Ольга Гришукова лаек булды.

Тантаналы чара алдыннан парламент җитәкчесе Республика матбугат һәм массакүләм коммуникацияләр агентлыгы «Татмедиа» игълан иткән патриотик юнәлештәге «Геройлар яңәшә» әдәби конкурсында җиңүчеләрнең әсәрләре җыентыклары күргәзмәсен карады. Күргәзмәнең үзенчәлеге шунда – анда авторларның автограф-сессиясе булды, кунаклар язучылар белән очрашты, үзләренә ошаган китапларны сатып алды һәм авторлардан  автографлар куйдырды.

Чара бәйрәм концерты белән тәмамланды.