Казанда «Ак Барс Арена» стадионы мәйданчыгында Ватанны саклаучылар елы, Җиңүнең 80 еллыгы һәм Геройлар көне кысаларында түгәрәк өстәл узды, анда Казан югары танк команда училищесы курсантлары – махсус хәрби операциядә катнашучылар һәм «Бердәм Россия» партиясе вәкилләре катнашты. Очрашуда Социаль сәясәт комитеты рәисе урынбасары Ольга Воронова һәм Дәүләт Советы депутаты Данис Зарипов катнашты.

Очрашу алдыннан курсантлар өчен Татарстандагы иң зур спорт корылмасы – «Ак Барс Арена» стадионы буйлап экскурсия оештырылды. «Бүген без махсус хәрби операциянең гадәти булмаган катнашучыларын җыйдык – бу махсус хәрби операция зонасына баручы югары команда танк училищесы курсантлары, хәзер анда кирәкле профессионаллар, – дип сөйләде Ольга Воронова. – Бераздан әйләнеп кайтачак һәм патриотик тәрбия бирү, төбәкне үстерү белән шөгыльләнүне дәвам итәчәк бу егетләргә ярдәм хәзер бик мөһим. Аларның  шуны белүе мөһим – бердәмроссия командасы махсус хәрби операциядә катнашучылар белән бергә».

Ольга Воронова билгеләп үткәнчә, Россия Президенты Владимир Путин махсус хәрби операциядә катнашучыларга зур ярдәм күрсәтә. Казан бердәмроссиялеләре дә бу эшкә актив катнаша. Алар беренчеләрдән булып хәрби операцияне хупладылар һәм 2022 елның апрелендә хәйрия концерты уздырдылар, җыелган акчаларны махсус операция зонасына җибәрделәр. Шуннан бирле мондый хәйрия акцияләре даими үткәрелә. «Без аңлыйбыз, анда безнең улларыбыз, туганнарыбыз, Ватаныбызны яклауга баскан егетләр. Сез шундый һөнәр сайлагансыз – Ватанны саклау, бу бөек адым. Сез – чын мәгънәсендә Ватанны саклаучылар», – дип мөрәҗәгать итте депутат курсантларга.

Ольга Воронова Татарстанда һәм федераль дәрәҗәдә махсус хәрби операциядә катнашучыларга ярдәм йөзеннән күп кенә законнар кабул ителүен әйтте. «Алар мәктәпләрдә түләүсез туклануга да, югары һәм махсус һөнәри уку йортларында СВОда катнашучыларның балаларын түләүсез укытуга да, төрле ташламалар бирүгә дә кагыла, – дип билгеләп үтте Социаль сәясәт комитеты рәисе урынбасары. – Бу эшне без «Бердәм Россия» партиясенең халык программасы кысаларында да эшлибез, анда махсус операциядә катнашучыларга һәм аларның гаиләләренә ярдәм итүгә багышланган тулы бер бүлек бар. Яңа ел алдыннан Татарстанда төрле чаралар узуы аеруча күңелле, һәм махсус хәрби операциядә катнашучыларның балалары да аларга киләчәк, бу бәйрәм рухына чумачак, һәм без барыбыз да могҗиза көтәчәкбез».

Фронт яны шәһәрләрендә булып кайткан Дәүләт Советы депутаты Данис Зарипов шулай ук көрәшчеләргә ярдәм итүнең төрле формаларын билгеләп үтте. «Ярдәм вариантлары төрле, һәркем мөмкин булганча ярдәм итә. Кемдер гуманитар миссияләр белән йөри, кемдер медикаментлар, җиһазлар, техника, азык-төлек, төзелеш материаллары белән ярдәм итә. Безнең сугышчыларга теләсә нинди ярдәм мөһим һәм кирәк», – дип басым ясады парламентарий.

Очрашу барышында Казан югары танк команда училищесы курсантлары сугыш хәрәкәтләрендә катнашу тарихлары белән уртаклаштылар. Бердәмроссиялеләр аларның сорауларына җавап бирделәр, төрле ярдәм чаралары буенча аңлатмалар бирделәр.