Дәүләт Советының унҗиденче утырышы 24 декабрьдә була. Бүген парламент Президиумы утырышында шундый карар кабул ителде. Депутатлар 24 мәсьәлә, шул исәптән 12 Татарстан Республикасы законы проектын һәм 4 федераль закон проектын карарга планлаштыра. Утырышны Дәүләт Советы Рәисе Фәрит Мөхәммәтшин уздырды.

Быелгы йомгаклау утырышының көн тәртибен тәкъдим итеп, Дәүләт Советы Секретаре транспорт салымы турында, Татарстан Республикасы территориясендә салым салуның патент системасын кертү турында республика законнарына үзгәрешләр кертелә торган закон проектларының беренче укылышка әзерләнүен билгеләп үтте. Шулай ук махсус хәрби операция ветераннарына һәм аларның гаилә әгъзаларына ярдәм итүгә, гражданнарга социаль хезмәт күрсәтү өлкәсендәге аерым мәсьәләләрне җайга салуга, инвалидларны эшкә алу өчен эш урыннарына квота куюга һәм инвалидларны һәм социаль яклауга аеруча мохтаҗ гражданнарны эшкә урнаштыру өчен аерым эш төрләрен (һөнәрләрне) резервлауга юнәлдерелгән республика законнары проектларын беренче укылышта карау планлаштырыла.

Лилия Маврина билгеләп үткәнчә, унҗиденче утырышта республика территориясендә алкогольсез тонус күтәрүче эчемлекләр (шул исәптән энергетик) сатуны тыю һәм чикләү турындагы закон проектын карау күздә тотыла. Закон проекты Дәүләт Советына Икътисад, инвестицияләр һәм эшмәкәрлек комитеты әгъзалары, депутатлар Артур Габделҗанов, Марат Галиев һәм Рәгать Хөсәенов тарафыннан кертелде. "Закон проекты тәкъдим иткән тыюлар һәм чикләүләрне кертү алкогольсез тонус күтәрүче эчемлекләр кулланудан гражданнарның сәламәтлегенә тискәре йогынты ясау белән бәйле, – дип аңлатты Лилия Маврина. – Параллель рәвештә депутатлар административ хокук бозулар турында Татарстан Республикасы кодексына алкогольсез тонус күтәрүче эчемлекләр (шул исәптән энергетик) сатуны тыю һәм чикләүләрне үтәмәгән өчен җаваплылык билгели торган 2.23 статья өстәүне күздә тоткан закон проектына керттеләр».

Федераль законнар һәм Дәүләт Советының агымдагы елга эш планы нигезендә утырышның көн тәртибенә Министрлар Кабинетының Гражданнарның сәламәтлеге торышы турындагы докладын кертергә тәкъдим ителә, аны сәламәтлек саклау министры Альмир Абашев тәкъдим итәчәк.

«Хөкүмәт сәгате» кысаларында «Татарстан Республикасында махсус хәрби операция ветераннарына ярдәм чаралары турында» мәгълүмат биреләчәк, аның белән республиканың Хезмәт, мәшгульлек һәм социаль яклау министры Эльмира Зарипова чыгыш ясаячак.

Традиция буенча Дәүләт Советының быелгы соңгы утырышында җиденче чакырылыш республика парламенты эше турындагы мәгълүмат белән Дәүләт Советы Рәисе Фәрит Мөхәммәтшин чыгыш ясаячак.

Лилия Маврина билгеләп үткәнчә, утырыш башланыр алдыннан һәм тәнәфесләр вакытында республика парламентында традицион «Теләкләр чыршысы» хәйрия акциясе узачак, аның кысаларында депутатлар һәм чарага чакырылганнар сәламәтлек мөмкинлекләре чикләнгән балаларның, ятимнәрнең, аз керемле гаиләләрдә үсүче балаларның һәм махсус операциядә катнашучыларның  балаларының яңа ел хыялларын тормышка ашыра алачак.

Бүген үк Президиум утырышында тарифларны җайга салуны цифрлаштыру мәсьәләләре турында фикер алыштылар. Бу мәсьәлә буенча мәгълүмат белән ТР Тарифлар буенча Дәүләт комитеты рәисе Ренат Гайнетдинов һәм ТР Дәүләт идарәсенең Цифрлы үсеш, мәгълүмати технологияләр һәм элемтә министры урынбасары Булат Габдрахманов чыгыш ясады.

Татарстанның тарифлар буенча Дәүләт комитеты рәисе Ренат Гайнетдинов тарифларны җайга салуның бердәм мәгълүмати-аналитик системасын һәм «ПРАЙМ» төбәк модулен кертү, шулай ук республиканың Россиянең бөтен территориясендә процессларны унификацияләргә мөмкинлек бирә торган «Тариф» федераль системасын куллануга күчүе турында сөйләде.

2026 елда татарстанлыларга кагылачак үзгәрешләргә килгәндә, Ренат Гайнетдинов билгеләп үткәнчә, илнең барлык төбәкләрендә, федераль законнар нигезендә, киләсе елда коммуналь хезмәтләргә тарифларны планлы индексацияләүнең ике этабы каралган: 1 гыйнвардан – индексация өстәлгән бәягә салым ставкасының артуы белән бәйле (20дән 22% ка кадәр), икенче этап 1 октябрьгә планлаштырылган. "Әлеге күрсәтмә нигезендә коммуналь хезмәтләр өчен түләү индексының үсеш чиге 1 гыйнвардан 1,7 процент, ә 1 октябрьдән Татарстан өчен 13,4 процент тәшкил итәчәк, – дип аңлатты Ренат Гайнетдинов.  Шунысын да билгеләп үтәргә кирәк, индекс кысаларында бер коммуналь хезмәткә тариф икенчесенә караганда сизелерлек артырга мөмкин. Моннан тыш, аерым муниципалитетлар өчен мөмкин булган иң чик тайпылышны куллану мөмкинлеге бар, ул республика өчен 4,8 процент күләмендә билгеләнгән».

Дәүләт Советы Рәисе Фәрит Мөхәммәтшин, утырышка йомгак ясап, профильле ведомствога депутатлар һәм ММЧ белән бергәләп аңлату эшен оештырырга кирәклегенә басым ясады. "Бу бик мөһим мәсьәлә, гражданнар тарифларда үзгәрешнең нәрсәгә бәйле булуын аңласыннар иде, бу мәсьәлә безнең барыбызда да контрольдә булырга тиеш", – дип йомгаклады сүзен Фәрит Мөхәммәтшин.

Президиум утырышында башка мәсьәләләр дә каралды.