Республиканың авыл җирлекләрендә халык җыеннары уза, анда узган елга йомгак ясыйлар һәм территорияләрне үстерүнең актуаль мәсьәләләре буенча фикер алышалар. Җыеннарда Дәүләт Советы депутатлары да катнаша.

26-28 гыйнварда Бюджет, салымнар һәм финанс комитеты рәисе Леонид Якунин Кама Тамагы муниципаль районының Кама Тамагы һәм Куйбышев Затоны бистәләрендә гражданнар җыенында катнашты. Депутат шулай ук район үзәк хастаханәсенең хезмәт коллективы һәм муниципаль районның педагогик хезмәткәрләре белән очрашты. Очрашуларда 2025 елда Татарстанның социаль-икътисади үсеш нәтиҗәләре һәм 2026 елга планнар турында фикер алыштылар. Моннан тыш, район халкы Кама Тамагы бистәсендә автовокзал төзү, Тенеш бистәсендә су агызу системасын модернизацияләү, шулай ук 2026 елда Казан белән су юлын үстерү мәсьәләләрен күтәрде.

28 гыйнварда Мәгариф, мәдәният, фән һәм милли мәсьәләләр комитеты рәисе Айрат Зарипов Кайбыч районының Багай һәм Кошман авыл җирлекләрендә халык җыеннарында катнашты. Дәүләт Советы депутаты район халкын узган елда республиканың социаль-икътисади үсешенең төп күрсәткечләре белән таныштырды.

Багай авыл җирлеге башлыгы Рушания Кузнецова башкарылган эшләр һәм гамәлгә ашырылган проектлар турында җентекләп сөйләде, шул исәптән гражданнардан җыелган үзара салым акчаларынн куллану хакында да. Аерым алганда, авыл җирлегендә урамнарны яктырту җайга салынган, 43 яктырткыч алыштырылган, рөхсәтсез чүплекләр бетерелгән, суүткәргечләр ремонтланган.

Шәхси ярдәмче хуҗалыклар алып бару җирлек икътисадында зур роль уйный. Авыл халкы сөт җитештерү һәм сату белән актив шөгыльләнә. Ел йомгаклары буенча, җирлекнең гомуми кереме 46 млн сумнан артып киткән, ә бер хуҗалыкның уртача кереме якынча 210 мең сум тәшкил иткән. Шул ук вакытта авылда сыерлар саны кими.

 Алдагы чорга планнарга килгәндә, багайлылар янгын куркынычсызлыгын тәэмин итү өчен буалар төзүне, шулай ук кырларны пестицидлар һәм гербицидлар белән эшкәрткәндә авыллар янында буфер зоналар булдыруны сорап мөрәҗәгать иттеләр. Барлык сораулар да контрольгә алынды.

27-28 гыйнварда Экология, табигатьтән файдалану, агросәнәгать һәм азык-төлек сәясәте комитеты рәисе Азат Хамаев Минзәлә районына эш сәфәре кысаларында Иске Матвевка, Николаевка һәм Юртово авыл җирлекләрендә гражданнар җыенында катнашты, анда федераль һәм республика программаларының, илкүләм проектларның гамәлгә ашырылуы турында сөйләде.

Җыеннарда район башлыгы районның социаль-икътисади үсеше турында тәфсилле хисап тотты һәм өстенлекле бурычларны билгеләде. Моннан тыш, җирлек башлыклары хисаплары тыңланды, шулай ук коммуналь челтәрләрне ремонтлауга һәм су белән тәэмин итүгә, юллар төзүгә, авыл клубларын ремонтлауга кагылышлы мәсьәләләр яңгырады.

26 гыйнварда Икътисад, инвестицияләр һәм эшмәкәрлек комитеты рәисе Рәгать Хөсәенов Баулы районының Кырым-Сарай авылында гражданнар җыенында катнашты. Авыл халкы алдында чыгыш ясап, депутат республиканың узган елгы социаль-икътисади күрсәткечләрен билгеләде һәм 2026 елга бурычлар турында сөйләде. Рәгат Хөсәенов үсешнең барлык юнәлешләре һәм халыкның тормыш сыйфатын яхшыртуның стратегик планнары буенча мәгълүмат җиткерде. Район халкы чарада актив катнашты, территорияләрне төзекләндерүгә, юлларның сыйфатына, торак-коммуналь хуҗалыкка кагылышлы көнүзәк проблемалар турында сүз булды.  Шул ук көнне Рәгать Хөсәенов мәктәптә, балалар бакчасында, янгынга каршы хезмәт постында һәм Айрат Әхмәтовның крестьян-фермер хуҗалыгында булды.  

27 гыйнварда Торак сәясәте һәм инфраструктура үсеше комитеты рәисе урынбасары Ринат Гайзатуллин Тәтеш районына эш сәфәре кысаларында Зур Әтрәч һәм Олы Шәмәк авыл җирлекләрендә халык җыеннарында катнашты. Авыл җирлекләре башлыклары Ринат Хәкимов һәм Алексей Афанасьев халыкка 2025 елгы эш йомгаклары турында хисаплар бирделәр, «Нур», «Родина» һәм «Содружество» авыл хуҗалыгы предприятиеләре эшчәнлегенә аерым тукталдылар. Гражданнар җыенында республика агросәнәгать комплексына, шәхси ярдәмче хуҗалыкларга һәм шәхси хуҗалыкларга дәүләт ярдәменең гамәлдәге чараларына аерым игътибар бирелде.

Әңгәмәнең төп темасы авылларны комплекслы үстерү һәм киберкуркынычсызлык турында булды. Авыл халкына мошенниклыкның киң таралган схемалары турында сөйләделәр, алардан саклану буенча гамәли киңәшләр бирделәр.

Ринат Гайзатуллин авыл халкына Татарстанның социаль-икътисадый өлкәдәге төп казанышлары һәм республика үсешенең стратегик планнары турында сөйләде.

 Шул ук көнне Ринат Гайзатуллин Буа районының Карлы авыл җирлегендә гражданнар җыенында катнашты, анда авыл халкы күпердән алып "Семейный бум" сәүдә үзәгенә кадәр федераль трассада урамнарны яктырту мәсьәләсен күтәрде.   

28 январьда Дәүләт корылышы һәм җирле үзидарә комитеты рәисе Альберт Хәбибуллин Актаныш районының Пучы авыл җирлегендә халык җыенында катнашты. 

29 январьда Ютазы районының Кече Урыссу авылында халык җыены булып узды. Чарада Дәүләт Советы депутаты Камил Гыйльманов, Ютазы районы башлыгы Аяз Шәфигуллин, барлык район хезмәтләре һәм бүлекләре җитәкчеләре катнашты.

Җирлекнең эш йомгаклары турындагы нотык белән район башлыгы Нурфаяз Рәфыйков чыгыш ясады. Аның әйтүенчә 2025 ел Кече Урыссу өчен яңа фельдшер-акушерлык пункты ачылу белән истәлекле булган, бу халык өчен медицина ярдәме алу мөмкинлеген сизелерлек яхшырткан.

Татарстан Республикасының үсеш планнары турында Дәүләт Советы депутаты Камил Гыйльманов сөйләде. Ул мөһим социаль һәм инфраструктур проектларга игътибарны юнәлтеп, территориянең үсеш перспективалары турында сөйләде.

Ютазы районы башлыгы Аяз Шәфигуллин районның тулаем эшчәнлегенә йомгак ясады, Кече Урыссу халкының һәрвакыт актив тормыш позициясе белән аерылып торуын һәм территорияне төзекләндерү һәм үстерү буенча мөһим мәсьәләләрне бергәләп хәл итәргә әзер булуларын ассызыклады. Ул билгеләп үткәнчә, нәкъ менә халыкның инициативалылыгы һәм бердәмлеге аркасында күп кенә проектлар гамәлгә ашырыла.

Авыл халкы өчен иң кискен мәсьәләләрнең берсе – даруханә булмау. Кече Урыссу халкы, бигрәк тә өлкән яшьтәгеләр, кирәкле даруларны сатып алуда кыенлыклар кичерә. Урыссу үзәк район хастаханәсе баш табибы дарулар белән сәүдә итү өчен лицензия кирәк булуын, ә ФАПларның медикаментлар белән сәүдә итү хокукы булмавын аңлатты.

Шулай ук Кече Урыссу авылындагы чишмәне төзекләндерү мәсьәләсе дә күтәрелде. Мәсьәлә контрольгә алынды.

24 гыйнварда Буа районының Исәк авыл җирлегендә халык җыены булып узды, анда Торак сәясәте һәм инфраструктура үсеше комитеты рәисе урынбасары Ринат Гайзатуллин катнашты. Авыл халкы өчен төп мәсьәлә –яңа клуб төзү. Сорау эшкә алынды.