Дәүләт Советы депутатларының округларда эше дәвам итә. Бу атнада парламентарийлар гражданнарны кабул итте, республика муниципалитетларындагы социаль учреждениеләрдә булды һәм сайлаучылар белән очрашты. 

29 гыйнварда Законлылык һәм хокук тәртибе комитеты рәисе урынбасары Ринат Фазылов Зәй районында эш сәфәрендә булды анда ул «Зәй район электр челтәрләре» предприятиесе коллективы белән очрашты. Очрашуда узган елга йомгак ясалды. Традиция буенча предприятиенең игътибар үзәгендә энергия белән тәэмин итүнең ышанычлылыгы мәсьәләләре кала. Узган ел трансформаторларга капиталь ремонт ясалган, 4 км озынлыктагы участокта чыбыклар алыштырылган. Бригада автомобильләре паркы 57%ка яңартылган, бу, үз чиратында, авария хәлләренә оперативлыкны арттырырга ярдәм итәчәк.

Шул ук көнне Зәйдә Ринат Фазылов катнашында район мәдәният идарәсенең йомгаклау утырышы узды. Мәдәният өлкәсе хезмәткәрләре 2025 елда башкарган эшләргә йомгак ясадылар. Узган ел Чөбекле авылы мәдәният йортында капиталь ремонт тәмамланган. «Пушкин картасы» программасы кысаларында районда 537 чара уздырылган, түгәрәкләр актив үсеш ала.

29 гыйнварда Дәүләт Советы депутаты Руслан Нигъмәтулин волонтерларга Яр Чаллыдан махсус хәрби операция зонасына гуманитар ярдәм җибәрүдә ярдәм күрсәтте. Чираттагы 20 тонна йөкне «Үзебезнекеләрне ташламыйбыз 16» төркеме волонтерлары автоград халкы, кече һәм урта бизнес предприятиеләре җитәкчеләре, иҗтимагый оешмалар вәкилләре белән бергә җыйды. Гуманитар йөк составында – автотехника, җиһазлар, төзелеш материаллары, күчтәнәчләр, азык-төлек, шул исәптән өй ашлары һәм «Вкус дома НЧ» волонтерлар төркеме әзерләгән ризыклар.

28 гыйнварда Дәүләт Советы Рәисе урынбасары Марат Әхмәтов Алабуга районы Башкарма комитеты җитәкчесенең социаль үсеш буенча урынбасары Елена Мерзон һәм Алабуга шәһәренең 40 нчы балалар бакчасы мөдире Элла Алина белән очрашты.  Республика парламентында узган очрашуда муниципаль районның мәктәпкәчә мәгариф учреждениеләрендә татар телен өйрәнү проектлары турында фикер алыштылар. Төп мәсьәләләр арасында – балалар бакчаларында телне үзләштерү өчен яңа методик алымнар һәм инновацион чаралар куллану.

28 гыйнварда Бюджет, салымнар һәм финанс комитеты рәисе Леонид Якунин эш сәфәре белән Кама Тамагы районына барды, анда ул «Бердәм Россия» партиясенең җирле бүлегендә гражданнарны кабул итте. Депутатка торак-коммуналь мәсьәләләр буенча мөрәҗәгать иттеләр. Леонид Якунин консультацияләр бирде һәм бу мәсьәләләрнең карарын контрольгә алды.

28 гыйнварда Казанның яшь гвардиячеләре «Рәхмәт» социаль адаптация үзәге һәм шәһәрнең балалар һәм яшьләр эшләре комитеты белән берлектә инвалидларга ярдәм итү, социаль адаптация һәм яшьләр белән хезмәттәшлек мәсьәләләренә багышланган очрашу оештырдылар. Иҗтимагый ярдәм штабында узган очрашуда социаль сәясәт комитеты рәисе урынбасары Ольга Воронова, Казан шәһәре Думасы депутаты, «Рәхмәт» социаль адаптация үзәге директоры Гөлнара Галиәхмәтова, балалар һәм яшьләр эшләре буенча шәһәр комитетының бүлек җитәкчесе Алсу Гыйльфанова катнашты.

 Гөлнара Галиәхмәтова менталь тайпылышлары булган кешеләрне тернәкләндерү белән шөгыльләнүче үзәк эшчәнлеге турында сөйләде. Проектта балалар йортларында үскән 11 кеше катнаша. Бүген алар эшлиләр, мөстәкыйльлеккә өйрәнәләр һәм җәмгыятьтә уңышлы социальләшәләр. Очрашу барышында мөмкинлекләре чикләнгән кешеләргә ярдәм итү чараларын гамәлгә ашыру планын эшләү турында карар кабул ителде. Проект «Казан – Игелекле эшләр территориясе» дип атала һәм ул  мөмкинлекләре чикләнгән кешеләрне иҗтимагый тормышка җәлеп итүгә, аларның мөмкинлекләрен исәпкә алып, чараларда һәм акцияләрдә катнашуга юнәлдереләчәк.

27 гыйнварда Казанда ел саен үткәрелә торган «Татарстан Республикасының ел студенты – 2025» премиясе белән бүләкләү тантанасы узды. Быел премиягә 574 гариза кергән. Җиңүчеләрне 20 номинация буенча билгеләделәр: иң яхшы спортчылар, старосталар, тулай торак советлары һәм башка студентлар берләшмәләре вәкилләре билгеләп үтелде. Законлылык һәм хокук тәртибе комитеты рәисе урынбасары Ринат Фазылов «Елның патриотик берләшмәсе» номинациясендә җиңүчеләргә дипломнар һәм бүләкләр тапшырды.    

27-28 гыйнварда Экология, табигатьтән файдалану, агросәнәгать һәм азык-төлек сәясәте комитеты рәисе Азат Хамаев Минзәлә районына эш сәфәре кысаларында «Минзәлә-бройлер» авыл хуҗалыгын тәэмин итү-сату кулланучылар кооперативында булды. Якын арада предприятиедә терлек сую цехы ачу планлаштырыла, ул йорт кошларын сыйфатлы эшкәртүне оештырырга, ветеринария контроле дәрәҗәсен күтәрергә һәм район халкын яңа продукция белән тәэмин итәргә мөмкинлек бирәчәк.

Шул ук көнне Азат Хамаев Минзәлә медицина училищесы педагоглары һәм укучылары белән очрашты. Очрашуда районның сәламәтлек саклау өлкәсен үстерү, яшь белгечләрне эшкә урнаштыру перспективалары һәм талантлы яшьләргә ярдәм итү мәсьәләләре каралды.

Азат Хамаев катнашында шулай ук Минзәлә шәһәренең 1 нче урта мәктәбендә районның педагоглар коллективы белән очрашу булды. Мәгариф учреждениеләрендә тәрбия эше, укучыларда әхлакый кыйммәтләр формалаштыру, шулай ук укучыларның дәрестән тыш эшчәнлеген оештыру мәсьәләләре турында фикер алыштылар.

28 гыйнварда Дәүләт Советы депутаты Руслан Нигъмәтулин «Бала тудыру йортларына депутат контроле» федераль проекты кысаларында Чаллыда Кама балалар медицина үзәгендә булды. Депутат медицина учреждениесенең барлык төп бүлекләрендә, шул исәптән гаиләне планлаштыру үзәгендә, кабул итү бүлмәсендә, бала тудыру бүлегендә, йөклелек патологиясе бүлегендә, яңа туган балаларны реанимацияләү бүлегендә булды. Руслан Нигъмәтулин яшь әниләр белән аралашты, шулай ук табиблар белән бала табуда ярдәм итү системасы проблемалары турында сөйләште. 

24 гыйнварда Дәүләт Советы Секретаре Лилия Маврина Казан шәһәре Совет районы лицее – инженерлык үзәгенең ун еллык юбилеена багышланган тантаналы чарада катнашты. Чара Идел буе физик культура, спорт һәм туризм институтының концертлар залында узды. Лилия Маврина лицейның педагогик коллективын, укучыларны һәм ата-аналарны котлады. «Безнең уртак киләчәгебезгә керткән өлешегез өчен рәхмәт белдерәм. Лицейга яңа биеклекләр телим! Мондый учреждениеләрнең безнең районда һәм республикада булуы белән горурланабыз», – диде Лилия Маврина.

23 гыйнварда Социаль сәясәт комитеты рәисе урынбасары Ольга Воронова «Бердәм Россия» партиясенең «Көчле икътисад» бүлеге буенча халык программасын гамәлгә ашыру буенча республика комиссиясе составында Түбән Кама шәһәрендә булды. Күчмә утырыш кысаларында депутат «База» креатив индустрияләрне үстерү үзәгендә, «Локация» адаптация үзәгендә, «Түбән Кама» сәнәгать паркында, шулай ук «СИБУР-Интех» мәгариф үзәгендә булды.

«Түбән Кама комплекслы трансформация территориясе булып тора, анда илкүләм проектлар сәнәгатьне модернизацияләү, шәһәр мохитен үстерү һәм тормыш сыйфатын күтәрү нигезенә әверелде. Социаль өлкәгә дә зур игътибар бирелә. 2025 елда Түбән Кама районында уңайлы мохитне үстерүгә инвестицияләр күләме 10 млрд сумнан артып китте», – дип ассызыклады Ольга Воронова. 

Түбән Камага эш сәфәре барышында Ольга Воронова өлкәннәр өчен «Сердце гармонии» шәхси пансионатында да булды. Хәзерге вакытта пансионатта даими яшәүче өлкән яшьтәге кешеләр бар, аларга карау, яшәү һәм медицина ярдәме күрсәтү шартлары тәэмин ителгән.

29 гыйнварда Мәгариф, мәдәният, фән һәм милли мәсьәләләр комитеты рәисе урынбасары Ирина Терентьева Яшел Үзән районында эш сәфәрендә булды, анда ул гражданнарны кабул итте һәм музыкаль театрның 15 еллыгы уңаеннан оештырылган тантаналы чарада катнашты. Ирина Терентьева педагогик коллективны һәм укучыларны котлады, шулай ук Дәүләт Советы Рәисенең Рәхмәт хатын тапшырды. Тамашачылар өчен театрның иң яхшы артистлары катнашында гала-концерт булды.

Гражданнарны кабул итү кысаларында депутатка «Синяя птица» өстәмә белем бирү үзәге директоры мәктәпкәчә яшьтәге балалар өчен эшләнә торган яңа проектка терәк булуын  сорап мөрәҗәгать итте. Моннан тыш, район инвалидлар җәмгыяте җитәкчесе белән депутат сәламәтлек мөмкинлекләре чикләнгән кешеләрне социальләштерүгә кагылышлы мәсьәләләр буенча фикер алышты.