Бүген Әлмәт районының мактаулы гражданины, СССР нефть сәнәгате министрлыгының мактаулы нефтьчесе, Россия Федерациясенең атказанган нефть һәм газ сәнәгате хезмәткәре, Россия Энергетика министрлыгының атказанган хезмәткәре, «Татнефть» ААҖнең мактаулы нефтьчесе Әнәс Кыям улы Гыйматдинов үзенең 90 яшьлек юбилеен билгеләп үтә. Әнәс Кыям улын мөһим вакыйга белән Дәүләт Советы Рәисе Фәрит Мөхәммәтшин котлады.

Әнәс Гыйматдинов әлмәтлеләрнең берничә буыны өчен абруйлы, хөрмәтле остаз булды һәм шулай булып кала да. Ул гомерен нефть-газ тармагын үстерүгә һәм районның социаль проблемаларын хәл итүгә багышлаган.

Чирмешән урта мәктәбен тәмамлаган Әнәс Гыйматдиновның игътибарын баштарак нефтьче һөнәре җәлеп иткән, әмма аның, иң яхшы укучыларның берсе буларак, туган авылы Туймәттә рус теле һәм әдәбияты укытучысы булып эшләвен сораганнар. Армиядә хезмәт иткәннән соң Әнәс Гыйматдинов Әлмәт бораулау кадрлары мәктәбенә укырга керә. Студент чагында ул «Әлкинефть» нефть һәм газ чыгару идарәсенә эшкә алынган була инде.

 Соңрак Әнәс Кыям улы Губкин исемендәге Мәскәү нефть һәм газ институтының кичке факультетын тәмамлый (татар филиалы) һәм «Әлмәтнефть» нефть-газ чыгару идарәсенә күчә. Автоматизация участогы начальнигы вазыйфасыннан аны КПССның шәһәр комитетына чакыралар: башта инструктор, аннары бүлек мөдире, соңрак икенче Секретарь итеп сайлыйлар. Ул сигез ел районның нефть тармагы үсеше өчен җаваплы була, партия эшен «үзенең икенче университеты» дип атый.

1978 елда Әнәс Гыйматдинов «Татнефть» берләшмәсе генераль директорының кадрлар һәм социаль мәсьәләләр буенча урынбасары итеп билгеләнә. Бу җаваплы вазыйфада ул 21 ел эшли, хезмәткәрләрне торак һәм сабыйларны  балалар бакчаларында урыннар белән тәэмин итү, балалар ялын оештыру, хезмәт династияләрен үстерү һәм яңа нефть һәм газ чыгару идарәләре өчен кадрлар формалаштыру мәсьәләләрен хәл итә.

2023 елда Әнәс Кыям улына Гыйматдиновка «Әлмәт муниципаль районының мактаулы гражданины» исеме бирелә.

Үзенең 90 яшьлек юбилеен атказанган нефтьче яраткан гаиләсе белән каршылый.  Хатыны Тәнзилә Бакировна белән өч бала үстергәннәр, хәзер оныклар тәрбиялиләр.

Ветеранны юбилее белән бүген Татарстан Республикасы Рәисенең нефть сәнәгате мәсьәләләре буенча ярдәмчесе, «Татнефть» компаниясенең атказанган ветераны Шәфәгать Тәхаутдинов, Әлмәт муниципаль районы башлыгы Гүзәл Хәбетдинова һәм «Татнефть» ГАҖ генераль директоры Наил Маганов котладылар.  

Гүзәл Хәбетдинова Әнәс Гыйматдиновның Әлмәтне торгызуга керткән зур өлешен билгеләп үтте. Ул эшләгән елларда шәһәрнең эре предприятиеләре – «Радиоприбор» заводы, Әлмәт электр насослары заводы, торба заводы, оек фабрикасы һәм башкалар, шулай ук социаль-мәдәни объектлар төзелә. Шул вакытта 3 нче микрорайон төзелә башлый. "Сезне һөнәри осталыгыгыз, тыйнак һәм кешелекле булуыгыз, игелекле эшләрегез өчен чын күңелдән бәялиләр һәм яраталар. Без сезнең белән һәм сезнең хезмәт батырлыгыгыз белән горурланабыз», – диде Гүзәл Хәбетдинова юбилярга, нык сәламәтлек һәм озын гомер теләде.