Дәүләт Советы депутатларының округларда эше дәвам итә. Бу атнада парламентарийлар гражданнарны кабул итте, республика муниципалитетларындагы социаль учреждениеләрдә булды һәм сайлаучылар белән очрашты. 

6 февральдә Дәүләт Советы Секретаре Лилия Маврина махсус хәрби операциядә катнашучыларны һәм аларның гаилә әгъзаларын яклау мәсьәләләре буенча гражданнарны кабул итүдә катнашты. Депутатка шәхси сорау белән мөрәҗәгать иттеләр. Махсус операциядә катнашучы госпитальдә үпкә ялкынсынуыннан үлгән. Үлем турындагы хәбәр нигезендә, үлем сәбәбе хәрби хезмәт узу белән бәйле түгел. Мөрәҗәгать итүче, махсус хәрби операциядә катнашучының баласының вәкиле буларак, компенсация алуда ярдәм күрсәтүләрен сорый. Лилия Маврина аның мәсьәләсен шәхси контрольгә алды.

4 февральдә Торак сәясәте һәм инфраструктура үсеше комитеты рәисе урынбасары Ринат Гайзатуллин һәм Дәүләт Советы депутаты Ләлә Кәдермәтова Тәтеш районы авыл хуҗалыгы хезмәткәрләрен хөрмәтләүгә багышланган тантаналы чарада катнаштылар. Аграрийлар узган елга йомгаклар ясадылар һәм тармак алдынгыларын билгеләп үттеләр. Икътисади кыенлыкларга һәм начар һава торышына карамастан, 2025 елда районда 6 миллиард сумнан артык авыл хуҗалыгы продукциясе җитештерелгән (узган ел белән чагыштырганда 23% ка үсеш). 228 мең тоннадан артык ашлык суктырылган (уңдырышлылык гектардан 53,3 центнер). Тәтеш районы  –  бөртекле ашлык уңдырышлылыгы буенча республика районнары арасында лидер (51,3 ц/га). Ринат Гайзатуллин Тәтеш аграрийларына хезмәткә намуслы мөнәсәбәтләре өчен рәхмәт белдерде. Хезмәт алдынгыларына медальләр, Рәхмәт хатлары, дипломнар һәм Мактау грамоталары тапшырылды.

4 февральдә Казанның Вахитов һәм Идел буе районнарында Казан шәһәре Думасы депутатларының халык алдында хисаплары булып узды. Казан энергетика көллиятендә узган очрашуда Дәүләт Советы депутаты Евгений Солтанов катнашты.

4 февральдә Дәүләт Советы Рәисе урынбасары Марат Әхмәтов һәм Мәгариф, мәдәният, фән һәм милли мәсьәләләр комитеты рәисе Айрат Зарипов Татарстан Республикасы Фәннәр Академиясе белән берлектә туган телләрне саклауга һәм үстерүгә юнәлдерелгән уртак проектлар эшләү мәсьәләләренә багышланган киңәшмәдә катнаштылар. «Алда бай мәдәни мирасыбызны саклауга юнәлдерелгән уртак зур эшләр тора», – дип шәрехләде очрашу йомгакларын Марат Әхмәтов.

4 февральдә Мәгариф, мәдәният, фән һәм милли мәсьәләләр комитеты рәисе урынбасары Ирина Терентьева Яшел Үзән районына эш сәфәре белән килде, анда Карамалы Тау бистәсендә гражданнар җыенында катнашты.

Узган ел Карамалы Тау бистәсе җирлегендә юлларга ремонт һәм асфальт җәелгән, тротуарлар, универсаль футбол кыры төзелгән, 12 йорт хуҗалыгына газ кертелгән. Үзара салым акчасына вак таш сатып алынган, зират коймалары яңартылган, җәяүлеләр күпере салынган.   Җыелышта шулай ук мәдәният йортының эше турында да фикер алыштылар, яшьләр өчен өстәмә түгәрәкләр оештыру мәсьәләсен дә күтәрделәр. Авыл халкы күтәргән актуаль мәсьәләләр арасында –инфраструктураны яңарту, капиталь ремонт һәм яңа социаль учреждениеләр, юллар, инженерлык челтәрләре төзү. «Барысы да берьюлы эшләп булмаса да, авырту нокталары санын этаплап киметеп була», – дип билгеләп үтте Яшел Үзән районы башлыгы Михаил Афанасьев.

3 февральдә Дәүләт Советы Секретаре Лилия Маврина Казанның Совет районы халкы белән очрашуда катнашты. Казанлылар ишегалларын төзекләндерү, транспорт һәм коммуналь хезмәтләр эше мәсьәләләрен күтәрделәр.

«Мондый очрашулар – безнең эшнең иң мөһим өлеше. Кәгазьләр һәм беркетмәләр аша түгел, ә кешеләрнең чын проблемаларын һәм кәефләрен ишетү өчен күзгә-күз карап сөйләшү мөһим, – дип билгеләп үтте Лилия Маврина. – Аларның бер өлеше оператив рәвештә хәл ителә, икенчеләре буенча депутат сорауларын әзерләп профильле министрлыкларга һәм район администрацияләренә җибәрәбез».

4 һәм 5 февральдә Лилия Маврина катнашында мондый очрашулар Азино һәм Танкодром микрорайоннарында узды.   

3 февральдә Бюджет, салымнар һәм финанс комитеты рәисе урынбасары Камил Ногаев эш сәфәре белән Әтнә районына барды, анда Фәйзи Галиев исемендәге авыл хуҗалыгы җитештерү кооперативының хисап-сайлау җыелышында катнашты. Киңәшмәдә предприятиенең 2025 елдагы эшчәнлегенә йомгак ясалды. Хезмәткәрләр алдында чыгыш ясап, депутат республиканың узган елгы социаль-икътисадый күрсәткечләре турында һәм 2026 елга бурычлар турында сөйләде.    

4–5 февральдә Камил Ногаев «Кушар» һәм «Мәңгәр» авыл хуҗалыгы җитештерү кооперативлары хезмәт коллективлары җыелышында катнашты.

3 февральдә Дәүләт корылышы һәм җирле үзидарә комитеты рәисе Альберт Хәбибуллин эш сәфәре белән Актаныш районында булды, анда район Советы утырышында катнашты. Утырышта муниципалитетның 2025 елдагы социаль-икътисади үсеш нәтиҗәләре тәкъдим ителде һәм 2026 нчы елга өстенлекле юнәлешләр билгеләнде. Совет эшендә ТР  Премьер-министры урынбасары – ТР Авыл хуҗалыгы һәм азык-төлек министры Марат Җәббаров, Актаныш районы башлыгы Ленар Зарипов, район Советы әгъзалары, район предприятиеләре һәм оешмалары җитәкчеләре катнашты. 

3 февральдә Экология, табигатьтән файдалану, агросәнәгать һәм азык-төлек сәясәте комитеты рәисе урынбасары Нәҗип Хаҗипов эш сәфәре белән Азнакай районына барды. Депутат Азнакай урман хуҗалыгында булды, анда оешма директоры белән киңәшмә үткәрде.

«Бердәм Россия» партиясенең район бүлекчәсендә Нәҗип Хаҗипов гражданнарны кабул итте. Аңа СВО ветераны инвалидлыкны рәсмиләштергәндә туган сораулар белән мөрәҗәгать итте. Депутат барлык сорауларны шәхси контрольгә алды.

Шул ук көнне Нәҗип Хаҗипов 2022 елда файдалануга тапшырылган «Өмет» хайваннар приютында булды. Бүгенге көндә биредә 135 караучысыз хайван асрала. Хуҗасыз хайваннарны тотып алып килү һәм аларны тәрбияләү эшләре Азнакай шәһәре, Азнакай районы һәм Актүбә поселогы башкарма комитетлары белән контрактлар нигезендә оештырыла. Приютта шулай ук хайваннар өчен яңа хуҗалар эзләү буенча да эш алып барыла. 2026 елның гыйнварында 4 эт яңа хуҗаларга тапшырылган. 

3 февральдә Торак сәясәте һәм инфраструктура үсеше комитеты рәисе урынбасары Ринат Гайзатуллин эш сәфәре белән Чүпрәле районына барды, анда ул Иске Чүпрәле авылындагы гражданнар җыенында катнашты.  Иске Чүпрәле авыл җирлеге башлыгы урынбасары Рамил Низамов узган елга йомгак ясады һәм агымдагы елга планнар билгеләде.

Ринат Гайзатуллин республикада максатчан программаларның һәм илкүләм проектларның гамәлгә ашырылуы турында сөйләде.  Район башлыгы Марат Гафаров район халкына җәмәгать тормышында катнашулары һәм махсус хәрби операциядә катнашучыларга ярдәм җыюлары өчен рәхмәт белдерде. «Барлык бурычларны да бер ел эчендә үтәп булмый, әмма барысы да үтәлерлек һәм хәл ителерлек», – дип белдерде ул, киләчәктә дә бердәмлекне сакларга өндәде. Соңыннан авылның актив кешеләренә бүләкләр тапшырылды.

3 февральдә Дәүләт Советы депутаты Руслан Нигъмәтулин Яр Чаллы шәһәренең 58 нче мәктәбендә  9, 58, 59, 60 нчы микрорайоннары халкы белән узган очрашуда катнашты. 2025 елга йомгак ясалды, 2026 елга планнар билгеләнде.

2 февральдә Икътисад, инвестицияләр һәм эшкуарлык комитеты рәисе Рәгать Хөсәенов төбәк иҗтимагый кабул итү бүлмәсендә гражданнарны кабул итте. Депутатка пенсионер хатын ташламалы категориядәге гражданнар өчен җир кишәрлекләрен яңадан бүлү турындагы законнарны аңлатуны сорап мөрәҗәгать итте. Рәгать Хөсәенов тиешле консультация бирде.

2 февральдә Дәүләт Советы депутаты Ренат Мистахов инициативасы һәм Санкт-Петербург дәүләт диңгез техник университеты ярдәме белән математика буенча вузара олимпиаданың йомгаклау этабы узды.  Яшел Үзән районының «Ак барс» укыту үзәге формула һәм мантыйк территориясенә әверелде. Олимпиадада Ульяновск, Чабаксар һәм Новочебоксар, Ижау, Тольятти, Йошкар-Ола, Пермь, Ярославль, Казан, Яшел Үзән һәм илнең башка шәһәрләреннән йөздән артык өлкән сыйныф укучысы катнашты. «Мондый олимпиадалар – балалар өчен гадел интеллектуаль лифт. Белем һәм үҗәтлек кенә», – дип билгеләп үтте Дәүләт Советы депутаты Ренат Мистахов. 

2 февральдә Социаль сәясәт комитеты рәисе урынбасары Ольга Воронова Хезмәт, мәшгульлек һәм социаль яклау министры урынбасары Наталья Бутаева һәм РФ Социаль фондының ТР буенча идарәчесе урынбасары Елена Полякова белән берлектә «2026 елда социаль ярдәм чаралары» темасына вебинарда модератор сыйфатында катнашты.

Вебинардан соң Ольга Воронова гражданнарны кабул итте. Депутатка хәрби хәрәкәтләр ветераны инвалидлык буенча пенсия белән тәэмин итү мәсьәләсе белән мөрәҗәгать итте. 

30 гыйнварда Социаль сәясәт комитеты рәисе урынбасары Ольга Воронова «Бердәм Россия» партиясенең Идел буе районы бүлеге активистлары белән Казанның 13 нче санлы «Сандугач» китапханәсендә очрашу үткәрде. Чарада район территориясендә эшләүче иҗтимагый оешмалар һәм инициатив төркемнәр вәкилләре катнашты. Катнашучылар үз эшчәнлек юнәлешләрен күрсәттеләр һәм 2026 елда гамәлгә ашырылырга планлаштырылган проектларны билгеләделәр. Алар арасында – салым грамоталылыгы буенча агарту чаралары, мошенниклыкны профилактикалау проектлары, сәламәтлеге мөмкинлекләре чикләнгән балалар һәм яшүсмерләр өчен социаль программалар, шулай ук иҗтимагый куркынычсызлык һәм экстремизмны профилактикалау өлкәсенә кагылышлы инициативалар. «Мондый инициативалар мөһим социаль характерга ия һәм партиянең Халык программасы, милли максатлар, федераль һәм төбәк партия проектлары кысаларында гамәлгә ашырылырга тиеш. Аларны гамәлгә ашыру тормыш сыйфатын һәм халыкның гомуми иминлеген арттыруга юнәлдерелгән», – дип билгеләде Ольга Воронова.

30 гыйнварда Бюджет, салымнар һәм финанслар комитеты рәисе урынбасары Камил Ногаев эш сәфәре белән Кукмара районына барды, анда муниципаль район Советының 2025 елда муниципалитетның социаль-икътисади үсеш нәтиҗәләренә һәм 2026 елга бурычларга багышланган утырышында катнашты. Утырыш башланыр алдыннан депутат мәдәният йорты фойесында ачылган район предприятиеләре җитештергән продукцияләр күргәзмәсен карады. Утырыш барышында киез итек җитештерүчеләр үз продукциясенең үзкыйммәте арту сәбәпле мәҗбүри маркировканы гамәлдән чыгаруга кагылышлы мәсьәләне күтәрделәр. Шулай ук агроферма җитәкчеләре сөткә сатып алу бәяләре төшүгә борчылуларын белдерделәр.