Олы Кайбыч авылы мәдәният йортында Кайбыч муниципаль районы Советының тугызынчы утырышы узды.

Сессия башланыр алдыннан район башлыгы Альберт Рәхмәтуллин ТР Дәүләт Советы Рәисе урынбасары Юрий Камалтынов һәм ТР Дәүләт Советы депутатлары Айдар Таһиров, Айрат Зарипов, Фәнил Баһаветдинов белән берлектә фойеда оештырылган күргәзмә белән таныштылар. Экспозицияләр илебез тарихының героик сәхифәләренә, район халкының махсус хәрби операциядә катнашуына һәм гуманитар ярдәм оештыруга багышланган иде. Кече һәм урта бизнес вәкилләре үз продукцияләренең киң ассортиментын тәкъдим иттеләр.

«Кайбыч районының 2025 елга социаль-икътисади үсеш нәтиҗәләре һәм 2026 елга бурычлар» дигән төп доклад белән Альберт Рәхмәтуллин чыгыш ясады. Ул эшнең төп юнәлешләренә җентекләп тукталды: халыкның тормыш сыйфатын яхшырту, эшмәкәрлекне үстерү, авыл хуҗалыгындагы казанышлар, үзара салым программасын һәм илкүләм проектларны гамәлгә ашыру. Шулай ук федераль һәм республика бюджетлары хисабына объектлар төзү нәтиҗәләре, мәгариф, мәдәният, сәламәтлек саклау һәм спорт өлкәләрендәге уңышлар билгеләнде.

Утырышта «Яратель» кошчылык фабрикасының «Яратель-азык» бүлекчәсе җитәкчесе урынбасары Виктория Путинцева чыгыш ясады, ул предприятиенең Коланга территориясендәге эшчәнлеге турында сөйләде.

Юрий Камалтынов махсус хәрби операциядә катнашучыларга актив ярдәм күрсәткәннәре, даими рәвештә гуманитар ярдәм җибәргәннәре һәм хәрбиләрнең гаиләләренә игътибарлары өчен район халкына рәхмәт белдерде. Ул билгеләп үткәнчә, инвесторлар белән эш темплары һәм төп капиталга инвестицияләр җәлеп итү буенча Кайбыч районы 2025 ел йомгаклары буенча республикада икенче урынны алган.

– Районның инвестицияләр җәлеп итүчәнлеген саклап калу һәм планлаштырылган барлык проектларны тормышка ашыру мөһим. Сезнең бердәм командага нәтиҗәле эшчәнлеге өчен рәхмәт белдерәм, — диде ул.

Утырыш азагында хезмәт алдынгыларын хөрмәтләделәр.