Бүген Дәүләт Советы утырышында Азат Җиһаншинның 12 гыйнварда Татарстан экология һәм табигый байлыклар министры итеп билгеләнүе сәбәпле вәкаләтләрен вакытыннан алда туктату турында карар кабул ителде.

“50 нче Биектау бер мандатлы сайлау округы буенча сайланган депутат Азат Җиһаншинның вәкаләтләрен, депутат вәкаләтләрен туктату турындагы язма гаризасы нигезендә, 2026 елның 12 гыйнварыннан вакытыннан алда туктатылган дип санарга", - диелә Дәүләт Советы кабул иткән карарда.

Дәүләт Советы Рәисе Фәрит Мөхәммәтшин Азат Җиһаншинга нәтиҗәле депутат эшчәнлеге өчен рәхмәт белдерде. "Алтынчы һәм җиденче чакырылыш Дәүләт Советы депутаты Азат Җиһаншин закон чыгару эшчәнлегендә, Экология, табигатьтән файдалану, агросәнәгать һәм азык-төлек сәясәте комитеты эшендә актив катнашты. Азат Илдус улының иҗтимагый эшчәнлеге һәм экологик проектларда катнашуы аерым игътибарга лаек", - дип билгеләп үтте Фәрит Мөхәммәтшин.

Парламент җитәкчесе Азат Җиһаншинга Дәүләт Советы Рәисенең Рәхмәт хатын тапшырды һәм яңа эш урынында уңышлар теләде.

"Татарстан Республикасы Рәисенең ышанычына лаек булу минем өчен зур дәрәҗә һәм зур җаваплылык һәм, һичшиксез, бу ышанычны аклау өчен бөтен көчемне, белемемне һәм тәҗрибәмне кулланачакмын, - диде Азат Җиһаншин. “Бүгенге көнгә кадәр бергә хезмәт иттек, киләчәктә дә республикабызга, халкыбызга намуслы, фидакарь хезмәт күрсәтергә язсын. Йортларыгызга җан җылысы, дөньябызга иминлек телим», – диде ул депутатларга мөрәҗәгать итеп.

Депутат вәкаләтләре вакытыннан алда туктатылу сәбәпле, утырышта Азат Җиһаншинны Экология, табигатьтән файдалану, агросәнәгать һәм азык-төлек сәясәте комитеты составыннан чыгару турында Карар кабул ителде.