Бу атнада мәктәпләрдә һәм урта һөнәри белем бирү учреждениеләрендә «Фидакарь хезмәт һәм хәрби батырлык белән Ватанны данлыбыз!» темасына  Дәүләт Советы, шәһәр һәм район Советлары депутатлары катнашында парламент дәресләре уза. Быел парламент дәресе Татарстанда игълан ителгән Хәрби батырлык һәм хезмәт фидакарьлеге елына багышлана.

19 февраль көнне Тәтешнең Россия Герое А.А. Соколовский исемендәге 2 нче урта мәктәбендә отставкадагы майор, Әфганстандагы сугыш хәрәкәтләре ветераны Николай Жарков катнашында парламент дәресе үтте. Ул малай чагында ук Ватанны саклаучы булырга хыяллануы турында сөйләде һәм укучылар белән тормыш тәҗрибәсе белән уртаклашты, үзенең киңәшләрен бирде.

18 февральдә Казанның 139 нчы гимназиясендә Социаль сәясәт комитеты рәисе Алексей Созинов парламент дәресе үткәрде. Депутат республикабыз һәм илебез тарихының героик сәхифәләре турында сөйләде. «Үсеп килүче буын Ватан язмышы белән чын күңелдән кызыксына һәм уртак эшкә шәхси өлеш кертүнең мөһимлеген аңлый, – дип билгеләде Алексей Созинов. – Безнең максат – яшьләргә закон чыгару хакимияте эше турында сөйләү генә түгел, ә бәлки алар белән дәүләтебезнең нинди кыйммәтләргә нигезләнүе турында фикер алышу: Ватанга тугрылык, ата-бабаларыбызның хезмәтенә һәм батырлыкларына хөрмәт».

18 февральдә Экология, табигатьтән файдалану, агросәнәгать һәм азык-төлек сәясәте комитеты рәисе Азат Хамаев Минзәлә шәһәренең 2 нче мәктәбе укучылары өчен парламент дәресендә катнашты. Укучылар депутатка сораулар бирделәр, үз тәкъдимнәрен әйттеләр, туган район һәм республика үсеше турында фикерләре белән уртаклаштылар.

18 февраль көнне Дәүләт Советы депутаты Данис Шакиров Байлар Сабасы бистәсе гимназиясенең 10-11 сыйныф укучылары өчен парламент дәресе үткәрде. Ул парламент дәресләре тарихы һәм Татарстанның казанышлары, махсус хәрби операциядә катнашучылар турында сөйләде, укучыларның парламент эшчәнлеге турындагы сорауларына җаваплар бирде.

16 февраль көнне Дәүләт Советы Рәисе урынбасары Марат Әхмәтов Сарман гимназиясе укучылары өчен парламент дәресе үткәрде. Депутат укучыларга Россия гражданнарының төрле вакыттагы батырлыклары һәм кыюлыклары турында сөйләде. «Мондый чаралар үсеп килүче буында ватанпәрвәрлек хисе, үз илебез тарихына хөрмәт һәм ата-бабаларыбыз казанышлары белән горурлану хисен формалаштыру өчен бик мөһим. Яшьләрнең яңа офыкларны актив үзләштерүе һәм яңа сынаулар белән очрашуы,  бу хакта аеруча истә тотарга кирәк», – диде Марат Әхмәтов.

16 февраль көнне Сарманның 1 нче мәктәбендә Законлылык һәм хокук тәртибе комитеты рәисе урынбасары Ринат Фазылов парламент дәресе үткәрде. «Кызыклы диалог килеп чыкты: укучылар тарихи детальләрдән алып бүгенге көнгә кадәр ватаныбыз тарихына кагылышлы  сораулар бирделәр. Минемчә, парламент дәресләре яшьләрне хокукый яктан агарту һәм патриотик тәрбияләүнең нәтиҗәле ысулы булып тора», – дип билгеләп үтте Ринат Фазылов.

17 февральдә Икътисад, инвестицияләр һәм эшкуарлык комитеты рәисе Рәгать Хөсәенов Баулының 5нче мәктәбендә парламент дәресендә катнашты. Депутат өлкән сыйныф укучылары белән бергә фронтта һәм тылда герой булуның нәрсә икәнлеге турында фикер алышты, шулай ук ата-бабаларыбызның батырлыклары турындагы истәлекнең киләчәгебезне төзергә ничек ярдәм итүе турында сөйләде. «Әңгәмә ачык һәм эчкерсез булып чыкты –мондый очрашулар гражданлык позициясен формалаштыруга ярдәм итә һәм туган җиребезнең тарихын бәяләргә өйрәтә», –дип билгеләп үтте Рәгать Хөсәенов. Дәрес Россия Федерациясе һәм Татарстан Республикасы дәүләт гимннарын башкару һәм флаглар күтәрү тантанасыннан башланды.

17 февраль көнне генерал-майор Владимир Хапаев исемендәге Тәтеш кадет интернат-мәктәбендә парламент дәресе үткәрелде, аның мактаулы кунагы Тәтеш муниципаль районы Советы депутаты Вилә Нуруллина булды. Дәрестә сүз Ватанның героик үткәне турындагы тарихи хәтерне саклауның мөһимлеге турында барды.

16 февраль көнне Н.И. Лобачевский исемендәге лицейда парламент дәресе үтте. Россия Герое, Татарстан Республикасы Хезмәт, халыкны эш белән тәэмин итү һәм социаль яклау министры урынбасары Рәсим Баксиков чараның мәртәбәле кунагы булды.  Лицей укучылары алдында ясаган чыгышында Рәсим Баксиков Россиянең киләчәге белән бәйле мөһим темаларга кагылды һәм нәкъ менә бүгенге мәктәп укучыларына Россия икътисадының һәм инженерлык эшенең киләчәген билгеләргә туры киләчәген ассызыклады.  Ата-бабалар, дәүләт һәм киләчәк буыннар алдында җаваплылык мәсьәләләренә аерым игътибар бирелде. Рәсим Баксиков тарихи хәтернең әһәмияте, үткәндәге вакыйгаларны аңлау кирәклеге турында искә төшерде. Ул герой-шагыйрь Муса Җәлилне мисал итеп китерде, аның иҗаты һәм батырлыгы Ватанга мәхәббәт һәм рух көче дәлиле булып тора.

17 февраль көнне Урыссу гимназиясендә муниципаль район Советы депутаты Наил Кубашев катнашында парламент дәресе үткәрелде. Гимназия укучылары ил тарихының төп вакыйгаларын, армия казанышларын һәм тыл хезмәтчәннәренең батырлыкларын чагылдырган докладлар белән чыгыш ясадылар. Дәрестә «Ватанга хезмәт итү» төшенчәсе хакында фикер алыштылар.

17 февральдә партия тарафдарларының төбәк советы рәистәше Ксения Дромняк парламент дәресе кысаларында 133 нче лицейның 9-11 нче сыйныф укучыларына шәхси үсеш һәм илнең чәчәк атуы арасындагы аерылгысыз бәйләнеш турында сөйләде. «Безнең илебез тарихында кыюлык һәм фидакарь хезмәтнең күп мисаллары саклана. Ата-бабаларның батырлыклары, аларның эшкә тугрылыгы һәм үз-үзләрен корбан итәргә әзерлеге яшь буын өчен илһамландыручы маяк булып хезмәт итә. Бу мисаллар шуны күрсәтә: һәр кеше, яшенә һәм шөгыльләренә карамастан, гомуми эшкә үз өлешен кертә ала», – дип билгеләп үтте ул.

17 февраль көнне Дәүләт Советы депутаты Илгиз Зәйниев Балтач районының Арбор урта мәктәбендә парламент дәресендә кунакта булды. Депутат мәктәп укучыларына халкыбызның тарихы турында сөйләде, иң авыр вакытларда ата-бабаларыбызның туган җирне саклауга күтәрелүләрен искә төшереп, гаҗәеп батырлык һәм фидакарьлеккә әзерлек торулары хакында әйтте.  Депутат шулай ук якташларыбызның Бөек Ватан сугышы елларындагы батырлыклары, фронтларда сугышулары һәм тылда хезмәт итүләре, Бөек Җиңүне якынайтулары турында сөйләде. Бу тарихлар – чын патриотизм һәм үз илеңә чиксез мәхәббәт мисаллары. 

16 февральдә Дәүләт Советы депутаты Евгений Солтанов Казанның Советлар Союзы Герое А.С. Умеркин исемендәге 116 нчы лицеенда парламент дәресендә катнашты. «Без үз каһарманнарыбызны истә тотарга, аларның зур  батырлыгы турында изге истәлекне хөрмәтләргә тиеш! Ата-бабаларыбызның тормышын җимергән коточкыч вакыйгаларның кабатлануына юл куймаска тиешбез!», – диде  Евгений Солтанов, мәктәп укучыларына мөрәҗәгать итеп.

16 февраль көнне Тәтеш районының Олы Тархан урта мәктәбендә муниципаль Совет депутаты Айсылу Дульдиева катнашында парламент дәресе узды. Укучылар ил тарихында дәүләт һәм җәмгыять тормышындагы мөһим мизгелләр белән бәйле төп даталарны һәм вакыйгаларны искә төшерделәр. Депутат укучыларны актив гражданнар булырга, инициатива күрсәтергә һәм җәмгыять үсешенә үз өлешләрен кертергә чакырды.

16 февральдә Торак сәясәте һәм инфраструктура үсеше комитеты рәисе Андрей Егоров Казан шәһәренең Идел буе районындагы 150 нче рус-татар мәктәбендә оештырылган парламент дәресендә катнашты.

Парламент дәресе – Дәүләт Советы, ТР Мәгариф һәм фән министрлыгы, Мәгарифне үстерү институтының уртак проекты, ул укучыларның сәяси-хокукый культурасын һәм актив гражданлык позициясен формалаштыруга ярдәм итә, 2009 елдан бирле уңышлы гамәлгә ашырыла, быел инде унсигезенче тапкыр үткәрелә. Быел парламент дәресләре ике атна дәвамында – 16-28 февраль көннәрендә уза, "Фидакарь хезмәт һәм хәрби батырлык белән Ватанны данлыбыз!" дип атала һәм Татарстанда игълан ителгән Хәрби батырлык һәм хезмәт фидакарьлеге елына багышлана.

Парламент дәресе кысаларында 2026 елның 2 февраленнән 31 мартына кадәр укучыларның иҗади эшләре (балалар рәсемнәре, иншалар, эсселар, видеороликлар, мәктәп проектлары һәм тикшеренү эшләре) һәм педагогларның методик эшләнмәләре конкурслары уза. Һәр конкурсны уздыру турындагы нигезләмәләр Татарстан Республикасы Мәгариф һәм фән министрлыгы боерыгы белән расланган. Конкурсларга йомгак, гадәттәгечә, апрельдә, Россия парламентаризмы көне алдыннан ясала. Бүләкләү тантанасы парламентта апрель аенда Россия парламентаризмы көне алдыннан уза.