Дәүләт Советы Рәисе, «Бердәм Россия»нең Татарстан  төбәк бүлеге Секретаре Фәрит Мөхәммәтшин  «Яңа гасыр»  телеканалында чыга торган «Бердәм Татарстан» һәм «Единый Татарстан» тапшыруларына биргән интервьюда  гражданнарның мөрәҗәгатьләре белән эшләүнең мөһимлеген билгеләп үтте. Программа «Бердәм Россия» Рәисе Д.А. Медведевның төбәк иҗтимагый кабул итү бүлмәсе, партиянең Татарстан төбәк бүлекчәсе, «Бердәм Россия»гә иҗтимагый ярдәм штабының Татарстандагы җирле иҗтимагый кабул итү бүлмәсе эше нәтиҗәләренә багышланган.

«Халыктан килгән мөрәҗәгатьләр белән эшләү – депутат эшчәнлегенең бик мөһим өлеше. Кешеләрне тыңлый һәм ишетә белү кирәк. Шулай эшләү күпчелек сайлаучыларның мәнфәгатьләрен чагылдыра торган законнар чыгарырга мөмкинлек бирә. Татарстан 2003 елда илдә беренчеләрдән булып  гражданнар мөрәҗәгатьләре турында закон кабул итте. Гражданнар һәм хезмәт коллективлары мөрәҗәгатьләре белән эшләү механизмы закон дәрәҗәсендә язылды. Монда барлык хакимият органнарында аларны карау тәртибе билгеләнгән, кабул итүләр регламенты төзелгән һәм вазыйфаи затларның җаваплылыгы билгеләнгән. Шул вакыттан бирле республикада һәр сишәмбе хакимиятнең барлык тармаклары һәм төрле дәрәҗәдәге җитәкчеләре гражданнарны шәхсән кабул итә торган кагыйдә кертелгән», – дип белдерде Фәрит Мөхәммәтшин.  

Ул әлеге системалы эшнең конкрет нәтиҗәләр бирүен әйтте. Узган ел Дәүләт Советына гына да ун меңнән артык мөрәҗәгать кергән. Аларның берсе дә игътибарсыз калмаган. Бу сайлаучыларның ышанычы турында сөйли.

«Дәүләт институтлары белән берлектә партия мәйданчыгы актив эшли. «Бердәм Россия» партиясе Рәисенең Татарстандагы төбәк иҗтимагый кабул итү бүлмәсе узган ел гына да җиде мең тирәсе мөрәҗәгатьне караган. Аларның өчтән икесе инде хәл ителгән. Бүген махсус хәрби операциядә катнашучыларга һәм аларның гаиләләренә, шулай ук яңа төбәкләрдә яшәүчеләргә ярдәм итүгә аерым игътибар бирелә. Бу – безнең принципиаль позиция һәм гомуми гражданлык бурычы, – дип басым ясады Фәрит Мөхәммәтшин.

Ул «Бердәм Россия»нең иҗтимагый ярдәм штабының эшен аерым билгеләп үтте.

«Ике ел эчендә без коммерциячел булмаган оешмаларны, республиканың актив, битараф булмаган халкын берләштергән яңа мәйданчык булдыра алдык. Бу уртак конструктив эшнең кешеләр өчен реаль, сизелерлек нәтиҗә бирүенең, республикада кире элемтәне ныгытуның һәм тормыш сыйфатын күтәрүнең ачык мисалы»,– дип басым ясады парламент башлыгы.

Төбәк иҗтимагый кабул итү бүлмәсендә мөрәҗәгатьләр турында тәфсилләбрәк сөйләделәр. Кергән мөрәҗәгатьләрнең тематикасы гамәлдәге социаль-икътисадый проблемаларның бөтен спектрын чагылдыра. Шул ук вакытта халыкны социаль тәэмин итү – 29,5%; мәгариф – 12,2%; торак-коммуналь хезмәтләр күрсәтү мәсьәләләре – 10,4% тәшкил итә.  2025 елда партиянең Татарстан төбәк бүлегенең җирле җәмәгать кабул итү бүлмәләренә 14,5 мең кеше мөрәҗәгать иткән, 6 меңнән артык гражданнарны  кабул итү уздырылган. Шулай ук «Минем депутат» системасының яңартылган версиясе дә эшли (DEPUTAT.TATAR). Бер ел эчендә аның аша кире шалтыратуга 2328 гариза кергән, шуларның 1783е аңлату характерында булган.

Җәмәгать кабул итү бүлмәләрендә кайнар линияләр, түгәрәк өстәлләр, бердәм федераль көн тәртибе булган тематик атналар оештырылган. Аларда социаль өлкәдәге актуаль мәсьәләләр: аналар һәм балалар, өлкән буын гражданнары, эшләүче гражданнар, СВОда катнашучыларның гаилә әгъзалары, сәламәтлек саклау, бакчачылык һәм торак-коммуналь хуҗалык өлкәләрендәге актуаль мәсьәләләр буенча фикер алышканнар. Бу чараларга «Ныклы гаилә», «Балалар спорты», «Өлкән буын», «Сәламәт киләчәк», «Яңа мәктәп», «Эшмәкәрлек», «Имин юллар» партия проектларының төбәктәге координаторлары да җәлеп ителгән.  «Депутат белән элемтәдә» проектында исә депутат чатка кергән гражданнарның сорауларына онлайн җавап бирә.

Россия юристлары ассоциациясенең региональ бүлеге белән берлектә оештырыла торган Бөтенроссия халыкка түләүсез юридик ярдәм күрсәтү көне кысаларында квартал саен адвокатлар, нотариуслар, ТР Юстиция министрлыгы, ТР Хезмәт, халыкны эш белән тәэмин итү һәм социаль яклау министрлыгы, Росреестр, РФ Пенсия фонды, ТР Конституция суды һәм техник инвентаризация бюросы хезмәткәрләре тарафыннан хокукый мәсьәләләр буенча гражданнар кабул ителә.

Партиянең төбәк иҗтимагый кабул итү бүлмәсе мәйданчыгында махсус хәрби операциядә  катнашучыларга һәм аларның гаилә әгъзаларына ярдәм итү өчен тәүлек буе кайнар линия эшли. Аларга телефон аша гына түгел, күчмә кабул итүләр, гаилә әгъзалары өчен психологик тренинглар, мобилизацияләнгән гражданнарның балалары өчен күңел ачу чаралары да күрсәтелә. Шулай ук ай саен  махсус хәрби операция барган  төрле нокталарга азык-төлек, шәхси гигиена чаралары, кием-салым һәм җиһазлар белән гуманитар йөк җибәрелә.

«Бердәм Россия»гә иҗтимагый ярдәм штабы берьюлы 43 социаль юнәлештәге проектлар буенча эш алып бара. 2025 елда штабта 2200 чара оештырылган, аларда 22,5 меңгә якын кеше катнашкан.