Дәүләт Советы депутатларының округларда эше дәвам итә. Бу атнада парламентарийлар гражданнарны кабул итте, республика муниципалитетларындагы социаль учреждениеләрдә булды һәм сайлаучылар белән очрашты. 

16 февральдә Дәүләт Советы депутаты Руслан Нигъмәтулин Яр Чаллы шәһәре муниципаль Советы сессиясендә катнашты. Утырыш башланыр алдыннан Чаллы предприятиеләре һәм оешмалары күргәзмәсендә кунакларга «Акыл» мәгариф инкубаторын тәкъдир итте. Ул Гали Акыш исемендәге 84 нче лицейда депутат Руслан Нигъмәтулин, «Фән фабрикасы» компаниясе һәм муниципалитет ярдәме белән оештырылган. Анда шөгыльләнүчеләр чарада катнашучыларга үзләренең тикшеренүләрен һәм эшләнмәләрен күрсәттеләр. 12 яшьлек Елисей Килин термоядер реакторы – электр җитештерү өчен җайланманың прототибын тәкъдим итте.

13 февральдә Бюджет, салым һәм финанс комитеты рәисе Леонид Якунин эш сәфәре белән Кама Тамагы районына барды, анда ул район Советының хисап утырышында катнашты. Утырыш башланыр алдыннан чакырылган кунаклар районның крестьян-фермер хуҗалыклары, предприятиеләре, оешмалары, мәктәп укучылары, халык осталары продукциясе күргәзмәсен карадылар. Муниципаль район башлыгы Наил Вазыйхов Кама Тамагы районының 2025 елгы социаль-икътисади үсеш нәтиҗәләре һәм 2026 елга бурычлар турында чыгыш ясады. Леонид Якунин кыскача гына Татарстан казанышлары турында сөйләде һәм сессиядә катнашучыларга гамәлдәге дәүләт программалары турында хәбәр итте. Чара азагында район үсешенә зур өлеш керткән атказанган хезмәтчәннәрне хөрмәтләделәр. Леонид Якунин Дәүләт Советы Рәисенең Рәхмәт хатларын тапшырды. 

16 февральдә Икътисад, инвестицияләр һәм эшмәкәрлек комитеты рәисе Рәгать Хөсәенов эш сәфәре белән Баулы районында булды. Депутат, район башлыгы Ильяс Гозәеров белән бергә, Покровский Урустамак авылында яшәүче тыл ветераны, педагог һәм туган якны өйрәнүче Алексей Пронинны 97 яшь тулу белән котлады һәм аңа ныклы сәламәтлек, иминлек һәм озын гомер теләде, шулай ук ветеранга истәлекле бүләкләр тапшырылды. Шул ук көнне ул гражданнар җыенында катнашты, анда ул җирлек халкын социаль нәтиҗәләр белән таныштырды.

18 февральдә Мәгариф, мәдәният, фән һәм милли мәсьәләләр комитеты рәисе Айрат Зарипов эш сәфәре белән Югары Ослан районына барды, анда ул муниципаль район Советының хисап утырышында катнашты.

19 февральдә Дәүләт Советы Секретаре Лилия Маврина «Бердәм Россия» партиясе Рәисе Дмитрий Медведевның төбәк иҗтимагый кабул итү бүлмәсендә гражданнарны кабул итте. Депутатка Казан шәһәренең Латыш укчылары урамындагы 8 А йортта яшәүчеләр торак-коммуналь хуҗалыкка һәм төзекләндерүгә, ә нәкъ менә каты коммуналь калдыкларны вакытында чыгармау һәм су суыртуга кагылышлы сораулар белән мөрәҗәгать иттеләр. Кабул итү вакытында халык Лилия Мавринадан 2043 елга планлаштырылган су агызу системасын капиталь ремонтлау чиратын күчерергә ярдәм итүен сорады.  "Халыкның срокларны иртәрәк чорга күчерү теләге дөрес. Бу мәсьәләләрне шәхси контрольгә алам", – диде Лилия Маврина.

18 февральдә Законлылык һәм хокук тәртибе комитеты рәисе Александр Чубаров һәм Дәүләт Советы депутаты Фоат Вәлиев Спас районы Советының хисап утырышында катнаштылар, анда 2025 елга территориянең социаль-икътисади үсешенә нәтиҗә ясалды һәм 2026 елга бурычлар билгеләнде. Төп доклад белән Спас районы башлыгы Роман Исланов чыгыш ясады. Ул билгеләп үткәнчә, 2025 ел нәтиҗәләре буенча район Татарстанның социаль-икътисади үсеше рейтингында 42 нче урынны алган. Тулай территориаль продукт күләме 9 млрд 693 млн сум дип бәяләнә, бу 2024 ел дәрәҗәсеннән 9,2 процентка югарырак. Инвестицияләр 2 млрд сумнан артып киткән, сәнәгать җитештерүе индексы 104% тәшкил итте. Туризм район үсешенең төп юнәлешләреннән берсе булып кала. Төп тарту ноктасы – Болгар музей-тыюлыгы. 2025 елда районда 736 мең турист булган: 292 «Метеор» тизйөрешле судносы, 164 теплоход һәм 2 036 автобус килгән. 2024 ел белән чагыштырганда туристлар агымы кимүгә карамастан, хакимият ял көне турлары һәм вакыйгалы туризм хисабына үсешкә өметләнә.

19 февральдә Дәүләт Советы депутаты Андрей Ляпунов Чаллыда 48/11 йортта яшәүчеләр белән очрашты, анда су белән тәэмин итү системасының сыйфаты мәсьәләсе кискен тора. Депутат район хакимияте вәкилләре белән очрашу барышында су белән тәэмин итү системаларының торышын тикшерү максатында күпфатирлы йортның подвалларын карап чыкты. 2027 елга план буенча йортка капиталь ремонт ясау планлаштырылган.