Бүген Дәүләт Советы Секретаре Лилия Маврина Казанның 125 нче гимназиясенең 9 һәм 11 сыйныф укучылары өчен парламент дәресе үткәрде. 

Укучылар республика хакимиятенең закон чыгару органы эшчәнлеге белән таныштылар һәм «Фидакарь хезмәт һәм хәрби батырлык белән Ватанны данлыйбыз!» дип аталган парламент дәресендә катнаштылар.

Укучыларга мөрәҗәгать итеп, Лилия Маврина Россия халыклары бердәмлеге елында һәм Татарстанда игълан ителгән Хәрби батырлык һәм хезмәт фидакарьлеге елында парламент дәресенең «Фидакарь хезмәт һәм хәрби батырлык белән Ватанны данлыйбыз!» дип аталуы символик мәгънәгә ия булуына басым ясады.

«Без фидакарь хезмәтебез һәм сугышчан батырлыгыбыз белән Ватаныбызны данлыйбыз дигәндә, һәрберебез республикабыз үсешенә үз өлешебезне кертергә, һөнәри эшчәнлегебездә уңышларга ирешергә сәләтле, дип ышанабыз, – дип ассызыклады Лилия Маврина. – Депутат буларак безнең бурыч җәмгыятебез һәм гражданнарыбыз өчен файдалы законнар кабул итүдән гыйбарәт. Ә сезнең бурыч — алга таба беренче класслы белгечләр булу һәм дәүләткә мөмкин кадәр файда китерү өчен яхшы уку».

Парламент дәресендә сүз патриотизм һәм Ватанга хөрмәт, ил белән идарә итүдә һәр гражданның роле, законнар эшләү һәм кабул итү процессы, шулай ук халык сайлаган депутатларның эш үзенчәлекләре турында барды.

Лилия Маврина Дәүләт Советының закон чыгару эшчәнлеге, профильле комитетлар һәм комиссияләр, фракцияләр һәм депутат төркемнәре эше турында сөйләде. Ул халыкның тормыш сыйфатын күтәрү өлкәсендә хокукый гарантияләр тәэмин итүдә республика парламентының зур ролен ассызыклады. 

Парламент дәресеннән соң 125 нче гимназия укучылары парламент бинасы буйлап экскурсия үткәрделәр.