Бүген Казанда «Ливадия-Татарстан» шифаханәсе базасында профсоюзларының «Татарстан хатын-кызларының хезмәт батырлыгы» III республика форумы узды. Чарада РФ ФС Дәүләт Думасының Гаилә, хатын-кызлар һәм балалар мәсьәләләре комитеты әгъзасы Татьяна Ларионова, Дәүләт Советы депутатлары, «Мәрхәмәт-Милосердие» хатын-кыз депутатлар берләшмәсе әгъзалары Ольга Воронова һәм Елена Кузьмичева катнашты. 

Профсоюзларының «Татарстан хатын-кызларының хезмәт батырлыгы» III республика форумында катнашучыларны уртак максат  берләштерде – Татарстан хатын-кызларының төбәк икътисадына керткән өлешен ассызыклау һәм хатын-кызларга төрле чорларда күрсәткән батырлыклары өчен рәхмәт белдерү», – дип билгеләп үтте Дәүләт Советы депутаты, ТР Профсоюзлар федерациясе рәисе Елена Кузьмичева. Ул Татарстан хезмәтчәннәренә республика икътисады һәм мәдәнияте үсешенә керткән өлешләре өчен рәхмәт белдерде, тарихи вакыйгаларда хатын-кызларның әһәмиятле роле турында сөйләде, форумда катнашучыларга тормышның барлык өлкәләрендә дә иминлек теләде.

Татьяна Ларионова гаиләләргә һәм аналарга ярдәм йөзеннән кабул ителгән законнар турында сөйләде, хатын-кызларның социаль статусын күтәрү һәм гаилә институтын ныгыту мәсьәләләренә кагылды, хатын-кыз хезмәткәрләрнең тигез мөмкинлекләрен тәэмин итүдә профсоюзларның һәм Хөкүмәтнең хезмәттәшлек перспективаларын билгеләде, хатын-кызларның төрле өлкәләрендәге казанышларын билгеләп үтте. «Россия гаиләләренә ярдәм итү дәүләт сәясәтенең үзәк юнәлеше булып кала, – дип белдерде Татьяна Ларионова. – Соңгы елларда гаиләләргә, аналарга һәм балаларга ярдәм йөзеннән күп кенә яңа законнар кабул ителде, бу сезнең тәкъдимнәрегез, моның өчен мин сезгә рәхмәтлемен».  

Социаль гарантияләрне үстерү һәм Татарстан хатын-кызларының тормыш сыйфатын яхшырту буенча закон чыгару инициативалары турында Социаль сәясәт комитеты рәисе урынбасары Ольга Воронова сөйләде. «ТР Дәүләт Советының «Мәрхәмәт-Милосердие» хатын-кыз депутатлар берләшмәсе махсус хәрби операциядә катнашучыларның гаиләләренә ярдәм итү мәсьәләләре белән шөгыльләнә, бу темага төрле түгәрәк өстәлләр, веб-семинарлар үткәрәбез, гаиләләр белән очрашабыз. Бу бүген дәүләт алдында торган төп бурыч. Без махсус хәрби операция ветераннары өчен эш урыннарын резервлау, хезмәт ветераннарына ярдәм итү, социаль гарантияләрне арттыру һәм башкалар турында закон кабул иттек», – дип белдерде Ольга Воронова.

Форумда заманча хезмәт базары шартларында ана булуга, бала тәрбияләүгә һәм хатын-кызларны эшкә урнаштыруга юнәлдерелгән программалар тәкъдим ителде. БДБ илләренең профсоюз берләшмәләреннән катнашучы коллегалар эш тәҗрибәсе белән уртаклаштылар. Узган буын тәҗрибәсен хәзерге заман чынбарлыгына интеграцияләүгә, патриотизмны һәм Татарстан традицияләренә хөрмәтне ныгытуга аерым игътибар бирелде.

Эшләүче хатын-кызларның III Республика форумы эшендә Татарстанның күп кенә муниципалитетларыннан профсоюз лидерлары һәм активистлары, профильле министрлыклар һәм ведомстволар вәкилләре катнашты. 

Форум кысаларында махсус хәрби операция зонасына республиканың профсоюз хәрәкәте ярдәмендә җыелган гуманитар йөкнең чираттагы партиясе җибәрелде. Йөк составында – «СВО геройлары өчен җылылык» акциясе кысаларында хатын-кызлар –профсоюз әгъзалары тарафыннан бәйләнгән җылы киемнәр, азык-төлек, дарулар, генераторлар, рацияләр һәм башкалар.