Дәүләт Советы депутатларының округларда эше дәвам итә. Бу атнада парламентарийлар гражданнарны кабул итте, социаль учреждениеләрдә булды һәм сайлаучылар белән очрашты. 

13 мартта Социаль сәясәт комитеты рәисе Алексей Созинов Дәүләт Советында гражданнарны кабул итте. Депутатка Ютазы районының Урыссу бистәсендә яшәүче кеше эшкә урнашуда ярдәм сорап мөрәҗәгать итте. Казанның 124 нче мәктәбенең тарих укытучысы Лилия Гыймадиева депутатка торак мәсьәләсе буенча килгән иде. Ул алты ел элек Тәтештән Казанга күчеп килгән. Хәзерге вакытта арендага алынган фатирда яши. Аның соравы социаль найм шартнамәсе буенча торак алуга һәм педагоглар өчен торак сертификатларын рәсмиләштерү тәртибенә кагыла. Алексей Созинов барлык сорауларны эшкә алды.

13 мартта Дәүләт Советы депутаты Фәнис Нурмөхәммәтов «Бердәм Россия» партиясе Рәисе Дмитрий Медведевның төбәк иҗтимагый кабул итү бүлмәсендә гражданнарны кабул итте. Аңа казанлылар кар чыгару, юлларны ремонтлау һәм Совет районындагы «Триумф» торак комплексында мәктәп төзү мәсьәләләре буенча мөрәҗәгать итте.  

11 мартта Социаль сәясәт комитеты рәисе урынбасары Ольга Воронова «Бердәм Россия» партиясе Рәисе Дмитрий Медведевның төбәк иҗтимагый кабул итү бүлмәсендә гражданнарны кабул итте.  Мөрәҗәгать итүчеләрнең сораулары сәламәтлеге мөмкинлекләре чикләнгән гаиләләргә ташламалар бирү, күп балалы гаиләләргә җир кишәрлеге бирү, шифаханәләргә юллама алу, шулай ук тернәкләндерү өчен техник чаралар алу, табибларга язылу һәм шәһәрнең сәяси иҗтимагый тормышында катнашуга кагылды. Ольга Воронова барлык мөрәҗәгатьләрне эшкә алды.

11 мартта Дәүләт Советы депутаты Рияз Комаров Зәй районының Чыбыклы һәм Поручик авыл җирлекләреннән махсус хәрби операциядә катнашучыларның һәм активист-волонтерларның әниләре өчен Әлмәт шәһәренең «Алсу» оек-оекбаш фабрикасына экскурсия оештырды. Кунакларга продукция җитештерү процессын күрсәттеләр.  Алар осталарның эшен һәм заманча җиһазларны күрә алдылар. Чара өйдә пешкән ризыклар белән тәмләп чәй эчү белән тәмамланды.  «Мондый очрашулар – уллары бүген Ватан сагында торган һәм көн саен фронтка тылдан торып ярдәм иткән изге күңелле, көчле рухлы хатын-кызларга рәхмәт әйтү мөмкинлеге.  Бу матур язгы көндә аларга аз гына булса да җылылык һәм игътибар бирә алуыбызга шатмын», –  диде Рияз Комаров.

10 мартта Социаль сәясәт комитеты рәисе урынбасары Ольга Воронова Татарстан Республикасы спорт министрлыгында физик культура, спорт һәм яшьләр сәясәте мәсьәләләре буенча эшче төркем утырышында катнашты. Дәүләт Думасы депутаты Рөстәм Кәлимуллин рәислегендә узган утырышта республиканың федераль программаларда һәм проектларда катнашу механизмнарын карадылар, шулай ук спорт инфраструктурасын үстерүгә, массакүләм спортка ярдәм итүгә һәм яшьләр инициативаларын гамәлгә ашыруга юнәлдерелгән финанслауның перспектив юнәлешләре турында фикер алыштылар. «Федераль финанслауны җәлеп итү эше профильле федераль ведомстволар белән тыгыз элемтәдә алып барыла һәм Татарстан Республикасында спорт тармагын һәм яшьләр сәясәтен алга таба үстерүгә юнәлдерелгән», – дип белдерде Ольга Воронова.

10 мартта Дәүләт Советы депутаты Фәнис Нурмөхәммәтов Казанның Яңа Савин районында гражданнарны кабул итте. Воровский исемендәге коммерцияле булмаган бакчачылык ширкәтендә яшәүчеләр депутатка шикаять белән мөрәҗәгать иттеләр. Бакчачылар үзләренең торак участоклары янында машина юу төзелеше алып барылуына  борчылуларын белдерделәр, алар бу төзелешне законсыз дип саныйлар. Депутат мәсьәләне үз контроленә алды.

6 мартта Казан инновация университетында махсус хәрби операциядә катнашучылар һәм «Ярдәм янәшә! Помощь рядом!» республика хәрәкәте активистлары белән очрашу булды. Чара Законлылык һәм хокук тәртибе комитеты рәисе урынбасары Ринат Фазылов катнашында узды. Очрашу кунаклары студентларга хәрбиләр һәм волонтерлар тормышыннан реаль хәлләр сөйләделәр. «Ачык һәм ихлас сөйләшү булды,  яшьләр чын геройларның безнең арада булуына, батырлык, фидакарьлек, гаиләгә һәм Ватанга мәхәббәтнең чын патриотны аерып торучы сыйфатлар булуына тагын бер кат инандылар», – дип билгеләп үтте Ринат Фазылов.

6 мартта Дәүләт Советы депутаты Олег Николаев Яр Чаллыда яшәүче Татьяна Минееваны 100 яшьлек юбилее белән котлады. Татьяна Фомовна Минзәлә районының Кадрәк авылында туа. Бөек Ватан сугышы елларында туган колхозында хезмәт итә, гомуми эшкә үз өлешен кертә. Сугыштан соң гаилә кора, сатучы, ә аннары совхозда кассир булып эшли. 1977 елда Яр Чаллыга күчеп килә, пенсиягә чыкканчы сәүдә өлкәсендә эшли. Татьяна Фомовна дүрт бала үстергән, бүген аның зур һәм тату гаиләсе – 7 оныгы, аларның 7 баласы һәм 2 дүртенче буын оныгы бар. Депутат юбилярга бүләкләр тапшырды,  аңа нык сәламәтлек, күңел җылысы, туганнарының һәм якыннарының кайгыртуын тоеп яшәвен теләде.