Россия Федерациясе Федераль Собраниесе Дәүләт Думасы Рәисе урынбасары Алексей Гордеев һәм Татарстан Дәүләт Советы Рәисе вазыйфаларын башкаручы Марат Әхмәтов «Казан» агросәнәгать паркында булдылар. Марат Әхмәтов Россия парламенты түбән палатасы вице-спикерына республиканың авыл хуҗалыгы потенциалы турында сөйләде.

 «Казан» агросәнәгать паркы  – авыл хуҗалыгы җитештерүчеләре һәм фермерлар өчен төзелгән беренче күпфункцияле комплекс, алар анда үз продукцияләрен тәкъдим итә һәм сата ала, ә республика халкы табигый һәм сыйфатлы азык-төлекне чагыштырмача арзан бәядән  сатып ала. 2013 елда (эшләтеп җибәрү чорында) агросәнәгать паркы Россия өчен сынау проекты булды.

Бүген биредә авыл хуҗалыгы җитештерүчеләре һәм сатып алучылар өчен кирәкле барлык инфраструктура булдырылган. Бер мәйданчыкта арадашчылардан башка гына «кырдан киштәгә кадәр» бердәм технологик чылбыр гамәлгә ашырылган. Бер түбә астында, 50 мең кв. м. территориядә (паркның гомуми мәйданы - 8,5 га) 257 резидент эшли, 800дән артык эш урыны булдырылган. Сәүдә залларының гомуми мәйданы – 14 мең кв.м. кв. м, 440 сәүдә урынын сыйдыра.  Моннан тыш ярминкә мәйданы да эшли. Җитештерү зонасы 6,5 мең кв. м. кв. м. алып тора,  анда 18 эшкәртү цехы урнашкан. Атна саен барлык продукциягә ветеринария тикшеренүләре үткәрелә. 

Алексей Гордеев сатучылар һәм сатып алучылар белән аралашты, тәкъдим ителгән товарларның ассортиментын бәяләде, сәүдә залларын һәм җитештерү цехларын карады.

Исегезгә төшерәбез, Алексей Гордеев эш сәфәре белән Казанда, аның төп максаты –  Россия крестьян (фермер) хуҗалыклары һәм авыл хуҗалыгы кооперативлары ассоциациясенең Бөтенроссия XXXVII съезды эшендә катнашу, ул иртәгә Казанда узачак.