Бүген В.М.Лебедев исемендәге Россия дәүләт юстиция университетының Казан филиалы студентлары – «Дәүләт Думасы моделе» эшлекле уенында катнашучылар һәм лауреатлар Дәүләт Советында булдылар. Закон чыгару конкурсында 8 команда катнашкан, яшьләр федераль законнарга төзәтмәләр проектларын эшләгәннәр. Булачак юристлар белән Социаль сәясәт комитеты рәисе урынбасары Ольга Воронова һәм Законлылык һәм хокук тәртибе комитеты рәисе урынбасары Ринат Фазылов очрашты.

Социаль сәясәт комитеты рәисе урынбасары Ольга Воронова, студентларны сәламләп, яшьләрнең гражданлык аңын формалаштыруда мондый инициативаларның мөһимлеген билгеләп үтте. «Дәүләт Советы – ул депутатлар сессияләрдә караган һәм аннары Татарстан Рәисе имзалаган закон проектлары эшләнә һәм экспертиза уза торган орган. Закон проектлары республикабызның барлык тармакларына кагыла. Биредә бюджет раслана, социаль сәясәт нигезләре формалаша», – дип белдерде Ольга Воронова.

Ольга Воронова Социаль сәясәт комитеты алып барган эш турында сөйләде һәм «Балигъ булмаганнарның күзәтүчесезлеген һәм хокук бозуларын профилактикалау системасы нигезләре турында» федераль законга төзәтмәләр кертү буенча иң яхшы эшләрнең авторларына бүләкләр тапшырды.

Студентларны сәламләп, Ринат Фазылов Законлылык һәм хокук тәртибе комитеты эше турында сөйләде. «Бу иң күп санлы комитет, бездә 8 депутат, өчесе даими (профессиональ) нигездә эшли. Аларның берсе – депутат Эдуард Шәрәфиев инде бер ел махсус хәрби операция уздыру зонасында, – дип сөйләде Ринат Фазылов. – Узган ел без 16 утырыш үткәрдек. Законлылык һәм хокук тәртибе комитеты шөгыльләнә торган мәсьәләләр аның исеменнән күренә – бу иҗтимагый куркынычсызлыкны саклау, гражданнарның хокукларын яклау, коррупциягә каршы көрәшкә һәм миграция сәясәтенә игътибар бирелә. Моннан тыш, безнең Комитет аша җәмәгать судьялары составы формалаша».

Ринат Фазылов шулай ук студентлар сайлаган һөнәрнең кешеләр иминлегенә кагылышлы актуаль мәсьәләләрне хәл итү өчен бик мөһим булуын билгеләп үтте. «Сез дөрес һәм кирәкле белгечлек сайлагансыз. Белемле һәм квалификацияле юристлар Һәрвакыт кирәк», – дип ассызыклады Законлылык һәм хокук тәртибе комитеты рәисе урынбасары.

Студентлар өчен шулай ук Дәүләт Советы буенча экскурсия үткәрелде, алар Парламент үзәгендә, Татарстан парламентаризмы музеенда һәм китапханәдә булдылар.