Бүген Бәшир Рәмиев исемендәге ИТ-паркта Бильярд спорты буенча Татарстан Республикасы Рәисе Кубогына III халыкара ярышлар башланды. Ярышлар Дөнья Кубогының беренче этабы булып тора. Дөнья рейтингының иң көчле 80 спортчысы ир-атлар һәм хатын-кызлар арасында «Ирекле пирамида» («Свободная пирамида») дисциплинасында көч сынашачак. Катнашучыларны республика җитәкчелеге исеменнән Дәүләт Советының Мактаулы Рәисе Фәрит Мөхәммәтшин сәламләде.

Соңгы елларда бильярд спортының абруе, Фәрит Мөхәммәтшин әйтүенчә, илдә дә, халыкара аренада да ныгыган. Хәзерге вакытта ул Олимпия уеннарына кермәгән спорт төрләре арасында алдынгы урынны алып тора.

«Бильярд спорты буенча Татарстан Рәисе Кубогына өченче халыкара ярышлар Россиядән генә түгел, якын һәм ерак чит илләрдән дә  танылган бильярд осталарын җыйды. Республикада спортның барлык төрләрен, шул исәптән бильярдны да яраталар. Бильярд өстәле артына дуслар һәм партнерлар гына җыела. Безнең республикада 175 милләт вәкиле дус һәм тату яши, һәм без аларның һәркайсын үзе яраткан спорт төренә тартырга тырышабыз», – дип белдерде Дәүләт Советының Мактаулы Рәисе.

Фәрит Мөхәммәтшин шулай ук ватандашыбыз, атказанган спорт мастеры Диана Миронованың югары казанышларын билгеләп үтте. Ул беренче һәм бердәнбер абсолют дөнья чемпионы, шулай ук рус бильярды тарихында иң титуллы бильярдчы, хатын-кызлар арасында да, ир-атлар арасында да. «Галиҗәнап бильярдны данлаучы кешеләр күп. Казандагы бүгенге очрашулар да бу спорт төренә игътибарны тагын да күбрәк җәлеп итәчәк», – дип басым ясады ул.

Фәрит Мөхәммәтшин ярышларда катнашучыларга мөрәҗәгать итеп, Татарстанның илдә спортны үстерү буенча лидерларның берсе статусын саклавына игътибар юнәлтте: халыкның өчтән ике өлеше даими рәвештә спорт белән шөгыльләнә – якынча 2,4 млн кеше. Шулай ук республикада планлы рәвештә инфраструктура ныгытыла: узган елда 133 спорт корылмасы төзелгән. Республика, милли чемпионатларны да кертеп, 70 тән артык эре ярышны кабул иткән. «Республикада моның кадерен беләләр, бу халкыбызны берләштерә, татарстанлыларның сәламәтлеген ныгыта», – дип ассызыклады Дәүләт Советының Мактаулы рәисе.

Фәрит Мөхәммәтшин спортчыларга сәламәтлек, матур уеннар һәм якты җиңүләр теләде.

Фәрит Мөхәммәтшин шулай ук турнир башлану уңаеннан пирамидага беренче символик һөҗүм ясады. 

Ярышларны ачу тантанасында халыкара Пирамида комитеты генераль секретаре Яков Фирсов республика җитәкчелегенең, Татарстан Спорт министрлыгының һәм Бильярд спорты федерациясенең Россиядә бильярд үсешенә керткән зур өлешләрен билгеләп үтте. «Татарстан Рәисенә ул безгә бүләк иткән бәйрәм өчен ихлас рәхмәтемне белдерәсем килә. Биредә «пирамида» уйнаучы дөньяның иң яхшы спортчылары җыелган. Бу турнир рус бильярды үсешенең чираттагы этабы булыр дип ышанам. Татарстанда үзеңне өйдәге кебек хис итәсең», – дип  басым ясады Яков Фирсов.

Бильярд спорты буенча Татарстан Рәисе Кубогына халыкара ярышлар бишенче апрельгә кадәр дәвам итәчәк. Турнирда Россия, Әрмәнстан, Беларусь, Казахстан һәм Үзбәкстан спортчылары катнаша. Турнирда катнашучылар арасында – атказанган спорт мастерлары Никита Володин, Диана Миронова, Никита Ливада. Турнирда Татарстаннан Диана Миронова, Элина Горыславец, Сергей Горыславец, Эйнар Җамалиев, Максим Кочкин, Юрий Шишонин һәм Илья Старосельский катнаша.

2024 елда Диана Миронова (Татарстан) һәм Артем Балов (ХМАО-Югра) Рәис Кубогын яуладылар, узган ел турнирны кабат Диана Миронова (Татарстан) отты. Шулай ук Андрей Карасов (Пермь крае) җиңүче булды.