Татарстан Республикасы Министрлар Кабинетының 2025 елдагы эшчәнлеге нәтиҗәләре турында хисап Дәүләт Советы утырышында каралды. Әлеге мәсьәлә буенча төп доклад белән республика Премьер-министры Алексей Песошин чыгыш ясады.

Премьер-министр Хөкүмәт хисабының һәм комитетлардан, депутат берләшмәләреннән килгән мәсьәләләр буенча мәгълүматның Дәүләт Советы комитетлары утырышларында җентекләп каралуын билгеләп үтте. «Санкцион басым һәм башка күпсанлы чакырулар шартларында илебез очраша торган заманча чынбарлыкны исәпкә алып әйткәндә, Татарстан Республикасы Рәисе Рөстәм Миңнеханов җитәкчелегендәге Оператив штаб, Сезнең белән бергә, хөрмәтле депутатлар, федераль министрлыклар белән бергә системалы чаралар күрү эшен дәвам итте, – дип белдерде Алексей Песошин.  – Булган ресурслар республиканың социаль-икътисадый үсешенең өстенлекле юнәлешләренә җәлеп ителде. Нәтиҗәдә, катлаулы вәзгыятькә карамастан, икътисадта уңай динамика сакланып калды».

Татарстан Премьер-министры 2025 елда республиканың социаль-икътисади үсешенең төп күрсәткечләренә тукталды. Тулай төбәк продукты 5 трлн 730 млрд сумга җиткән. Төяп җибәрелгән продукция күләме 6 трлн сумнан артып китсә, сәнәгать җитештерүе индексы 109,9% тәшкил иткән. Төп өлешне эшкәртү производстволары тәэмин иткән. Төп капиталга инвестицияләр 1,6 трлн сумнан артып киткән, аның яртысы диярлек эшкәртү производстволарын үстерүгә юнәлдерелгән.

Алексей Песошин билгеләп үткәнчә, республикада төзелеш эшләренең югары күләме саклана. 3,5 млн кв. метрдан артык торак файдалануга тапшырылган. Капремонт программасы буенча 882 күпфатирлы йорт ремонтланган. Республикада яшәүче 200 меңнән артык кешенең торак шартлары яхшырган.

Алексей Песошин коммуналь инфраструктураны модернизацияләү мәсьәләләренә аерым тукталды. Реконструкция темпларын арттыру өчен, тариф чыганаклары хисабына формалаштырыла торган инвестиция программалары акчалары белән беррәттән, коммуналь инфраструктураны модернизацияләүгә федераль һәм республика программалары буенча өстәмә рәвештә 12,6 млрд сум бүлеп бирелгән, шуларның 10 млрд сумы республика бюджетыннан. 419 км инженерлык челтәре, 25 су башнясы, 15 канализация-насос станциясе, 2 биологик чистарту корылмасы, 7 котельный алмаштырылган.

Авыл хуҗалыгы мәсьәләләренә килгәндә, узган елда республикада аграрийларга  ярдәм чараларына якынча 16,7 млрд сум юнәлдерелгән.

Барлык тармаклар үсешенә кече һәм урта бизнес предприятиеләре дә зур өлеш кертә. Тулай төбәк продуктында аларның өлеше 24,3% дип бәяләнә. Бу секторга ташламалы кредитлар аша ярдәм итү чаралары, гарантияле оешмалар ярдәме ел йомгаклары буенча әйләнешне һәм салым керемнәрен, эш белән тәэмин ителгәннәр өлешен һәм предприятиеләр санын арттырырга мөмкинлек биргән. Икътисадның өстенлекле тармакларында компанияләр саны арткан.

Хөкүмәт хисабы белән тулырак әлеге сылтама буенча танышырга мөмкин.

Хөкүмәт хисабы депутатлар тарафыннан сораулар тудырды. Николай Атласов Россия һәм Татарстан хөкүмәтләренең норматив документларына сыешмый торган тариф исәпләүләренә каршы тору өчен республикада нинди системалы чаралар күреләчәге белән кызыксынды. «Тарифларны индексацияләү – көзге-кышкы җылыту чорын авариясез узу мөмкинлеген дә, халыкны кирәкле ресурслар белән тәэмин итүне дә тәэмин итәргә тиешле кирәкле процесс. 2026 елда бу тарифлар үсеше 13,4% ка артмаячак 840 муниципаль берәмлеккә кагылачак. 73 муниципаль берәмлектә 4,8% ка артыграк булачак. Үсеш нәкъ менә шундый, аны Хөкүмәт карары буенча кире кагарга мөмкин», – дип белдерде Алексей Песошин.

Депутат Елена Кузьмичева күп балалы гаиләләр өчен җир кишәрлекләрен инженер һәм транспорт инфраструктурасы белән тәэмин итү мәсьәләсе  белән кызыксынды. «Рөстәм Миңнеханов карары буенча Татарстанда 2025 елдан инфраструктурага 1 млрд сум бүлеп бирелә. 500 млн сум – су белән тәэмин итү челтәренә, 500 млн сум – юлларга. Мәсәлән, 2025 елда 5 су белән тәэмин итү объекты тәртипкә китерелгән, бу 103 км чамасы. 23 км юл ремонтланган. 2026 елга да шул ук күләмнәр саклана. Җир кишәрлекләренә кытлык булган урыннарда гаиләләр инициативасы буенча акчалата компенсация түләнә. 1 апрельгә 277 гаилә әлеге чараны сайлаган», – дип сөйләде Татарстан Премьер-министры.

Фикер алышу барышында депутат Руслан Йосыпов республикада ятим балалар арасында торак алу чираты белән кызыксынды. Роза Гайнетдинова хөкүмәт тарафыннан бәяләр үсешен тоткарлау буенча нинди чаралар күрелүен сорады, Азат Хамаев сукбай этләр өчен приютлар ачу,  ә Илдар Шамилов төбәк юлларын интеллектуаль транспорт системасы белән тәэмин итү темасын күтәрде.

Дәүләт Советы Рәисе вазыйфаларын башкаручы Марат Әхмәтов, Татарстан Министрлар Кабинеты эшчәнлеге нәтиҗәләре турында хисап буенча фикер алышуга йомгак ясап, 2025 елда хөкүмәт тарафыннан илкүләм проектларны, федераль һәм республика программаларын гамәлгә ашыру тәэмин ителүен билгеләп үтте. «Махсус хәрби операциядә катнашучыларга һәм аларның гаилә әгъзаларына ярдәм чараларын да кертеп, барлык социаль йөкләмәләр тулы күләмдә үтәлгән. Җиңүнең 80 еллыгы, шулай ук Россиядә һәм Татарстанда Ватанны саклаучылар елы кысаларындагы чаралар, халыкара форумнар, республика Рәисен сайлаулар уңышлы уздырылды. Шулай ук перспективага төп өстенлекләр билгеләнде. Безнең депутатлар корпусы агымдагы һәм алдагы еллардагы бурычларны гамәлгә ашыру өчен Хөкүмәт янәшәсендә булырга әзер», – дип басым ясады Марат Әхмәтов.