Авылда яшьләр сәясәтен гамәлгә ашыру һәм кече шәһәрләрдә һәм авыл җирлекләрендә яшәүче яшьләрнең ялын оештыру мәсьәләләре бүген Йошкар-Ола шәһәрендә (Марий Эл Республикасы) узган Идел буе федераль округының Россия Федерациясе субъектлары дәүләт хакимияте закон чыгару органнары каршындагы Яшьләр парламентлары ассоциациясе утырышында каралды. Татарстан Дәүләт Советы каршындагы Яшьләр парламенты рәисе Дамир Нургалиев республиканың бу өлкәдәге тәҗрибәсе һәм гамәлгә ашырыла торган проектлар турында сөйләде. 

Аерым алганда, Дамир Нургалиев Татарстанда гамәлгә кертелә торган «Презентацияләр конструкторы» проекты турында сөйләде, ул авыл яшьләренең муниципаль, төбәк, округ һәм федераль дәрәҗәдәге проектларны гамәлгә ашыруда катнашу мөмкинлекләрен киңәйтә. «Татарстан Яшьләр парламенты командасы округның Яшьләр парламентлары ассоциациясе ярдәмендә авыл волонтерлары, иреклеләр һәм җәмәгать эшлеклеләре өчен презентацияләр һәм үзпрезентацияләр конструкторын эшли башлады, алар конкурсларда катнашалар һәм заявкалар рәсмиләштерәләр, – дип билгеләп үтте республиканың Яшьләр парламенты башлыгы. – Бу конструктор «Иң яхшы ирекле», «Ел студенты», «Иң яхшы җәмәгать эшләрен башкаручы» һәм башка конкурсларга презентация формалаштырырга мөмкинлек бирә».     

Дамир Нургалиев ассызыклаганча, тәҗрибә күрсәткәнчә, авыл яшьләренең «шәп» гамәли кейслары, теге яки бу бурычларны яхшы һәм сынап каралган хәл итү юллары күп җыелган булса да, аларны яшьләр үзләре яши торган урыннарда гамәлгә ашырсалар да, үз идеяләрен һәм проектларын экспертлар алдында тиешенчә «төреп» чыгара алмыйлар, шуның аркасында конкурсларда бик үк отышлы күренмиләр.

«Без яшьләр белән сөйләштек һәм бу проблемалы ноктаны ачыкладык, – дип ассызыклады Татарстан Дәүләт Советы каршындагы Яшьләр парламенты рәисе. – Бүгенге көндә шундый конструктор булдырылган, ул өч файлдан тора – 13 слайдтан торган конструктор, конкурста катнашучыларның берсенең үрнәге һәм методик киңәшләр. Әлбәттә, конструктор кулланучыларның тәкъдимнәрен исәпкә алып тулыланачак. Әлеге проектка ярдәм итүегезне һәм аны округның башка төбәкләрендә масштаблаштыру мөмкинлеген каравыгызны сорыйбыз».          

Яшь парламентарийлар Татарстан тәкъдимен хупладылар һәм бу инструментның «авыл яшьләре имиджы өстендә эшләргә» һәм авыл кешеләреннән грант заявкаларын нәтиҗәлерәк һәм уңышлырак итәргә мөмкинлек бирүен билгеләп үттеләр.   

Идел буе федераль округында Россия Федерациясе субъектлары дәүләт хакимиятенең закон чыгару органнары каршындагы Яшьләр парламентлары ассоциациясе утырышында Россия Президентының Идел буе федераль округындагы Тулы вәкаләтле вәкиле урынбасары Олег Машковцев, Идел буе Закон чыгаручылар ассоциациясе координаторы, Түбән Новгород өлкәсе Закон чыгару Җыелышы Рәисе Евгений Люлин, Идел буе федераль округы субъектлары парламентлары, округның яшьләр парламентлары башлыклары катнашты.

Утырыш Йошкар-Ола шәһәрендә Идел буе федераль округы Закон чыгаручылар советы чаралары кысаларында уза. Иртәгә пленар утырышта Идел буе закон чыгаручылары агросәнәгать комплексын үстерү һәм азык-төлек иминлеген тәэмин итү мәсьәләләре буенча фикер алышачак. Моннан тыш, Идел буе федераль округының Закон чыгаручылар советы утырышында округ төбәкләрендә сәламәтлек саклау системасын кадрлар белән тәэмин итү мәсьәләләре үзәк урында торачак. Утырышта иртәгә Россия Президентының Идел буе федераль округындагы Тулы вәкаләтле вәкиле Игорь Комаров, Татарстан Республикасы Дәүләт Советы Рәисе вазыйфаларын башкаручы Марат Әхмәтов катнашыр дип планлаштырыла.