Бүген Казанда күренекле татар шагыйре, публицисты, милли әдәбият классигы Габдулла Тукайның тууына 140 ел  тулуга багышланган «Туган тел» Бөтендөнья форумының пленар утырышы узды. Чарага Россия Федерациясенең 29 төбәгеннән һәм 5 чит илдән 800дән артык катнашучы җыелды. Алар арасында татар теле һәм әдәбияты укытучылары, мәктәп директорлары, балалар бакчалары тәрбиячеләре, мәгариф бүлекләре методистлары, шулай ук мөселман дини уку йортлары мөгаллимнәре бар иде.  Форумда катнашучыларны республика Рәисе, Татарстан Хөкүмәте һәм парламенты исеменнән Татарстан Республикасы Дәүләт Советының Мактаулы Рәисе Фәрит Мөхәммәтшин сәламләде.   

Утырышны ачып, Фәрит Мөхәммәтшин республика Рәисе Рөстәм Миңнехановның сәламләвен җиткерде.  «Әлеге чарада Татарстаннан, Россия төбәкләреннән һәм чит илләрдән килгән милләттәшләребезнең күп булуы аеруча сөенечле. Бу безнең бердәмлегебезне, туган телебезгә булган какшамас тугрылыгыбызны күрсәтә. Җыен татар мәдәнияте символына, туган теленә һәм халкына чиксез тугрылык үрнәгенә әверелгән бөек шагыйребез Габдулла Тукайның тууына 140 ел тулган көннәрдә уза һәм бу очраклы түгел. Туган тел – халыкның тере җаны, аның тарихи хәтере һәм кабатланмас рухи коды. Нәкъ менә сезне – балалар күңеленә Тукай теленең матурлыгын, ата-бабаларыбызның зирәклеген сеңдерүче укытучыларны – халкыбыз һәрвакыт олы хөрмәт белән «мөгаллим» дип атый, – дип билгеләп үтә Рөстәм Миңнеханов. – Хәзерге шартларда яшь буында ватанпәрвәрлек тәрбияләү аеруча зур әһәмияткә ия. Балаларыбызда туган җиргә мәхәббәт, тарихка һәм мәдәнияткә хөрмәт формалаштыруда сезнең өлешегез бәяләп бетергесез. Туган тел укытучысы ул – милләтнең киләчәгенә нигез салучы мәгърифәтче, милләт агачының тамырларын ныгытучы мөһим көч. Дөнья бер урында гына тормый, ул һәрвакыт үсештә. Бүген мәгариф системасы да зур үзгәрешләр кичерә. Без яңа технологияләр, ясалма фәһем юнәлешен кулланабыз, укытуның инновацион методикаларын булдырабыз. Әлеге чара, һәр укучы заманча, дөнья таләпләренә туры килә торган сыйфатлы белем алсын өчен, тармакның алга таба үсешенә ярдәм итәр дип ышанам».

Фәрит Мөхәммәтшин илнең төрле төбәкләреннән җыелган милләттәшләргә туган телебезне, милли гореф-гадәтләрне һәм мәдәниятне саклауга керткән зур хезмәтләре өчен рәхмәт белдерде. «Форумда катнашуыгыз һәм аның белән кызыксынуыгыз өчен рәхмәтлебез», – диде Фәрит Мөхәммәтшин. Ул шулай ук Татарстан Республикасы Мәгариф һәм фән министрлыгы ярдәмендә Бөтендөнья татар конгрессы уздыра торган Бөтендөнья туган тел форумын оештыручыларга рәхмәт белдерде. 

Пленар утырыш башланыр алдыннан Фәрит Мөхәммәтшин татар телен өйрәнүдә инновацион проектлар һәм алымнар күргәзмәсе белән танышты. 

«Туган тел» бөтендөнья форумы Казанда 15-17 апрельдә уза. Бу Татарстан Республикасында, шулай ук чит илләрдә, Россия төбәкләрендә татар телен саклау, өйрәнү һәм үстерү өчен шартлар тудыруга юнәлдерелгән иң зур чараларның берсе.