Татарстан Республикасы Дәүләт Советының Бюджет, салымнар һәм финанс комитеты рәисе Леонид Якунин һәм комитет рәисе урынбасары Камил Ногаев фронт янындагы Лисичанск һәм Рубежное шәһәрләрендә булдылар. Сәфәрдә аларны Татарстан Республикасы Премьер-министры урынбасары Ринат Садыйков озатып йөрде.

Эш сәфәре барышында республика вәкилләре гуманитар ярдәм тапшырдылар һәм аны халыкка адреслы ярдәм күрсәтүнең ничек оештырылуы белән таныштылар.

Лисичанскидагы гуманитар үзәккә балалар өчен шәхси гигиена чаралары, подгузниклар, балалар һәм өлкәннәр киемнәре, шулай ук генераторлар тапшырылды. Депутатлар Татарстан Республикасы катнашында торгызылган социаль объектларны карадылар.

Рубежное шәһшренең  гуманитар үзәгендә төрле категориядәге халыкка  – махсус хәрби операциядә катнашучыларның гаиләләренә, Чернобыль АЭСындагы аварияне бетерүчеләргә, өлкән яшьтәге һәм аз хәрәкәтләнүче гражданнарга ярдәм ничек формалаштырылуын күрсәттеләр. "Бу атнада махсус хәрби операциядә катнашучыларның гаиләләре өчен азык-төлек һәм юу җыелмалары формалаштырылды. Алар адреслы рәвештә – хәбәрсез югалган һәм һәлак булган хәрби хезмәткәрләрнең гаиләләренә илтеп бирелә. Татарстан Республикасыннан килә торган барлык ярдәм алучыларга тоткарлыксыз тапшырыла. Хәзер Чернобыль АЭСында авария ликвидаторлары өчен җыелмалар формалаштырыла, якынча 70 комплект әзерләнгән, кирәк булганда аларның саны арттырылачак. Алар составына көнкүреш химиясе җыелмалары, азык-төлек, шул исәптән чәкчәк һәм кәрәзле бал керә. Өлкән яшьтәге һәм урында ятучы гражданнар өчен аерым җыелмалар формалаштырыла, алар 140ка якын кеше", – дип белдерделәр гуманитар үзәктә.

Камил Ногаев билгеләп үткәнчә, гуманитар ярдәм  махсус сорау буенча кыска вакыт эчендә җыелган. "Генераторларга һәм башка кирәкле позицияләргә мөрәҗәгать итү буенча берничә көн эчендә йөк формалаштырылды –15 генератор, шулай ук подгузниклар һәм кием-салымнар. Генераторларның бер өлеше социаль объектлар резервына җибәрелде,  унысы махсус хәрби операция зонасында хезмәт итүче сугышчыларыбызга тапшырылды. Ярдәм җыюга депутатлар, хезмәттәшләр һәм республика халкы кушылды, – диде Камил Ногаев. – Минем Лисичанскига беренче генә килүем түгел, бу инде сигезенчеме, тугызынчы сәфәр. 2022 елдан шәһәрдә мәктәпләрне, балалар бакчаларын һәм башка социаль объектларны торгызу эшләре алып барыла. Шул ук вакытта база инфраструктурасын — су һәм электр энергиясе белән тәэмин итүдә кыенлыклар бар. Бу шартларда китерелә торган барлык ярдәмгә ихтыяҗ булуы һәм конкрет кешеләргә барып җитүе аеруча мөһим. Сәфәр нәтиҗәләре буенча мәгълүмат республика халкына җиткерелә, бу ярдәм күләмен арттырырга мөмкинлек бирә".