Бүген парламент Аппараты хезмәткәрләре Казан үзәгендә урнашкан Лядский бакчасына язгы өмәгә чыктылар. Казанлыларның яраткан ял итү урыны территориясен җыештыруда шулай ук «Бердәм Россия» партиясенең төбәк бүлекчәсе башкарма комитеты хезмәткәрләре, «Бердәм Россиянең Яшь гвардиясе» һәм төбәк иҗтимагый кабул итү бүлмәсе активистлары, партия тарафдарлары катнашты.   

Беренчел профсоюз оешмасы рәисе, Дәүләт Советы Аппараты эшләре белән идарә итүче Булат Хәсәнов билгеләп үткәнчә, язгы өмәгә чыгу –  республика парламенты Аппаратының күптәнге традициясе. "Бүген һава торышы яхшы,  эшкә чакырып тора, өмә – шәһәребезне бергәләп чистарту өчен менә дигән мөмкинлек, – дип белдерде Булат Хәсәнов.  – Гадәттә без ел саен  Лядской бакчасын тәртипкә китерәбез һәм аның яныннан үткән саен, бердәм һәм күңелле итеп бергә эшләгәнебезне искә төшереп, хезмәтебезнең нәтиҗәсен күреп шатланабыз”. 

Дәүләт Советы Аппараты эшләре белән идарә итүче урынбасары Альберт Вәлиев билгеләп үткәнчә, парламент хезмәткәрләре еш кына өмәгә бөтен гаиләләре, балалары белән килә.  "Беренче чакыру буенча тырма, көрәк алалар да эшкә чыгалар. Бу – бик файдалы чара. Без яшьләрне актив җәлеп итәбез, өлкән буын үрнәгенә иярүләрен сорыйбыз һәм шулай итеп эшкә өйрәтәбез», — диде Альберт Вәлиев.

"Лядский бакчасы соңгы елларда иҗтимагый киңлекләрне төзекләндерү программасы кысаларында шактый яңартылды. Һәм һәр елны яз җитү белән безгә бу территорияне тәртипкә китерү бик күңелле, – дип басым ясады журналистлар белән аралашканда «Бердәм Россия» Бөтенроссия сәяси партиясенең төбәк башкарма комитеты җитәкчесе Марат Сәмигуллин. – Без ел саен бу чараны бәйрәмгә әйләндерергә тырышабыз: бездә һәрвакыт музыка уйный, өмәне бергәләп зарядка ясаудан башлыйбыз.  Безгә кушылучылар өчен кызыклы программа һәм конкурслар әзерлибез. Ә иң мөһиме – өмә тәмамланганнан соң чиста, төзек территорияне күрү бик күңелле”. 

ТР Дәүләт Советы Рәисе секретариатының аналитика бүлеге мөдире Марат Хәбиров билгеләп үткәнчә, өмә – коллективның хезмәт бердәмлеген иң яхшы күрсәтү. «Бу безнең күркәм гадәтебез, ул тән һәм җан сәламәтле өчен  файдалы,  – диде  ТР Дәүләт Советы Аппаратының ТР законнарын һәм норматив-хокукый документларны тәрҗемә итү һәм идентификацияләү бүлеге җитәкчесе Рөстәм Мөхәммәтшин. – Саф һавада физик хезмәт күңелгә шатлык бирә һәм рухны күтәрә».

Бүгенге өмә территорияләрне санитар чистарту һәм төзекләндерү буенча ел саен үткәрелә торган икеайлык кысаларында уза. Быел җәмәгать киңлекләрен, урман полосаларын һәм яр буе зоналарын чистартуга аерым игътибар биреләчәк.