Бүген Дәүләт Советының мактаулы рәисе Фәрит Мөхәммәтшин Казан федераль университетының Социаль-фәлсәфи фәннәр һәм массакүләм коммуникацияләр институтының «Политология» юнәлеше буенча белем алучы студентлар белән очрашты. Очрашу «Персона» проекты кысаларында Татарстанда «Бердәм Россия»гә иҗтимагый ярдәм штабында узды.

«Сезнең белән очрашуыма шатмын, - дип мөрәҗәгать итте Фәрит Мөхәммәтшин студентларга. - Политологияне үз һөнәрегез итеп сайлавыгыз, аңа карата кызыксыну һәм хөрмәт күрсәтүегезгә минем өчен   бик күанычлы, димәк сез республиканың бүгенге һәм киләчәк уңышлары өчен җаваплы».

Фәрит Мөхәммәтшин социаль-икътисадый үсеш күрсәткечләренә, республиканың инвестицияләр җәлеп итү мөмкинчелегенә аерым тукталды, Татарстан яшьләренә төрле тармакларда карьераны уңышлы ясау өчен киң мөмкинлекләр туды диде ул.

Бүген Татарстан тулай төбәк продукты күләме буенча илдә 6 нчы, төп капиталга инвестицияләр буенча – 5 нче, сәнәгать җитештерүе һәм авыл хуҗалыгы буенча ‒ 4 нче, төзелеш буенча 2 нче урында. "Махсус хәрби операция һәм икътисадый чикләүләр белән бәйле барлык кыенлыкларга карамастан, республика социаль программаларны уңышлы гамәлгә ашыруын дәвам итә, - дип ассызыклады Дәүләт Советының мактаулы рәисе. - Шунысын да билгеләп үтәргә кирәк, бу республика хакимиятенең, районнарның бердәм команда булып эшләве нәтиҗәсе.  Татарстан Рәисе яшьләрне җитди һәм олы тормышка әзерләү мәсьәләләренә бик җаваплы карый. Безнең республикада яраткан эшкә урнашу, карьера төзү, тормышыбызны уңышлы итү өчен барысы да бар».

Фәрит Мөхәммәтшин студентларга Татарстан парламенты эше турында сөйләде һәм Дәүләт Думасына сайлаулар турында искә төшерде. "Политология - бик эчтәлекле һәм күләмле фән. Сез гамәлдәге федераль һәм республика законнарын яхшы белергә, шулай ук Россия Федерациясенең хокукый кырын, инновацияләрне күзәтергә тиеш. Ләкин иң мөһиме - сезгә кешеләр белән сөйләшергә, аларны тыңларга һәм ишетергә өйрәнергә кирәк", - дип ассызыклады Дәүләт Советының мактаулы рәисе.

Студентлар, үз чиратында, Фәрит Мөхәммәтшиннан аның сәясәткә ничек килүе белән кызыксынды. Алар шулай ук Фәрит Мөхәммәтшиннан Татарстан авыл территорияләрен комплекслы үстерү, авыл җирендә Халыкны саклап калу өчен нинди чаралар күрелүе турында сорады.  "Бүген авылда кече һәм урта эшмәкәрлекне оештыручы һәм анда яшәп калучы кешеләр өчен яңа мөмкинлекләр барлыкка килә. Бу мәсьәләгә  Татарстанда зур игътибар бирелә. Республикада фермерларны һәм шәхси хуҗалыкларны дәүләт тарафыннан тәэмин итү буенча дәүләт программалары гамәлгә ашырыла, аның кысаларында авыл кешеләренең тормыш сыйфаты яхшыра", - дип сөйләде Фәрит Мөхәммәтшин.

Фәрит Мөхәммәтшин очрашуга йомгак ясап, студентлар белән мондый әңгәмәләр киләчәктә дә дәвам итәчәк, дип ассызыклады. «Персона» проекты кысаларында очрашулар «Бердәм Россия» партиясенең төбәк бүлеге тәкъдиме буенча уза, - дип билгеләп үтте ул. - Бүгенге очрашуда катнашучылар бик мөһим белгечлек ала. Алар Татарстан һәм тулаем ил буенча куелган бурычлардан хәбәрдар булырга, хакимият белән халык арасын    якынайтырга ярдәм итәргә тиеш», - дип билгеләп үтте Фәрит Мөхәммәтшин, республиканың массакүләм мәгълүмат чаралары вәкилләренең сорауларына җавап биреп.