Бүген парламентның егерме беренче утырышы кысаларында Дәүләт Советы фойесында «Тыл һәм фронт – гомуми җиңү» дип аталган фотокүргәзмә ачылды, аның экспозициясе Татарстан Республикасы шефлыкка алган Луганск Халык Республикасының Лисичанск һәм Рубежное шәһәрләрен торгызу процессын, шулай ук Татарстан сугышчыларының махсус хәрби операциядә катнашуын чагылдыра. Фотокүргәзмә экспозициясе белән Дәүләт Советы Рәисе вазыйфаларын башкаручы Марат Әхмәтов, парламент депутатлары танышты.  

«Тыл һәм фронт – гомуми җиңү» фотокүргәзмәсе зыян күргән территорияләрдәге тормыш, бернигә карамастан анда торып калган һәм үзгәрешләр двигателе булган кешеләр, Донбассны азат итүне дәвам иткән сугышчылар турында визуаль хикәя булып тора.

Фотосурәтләр җимерелүдән иҗат итүгә, авыртудан өметкә юлны – сугышчыларга һәм тыныч халыкка иреккә таба үтәргә туры килгән авыр юлны теркәп бара.

Фотосурәтләрдә шулай ук гуманитар миссияләрдә катнашучылар – волонтерлар, төзелеш бригадалары вәкилләре, белгечләр, Дәүләт Советы депутатлары, министрлар, шулай ук хәрбиләр – шефлыкка алынган  шәһәрләрне торгызуга көч куючылар һәм җирле халык белән турыдан-туры хезмәттәшлек урнаштыручылар сурәтләнгән. Сурәтләрдә Донбасста яшәүчеләр үзләре дә күрсәтелгән.

Фоторәсемнәр авторлары – җиденче чакырылыш ТР Дәүләт Советы депутаты, Россия хәрби-тарихи җәмгыятенең Татарстан Республикасындагы төбәк бүлеге башкарма директоры, волонтер Тимур Камалетдинов һәм шефлыкка алынган Лисичанск һәм Рубежное шәһәрләрен торгызуда аерым җаваплылыкка ия ТР Премьер-министры урынбасары Ринат Садыйковның ярдәмчесе Максим Приходько.