Бүген, Россия көнендә, Татарстан Республикасы Милли китапханәсендә «Балалар илне рәсемгә төшерә» 20 нче Республика балалар иҗаты конкурсында җиңүчеләрне бүләкләделәр. Татарстан җитәкчелеге исеменнән конкурс лауреатларын һәм призерларын Дәүләт Советының мактаулы рәисе, «Бердәм Россия» партиясенең төбәк бүлеге Секретаре Фәрит Мөхәммәтшин сәламләде.

 «Әлеге проект ярдәмендә без балаларыбызның тәрбияле, җаваплы, үз илен яратучы булуына инандык, – дип ассызыклады Фәрит Мөхәммәтшин. - Без бик күп талантлы, хезмәт сөючән егетләрне күрдек. Һәм без аларга, киләчәгебезгә ышанабыз».

Фәрит Мөхәммәтшин әйтүенчә, «Бердәм Россия» тарафыннан тәкъдим ителгән әлеге проект төрле яшьтәге, төрле милләт балаларын берләштерә. Дәүләт Советының мактаулы рәисе проектны оештыручыларга рәхмәт белдерде һәм «Балалар илне рәсемгә төшерә» конкурсы киләчәктә дә дәвам итәчәгенә ышанычын әйтте.

«Конкурс балалар белән мондый эшнең кирәклеген тагын бер кат раслады. Рәсемнәрдә мәгънә һәм образлар күп, - дип ассызыклады Фәрит Мөхәммәтшин. - Быел аерым номинация Россия халыклары бердәмлеге елына багышланган. Татарстанда туган телләрне һәм милли мәдәниятләрне саклау өчен барысы да эшләнә. Балалар үз рәсемнәре аша илебезнең ничек яшәвен күрсәтә. Конкурс безгә балаларны тынычлыкта һәм татулыкта тәрбияләргә ярдәм итә - ә бу исә һәр җәмгыятьнең нигезе булып тора».

Фәрит Мөхәммәтшин «Россия Федерациясе халыклары бердәмлеге елы» номинациясендә җиңүчеләрне бүләкләде. Баулы районыннан Альмира Әхмәтова бу номинациядә җиңү яулады. Мамадыш районыннан Айза Зарипова икенче урынга, Арча районыннан Эльвина Вәлиева һәм Казаннан Эмилия Әбдрәшитова өченче урынга лаек булдылар.

Быел конкурс «Бердәм Россия» партиясе проекты кысаларында 20нче тапкыр уздырылды. Анда республиканың төрле районнарыннан 9-12 яшьлек 19 укучы лауреат булды. Проект башлангыч мәктәп яшендәге балаларны сынлы сәнгатьтә үз тәҗрибәләрен чагылдыруга, илнең дәүләт символикасы турындагы белемнәрен һәм дөньяга карашын киңәйтүгә, балаларның иҗади һәм ватанпәрвәрлек рухында тәрбияләүгә  юнәлдерелгән.

«Балалар илне рәсемгә төшерә» төбәк проектының кураторы «Росия-24» каналында «Парламентские Вести» программасының авторы һәм алып баручысы Дмитрий Второв.

Конкурсны гадәттәгечә «Бердәм Россия» партиясенең Татарстан төбәк бүлеге, «Татарстан» ДТРК, ТР мәгариф һәм фән министрлыгы, ТР буенча ЭЭМның ЮХИДИ, шулай ук «юл хәрәкәте иминлеге» ДБУ оештыра. Конкурс «инновацияләр чикләре» АКО тарафыннан Татарстан Республикасы Рәисе гранты ярдәмендә гамәлгә ашырыла.

Быел конкурс дүрт номинациядә узды - «Без-имин юллар өчен!», «Россия Федерациясендә халыклар бердәмлеге елы», «Татарстан Республикасында хәрби һәм хезмәт батырлыгы елы», «Цифрлаштыру һәм ясалма интеллект» һәм «Предприятиеләр – фронтка!» дип аталган махсус номинация.

Балалар рәсемнәре конкурсының беренче этабы муниципаль дәрәҗәдә узды. Анда республиканың барлык районнарыннан 10 000нән артык кеше катнашты. Финалга 312 укучының эше үткән.

Тантаналы чарада Татарстан Республикасы Фәннәр академиясе президенты, «Юл хәрәкәте иминлеге» ДБУ директоры Рифкать Миңнеханов, Дәүләт Советы депутаты Артур Абдулҗанов, ТР мәгариф һәм фән министры урынбасары Алсу Әсәдуллина, «Татарстан» ДТРК директоры Фирдүс Гыймалтдинов катнашты.

«Әлеге конкурс дәвамында мин бер тенденцияне күрдем: балалар төрле тарихлар, төрле геройлар ясый. Аларның почеркы, стиле үзгәрә, әмма рәсемнәрнең идеясе һәм характеры үзгәрешсез кала. Проект балаларда аңлау дәрәҗәсен арттыра, туган илгә мәхәббәт тәрбияли. Бу без омтылган һәм балаларда тәрбияләргә теләгән сыйфатлар», - дип билгеләп үтте Дәүләт Советы депутаты, “Аҗаган” җитештерү берләшмәсе директоры Артур Абдулҗанов.