Бүген Дәүләт Советында Дәүләт корылышы һәм җирле үзидарә комитеты һәм комитет каршындагы Эксперт советының уртак утырышы булды, анда депутатлар икенче укылышка әзерләнгән җирле үзидарә турында республика законына үзгәрешләр кертү турында закон проектын, шулай ук республиканың дәүләт символлары турында республика законына үзгәрешләр кертү хакында закон проектын карадылар. Аның нигезендә дәүләт милкендәге спорт объектларына Татарстан Дәүләт флагы даими эленеп торырга тиеш дигән фикер ята. Утырыш эшендә Дәүләт Советы Рәисе урынбасары Юрий Камалтынов катнашты.

Икенче укылышка әзерләнгән җирле үзидарә турындагы республика законына үзгәрешләр кертү турындагы закон проектын комитет рәисе Альберт Хәбибуллин тәкъдим итте. Исегезгә төшерәбез, документ быел июль аенда Дәүләт Советының егерме икенче утырышында беренче укылышта кабул ителгән иде. Закон проектын эшләү «Гавами хакимиятнең бердәм системасында җирле үзидарәне оештыруның гомуми принциплары турында» федераль законның үз көченә керүе белән бәйле (2025 елның 19 июненнән һәм 2028 елның 1 гыйнварыннан тулы күләмдә). Әлеге закон 2027 елның 1 гыйнварына кадәр региональ һәм муниципаль норматив хокукый актларны аңа туры китерүне таләп итә.

Регламент сроклары кысаларында профильле комитет тарафыннан биш төзәтмә әзерләнгән. Альберт Хәбибуллин билгеләп үткәнчә, башка төзәтмәләр кермәгән.

Альберт Хәбибуллин искәрткәнчә, «Гавами хакимиятнең бердәм системасында җирле үзидарәне оештыруның гомуми принциплары турында» 2025 елның 20 мартындагы 33-ФЗ номерлы федераль закон нигезендә ишегалды территорияләрен үстерү – җирле үзидарә органнары вәкаләте. «Ишегалды эчендәге территорияләрнең чикләре ничек билгеләнә, федераль законда билгеләнмәгән, – дип аңлатты комитет рәисе. – Шул ук вакытта 33 нче федераль законның 16 статьясы белән территорияне төзекләндерү кагыйдәләрен раслау муниципаль берәмлекнең вәкиллекле органы компетенциясенә кертелгән, чөнки ишегалды  территорияләрен үстерү, асылда, төзекләндерү мәсьәләсе булып тора. Беренче төзәтмә белән ишегалды территорияләрнең чикләрен билгеләү тәртибе күрсәтелгән төзекләндерү кагыйдәләре белән билгеләнә дип билгеләү тәкъдим ителә».

Моннан тыш, федераль законда муниципаль берәмлекләр башлыкларына вәкиллекле орган рәисе һәм депутаты вәкаләтләрен гамәлгә ашыруны тыю каралган. «Бу тыю 2027 елның 1 гыйнварына кадәр сайланган муниципаль берәмлек органы рәисе вәкаләтләрен башкаручы авыл җирлекләре башлыкларына һәм муниципаль берәмлекләр башлыкларына кагылмый. Республикабызда муниципаль берәмлекләрнең вәкиллекле органнары депутатларын сайлаулар, белгәнебезчә, 2025 елда узды, бу органнарның вәкаләтләре срогы бездә 2030 елда тәмамлана», – дип ачыклык кертте Альберт Хәбибуллин.

Альберт Хәбибуллин шулай ук билгеләп үткәнчә, Татарстанда җирле советларга сайлаулар 2025 елда узды, бу советларның вәкаләтләре 5 ел дәвам итә – димәк, 2030 елга кадәр республикада башлыклар совет рәисләре һәм депутатлары булып кала ала. Әмма әгәр советның вәкаләтләре вакытыннан алда туктатылса, ул вакытта тыю тулысынча эшли башлаячак. «Моңа бәйле рәвештә 2 нче төзәтмә белән закон проектына әгәр совет үз вәкаләтләрен вакытыннан алда туктатса, аннары башлык булган депутат депутат вәкаләтләреннән мәхрүм ителә, ә башлык яңа совет рәисе була алмый дигән кагыйдә кертергә тәкъдим ителә. Бу очракта яңа совет рәисе үз составыннан депутатлар тарафыннан сайланачак, ә башлык җирле администрацияне җитәкли алачак», – дип йомгаклады сүзен Альберт Хәбибуллин.

Альберт Хәбибуллин бүген шулай ук дәүләт символлары турындагы республика законының 9 статьясына үзгәрешләр кертү турындагы закон проектын тәкъдим итте. «Россия Федерациясе Дәүләт флагы турында» Федераль конституциячел законның 4 һәм 6 статьяларына үзгәрешләр кертү хакында» 2026 елның 26 июнендәге 2-ФКЗ номерлы Федераль конституциячел закон белән биналарында һәм территорияләрендә даими рәвештә Россия Федерациясе Дәүләт флагы урнаштырылган оешмалар даирәсе киңәйтелә.

Әлеге статьяның гамәлдәге редакциясендә әлеге бурыч, милек рәвешләренә бәйсез рәвештә, яшьләр сәясәтен гамәлгә ашыру эшчәнлеген гамәлгә ашыручы мәгариф оешмаларына кагыла. 

Федераль законнар нигезендә хәзер Россия Федерациясе Дәүләт флагы дәүләт (муниципаль) милкендәге спорт объектларында, шул исәптән рәсми физкультура чаралары һәм рәсми спорт ярышлары вакытында да, даими эленеп торачак.

Закон проекты Татарстан Республикасы Дәүләт флагын дәүләт (муниципаль) милкендәге спорт объектларында, шул исәптән рәсми физик культура чаралары һәм  рәсми спорт чаралары  үткәргән вакытта, даими рәвештә элеп куюга кагылышлы үзгәрешләр кертергә тәкъдим итә.