Яшьләрнең патриотлыгы үсә, ул һаман да аңлырак була бара, һәм бу аның сайлауларда тавыш бирүдә катнашуыннан күренә. Бу хакта бүген Бердәм мәгълүмат үзәгендә Дәүләт Советы депутаты, В.Г. Тимирясов исемендәге Казан инновация университетының беренче проректоры Игорь Бикеев хәбәр итте.

"Яшьләр сәяси яктан индифферент дигән уртак фикер бар. Бу раслау Татарстанга туры килми. Казан һәм республикабызның башка бик күп шәһәрләре - студентлар шәһәрләре. Студентлар-ул безнең халыкның белемле өлеше. Шуңа күрә күпчелек яшьләр гамәлдәге процессларга җәлеп ителгән", - диде ул.

Игорь Бикеев билгеләп үткәнчә, Көнбатыш басымы россиялеләрдә җавап гамәлләре тудыра – кешеләр уртаклыкны тоя башлый. «Без яшьләр белән ни өчен сәяси актив булырга, ни өчен сайлауларда катнашырга кирәклеге турында фикер алышканда, кешеләрдә мәнфәгатьләрнең уртаклыгын аңлау барлыкка килә дигән нәтиҗәгә килдек. Татарстанлыларның уртак мәнфәгатьләре бар-икътисадый үсеш, куркынычсызлык, үсү һәм эшләү мөмкинлеге", - дип өстәде ул.

Депутат әйтүенчә, югары уку йортлары укытучылары һәм экспертлар яшьләргә чын кыйммәтләрне, дөрес юлны күрсәтергә тиеш. Яшьләр арасында агарту эшләре алып барыла инде. ТР Үзәк сайлау комиссиясе каршында яшьләр советы эшли, югары уку йортларында яшь сайлаучылар клублары бар, алар яшьләрнең хокукый культурасын күтәрә, дип дәвам итте ул. "Әлеге чаралар ярдәмендә без мөстәкыйль сайлау ясый торган кешеләрнең үз-үзләрен аңлы тотышы нәтиҗәләренә ирешәбез. Бу шатландыра. Яшьләрнең күбесе сайлау участокларына килер дип ышанам. Бу инде сайлау участокларының тулылануыннан сизелә", - дип белдерде Игорь Бикеев.

Депутат билгеләп үткәнчә, теләсә-кайсы тавыш бирүче сайлаучы – «хакимият, чөнки ул илнең, төбәкнең, муниципаль берәмлекнең язмышын билгели торган карарның бер өлеше булып тора».

«Безнең вәкил кем булачагы бездән тора. Шуны аңларга кирәк, теләсә-кайсы вазыйфаи зат аны сайлаган кеше алдында җаваплы. Һәм, бу җаваплылыкны тоеп, сайлаучылар мәнфәгатьләренә туры килергә тырыша. Сайлаулар-ул тормышның, өметләрнең һәм казанышларның яңа циклының башы. Чөнки яңа сәясәтчеләр үз планнары, сайлаучыларның наказлары белән килә. Бу үсеш өчен бик көчле стимул булып тора", - дип йомгаклады сүзен Игорь Бикеев.