Татарстан Дәүләт Советы Россия Дәүләт Думасы тарафыннан беренче укылышта кабул ителгән «РФ субъектларында ачык хакимият оештыруның гомуми принциплары турында»гы федераль закон проектына 20 төзәтмә әзерләде. Бүген депутатлар ТР Дәүләт Советының Дәүләт корылышы һәм җирле үзидарә комитеты утырышында әлеге төзәтмәләрне тикшерде.

Парламент комитеты рәисе Альберт Хәбибуллин сүзләренчә, федераль закон проектына әзерләнгән төзәтмәләр шартлы рәвештә берничә блокка бүленгән. Төзәтмәләрнең беренче блогы – закон чыгару процессын оештыруга, икенчесе – РФ субъектлары хакимият органнары эшчәнлегенә, өченчесе Россия төбәкләре закон чыгару һәм башкарма хакимият органнарының үзара бәйләнешенә кагыла.

Иң күләмлесе – төзәтмәләрнең икенче блогы. Анда, аерым алганда, Россия Федерациясе субъектының югары вазифаи затын атауга кагылышлы пункт бар. Биредә Татарстан депутатлары «РФ субъекты югары вазифаи затының атамасы төбәкнең тарихи, милли һәм башка традицияләрен һәм анда яшәүче халыкның ихтыярын исәпкә алып төбәк Конституциясе (уставы) белән билгеләнүенә» басым ясарга тәкъдим итә.

Хәбибуллин искәртеп үткәнчә, Татарстан Дәүләт Советының 26нчы утырышында депутатлар федераль закон проектының тәкъдим ителгән вариантын хупламаган.

Докладчы закон проектының аерым нигезләмәләре демократик федератив хокукый дәүләт буларак Россиянең конституцион төзелеш нигезләренә каршы килүен билгеләп үтте.

Дәүләт Думасы 9 ноябрьдә узган утырышта төбәк хакимияте турындагы федераль закон проектын беренче укылышта кабул итте. Документны Россия парламентының түбән палатасына Дәүләт Думасының Дәүләт төзелеше һәм закон чыгару комитеты рәисе Павел Крашенинников һәм Федарция Советының Конституцион закон чыгару комитеты рәисе Андрей Клишас 27 сентябрьдә тапшырды.