Бүген РФ Федераль Җыелышының Федерация Советы Рәисе урынбасары, "Бердәм Россия" партиясе Генераль советы Секретаре Андрей Турчак һәм ТР Дәүләт Советы Рәисе Фәрит Мөхәммәтшин Казанда 131 нче лицейда булды. Бөтен илгә танылган әлеге мәгариф оешмасы белән танышканнан соң, алар аны "Бердәм Россия" партиясе инициативасы буенча оештырылган мәктәпләрне капиталь ремонтлау федераль программасына кертүне хупладылар.

Лицей бинасын, ашханә, инженерлык коммуникацияләрен карап йөргәндә Андрей Турчак һәм Фәрит Мөхәммәтшин уку йорты җитәкчелегеннән капиталь ремонт планын финанслау һәм гамәлгә ашыру перспективалары белән кызыксынды.

Лицей директоры Әлфия Хәбибуллина әйтүенчә, лицей 1961 елда ачылган, һәм бүген бина белем бирү оешмаларына күзәтчелек органнары тарафыннан куела торган заманча таләпләргә җавап бирми.

2019 елда ашату бинасы астындагы фундамент утырган, бинаның бер өлешендә ярыклар хасил булган һәм алар арта тора. Бу алга таба стенаның җимерелүе куркынычын тудыра, бу мәктәп ашханәсе һәм барлык уку процессы эшенең тулысынча тукталуына китерергә мөмкин. Хәзерге вакытта ремонт эшләрен башлау өчен экспертиза һәм проект эшләре башкарылган.

Адрей Турчак лицей җитәкчелеге белән сөйләшкәндә РФ Президенты Владимир Путин "Бердәм Россия" съездында якындагы биш елга мәктәпләрне капиталь ремонтлау программасын булдырырга кушты, дип белдерде. Программаны, биналарны ремонтлауны гына түгел, бәлки заманча җиһазлар белән тәэмин итүне дә кертеп, комплекслы итәргә карар кылынган. "Федераль Мәгариф министрлыгы капремонтка мохтаҗ мәктәпләр реестрына 7,5 меңгә якын мәгариф учреждениесен кертте, - дип басым ясады Федерация Советы Рәисе урынбасары. - Һәм шунысы бик мөһим, проекттан алып кабул итүгә кадәр барлык эшләрне төбәкләрдә ведомство һәм ата-аналар бергәлеге белән берлектә партия бүлекләре тарафыннан булдырылган эш төркемнәре контрольдә тотачак. "Бердәм Россия" фракциясе Дәүләт Думасында 2022 елга һәм 2023 һәм 2024 елларның планлы чорына федераль бюджетта әлеге программаны гамәлгә ашыру өчен акча каралган". Ул шулай ук Татарстанда инде берничә ел гамәлдә булган шундый ук республика программасын югары бәяләде. Программа нәтиҗәлелегенең ачык күрсәткечләренең берсе - мәктәп ашханәләре торышы, алар республикада үзенә күрә мәктәп рестораннарына әверелә.

Федераль һәм республика массакүләм мәгълүмат чаралары вәкилләре белән сөйләшүдә Фәрит Мөхәммәтшин "Бердәм Россия" партиясе җитәкчелегенә мәгариф системасы ихтыяҗларына зур игътибар биргәннәре өчен рәхмәт белдерде. "Бөтен проблемаларны эчтән өйрәнеп, мәктәпләрне капиталь ремонт буенча федераль реестрга кертү турында конкрет карарлар кабул ителә, - диде партиянең Татарстан бүлеге Секретаре. - "Бердәм Россия" Мәгариф министрлыгы белән Казанның 131 нче лицеен мәктәпләрне капиталь ремонтлау программасына кертү мәсьәләсе карый һәм 2022 елда федераль һәм республика бюджетыннан фундаментны, түбәне, стеналарны ремонтлау һәм җиһазларны яңарту өчен акча биреләчәк".

Озак еллар дәвамында лицей Татарстанда төрле дәрәҗәдәге олимпиадалар һәм конкурсларда җиңүчеләр һәм призерлар саны буенча лидер булып тора. Чыгарылыш укучылары арасында 200дән артык фән докторы һәм 3000дән артык фән кандидаты бар. Соңгы берничә елда мәҗбүри БДИ (математика һәм рус теле) нәтиҗәләре буенча лицей республикада беренче урында тора.

Анда укырга теләүчеләр саны мәктәпнең мөмкинлекләреннән берничә тапкырга артып китә. Ел саен конкурста бер урынга 3-5 кеше була. 2008 елда лицей «Бөтенроссия почет китабы»на кертелгән, 2009 елда «Россиянең әйдәп баручы белем бирү учреждениеләре»  илкүләм реестрына кертелгән. 2014, 2015, 2016, 2017 елларда лицей "Россиянең иң яхшы мәктәпләре" арасына керде.