Бүген Дәүләт Советында КПРФ фракциясе торак-коммуналь хуҗалык проблемалары,  энергия нәтиҗәлелеген арттыру мәсьәләләре турында түгәрәк өстәл үткәрде.  Депутатлар, профильле министрлыклар һәм ведомстволар хезмәткәрләре, энергия челтәре оешмалары, шулай ук җәмәгать оешмалары вәкилләре белән бергә актуаль мәсьәләләр турында фикер алыштылар.

КПРФ фракциясе җитәкчесе Хафиз Миргалимов билгеләп үткәнчә, мондый форматта түгәрәк өстәл уздыру - барлык якларны ишетүнең нәтиҗәле ысулы. «Без халыкның сорауларына һәм хакимият органнарына мөрәҗәгать итү аша җавап бирергә һәм аларны үтәүгә ирешергә тиеш», - диде ул.

Казанның Йорт комитетлары берлеге рәисе Геннадий Сомов аңа  тиешеннән артык түләү һәм җылылык тарифларын формалаштыру тәртибенә бәйле шикаятьләр килүе турында сөйләде. Аның фикеренчә, җылылык өчен суммалар исәпләгәндә, урамдагы температура режимын исәпкә алырга, ә моның өчен һәр йортта һава торышын исәпкә алу җайланмаларын урнаштырырга кирәк.

Бу сорауга җавап биреп, Татарстан Республикасы төзелеш, архитектура һәм торак-коммуналь хуҗалык министрының беренче урынбасары Алексей Фролов хәбәр иткәнчә, йортларга  һава торышын исәпкә алу җайланмаларын һәм индивидуаль исәпкә алу приборларын урнаштыру министрлык тарафыннан эшләнә һәм контрольдә тотыла.

Казан йортларында яшәүчеләрне мәгълүматны детальләштерү һәм счет-фактураларда компаниянең мөһере булмау кызыксындырды. ТР Дәүләт торак инспекциясе башлыгы Сергей Краснов сүзләренә караганда, идарәче компанияләр өчен счет-фактура тулылыгы мәҗбүри түгел. «Торак кодексы шулай ук хисап-фактураны мөһер белән таныклауны таләп итми, моның өчен тиешле законны кабул итәргә кирәк», - диде Сергей Краснов.

Инициатив төркемнәр вәкилләре һәм иҗтимагый оешмалар әгъзалары Казанның күп фатирлы йортларында яшәүчеләр очраша торган тагын берничә мәсьәлә турында сөйләделәр. Мәсәлән, өй түбәләрендә кар тоткычлар булмау, мәҗбүри вентиляция урнаштыру нәтиҗәсендә ванна һәм бәдрәф бүлмәләрендә тавышлар ишетелү, йортны капиталь ремонт программасына кертү зарурлыгы. “Бүген иҗтимагый хәрәкәтләр һәм инициатив төркемнәр вәкилләреннән әйтелгән мөрәҗәгатьләр алга таба хәл итү өчен контрольгә алыначак”, - диде ТР төзелеш, архитектура һәм торак-коммуналь хуҗалык министрының беренче урынбасары Алексей Фролов.

Түгәрәк өстәлдә фикер алышуда ТР Тарифлар буенча Дәүләт комитеты рәисе урынбасары Сергей Павлов катнашты. Ул билгеләп үткәнчә, Татарстанда торак-коммуналь хуҗалык хезмәтләре буенча тариф Россиянең башка төбәкләреннән сизелерлек аерыла. «Республика халкы өчен уртача тариф 1877 сум.13 тиен тәшкил итә. Россия Федерациясендә барлык тарифлар белән чагыштырсак, без илдәге иң түбән тариф буенча 85 төбәктән 14 урында торабыз ", – диде ул.

Түгәрәк өстәл эшенә йомгак ясап, Хафиз Миргалимов билгеләп үткәнчә, бүген әйтелгән темалар комплекслы якын килүне таләп итә. "Мин җәмәгатьчелекнең әле проблемаларга битараф булмавы һәм хакимият вәкилләре белән бергә чишү юлларын эзләве белән бик канәгать. Киләчәктә эшләр өчен «юл картасын» булдырырга кирәк. Әйтелгән сорауларны депутат мөрәҗәгате тәртибендә күтәрәчәкбез һәм аларны тиешле ведомстволарга җибәрәчәкбез ", - дип йомгаклады фракция җитәкчесе. 

Утырыш нәтиҗәләре буенча тиешле тәкъдимнәр кабул ителде.