Бүген Дәүләт Советы утырышында парламентарийлар «Татарстан Республикасында гражданнар тарафыннан үз ихтыяҗлары өчен бакчачылык һәм яшелчәчелек алып бару өлкәсендә аерым мәсьәләләр турында» Татарстан Республикасы законы проектын хупладылар. Закон проектында гражданнарның бакчачылык һәм яшелчәчелек белән шөгыльләнүенә дәүләт ярдәме чаралары һәм принциплары беркетелә. Проект депутатлар Азат Хамаев, Таһир Һадиев, Валерий Власов тарафыннан кертелгән.

«Гражданнар тарафыннан бакчачылык һәм яшелчәчелек алып бару аеруча социаль әһәмияткә ия өлкә булып тора, - дип басым ясады депутат Валерий Власов, документны тәкъдим итеп. - Бүген республикада гражданнарның меңгә якын коммерциягә карамаган бакча берләшмәләре исәпләнә. Агымдагы елга республика Президенты ярдәме белән бакчачылыкка ярдәмгә 550 млн. сум акча бүленгән».

Хәзерге вакытта бакчачылык мәсьәләләре федераль закон белән җайга салынган, ул төбәкләргә гражданнарның үз ихтыяҗлары өчен бакчачылык алып баруына бәйле мөнәсәбәтләрне җайга сала торган норматив хокукый актлар кабул итү хокукын бирә. Күрсәтелгән өлкәдә законнар белән җайга салуны үстерү максатларында республика закон проекты әзерләнде.

Закон проектында гражданнар тарафыннан бакчачылык һәм яшелчәчелек алып бару өлкәсендә Татарстан Республикасы дәүләт хакимияте органнарының үз ихтыяҗлары өчен вәкаләтләрен, шулай ук әлеге өлкәдә дәүләт ярдәме күрсәтүгә багышланган нигезләмәләрне билгели торган нигезләмәләр бар. «Әлеге законны кабул итү бакчачылык коммерциячел булмаган ширкәтләрнең хокукларын һәм законлы мәнфәгатьләрен яклауны тәэмин итәчәк, күмәк бакчачылыкны үстерү өчен уңай шартлар тудырырга мөмкинлек бирәчәк», - диде Валерий Власов.

КПРФ фракциясе җитәкчесе Хафиз Миргалимов тәкъдим ителгән документ турында фикер алышканда, фракция әгъзалары закон проектын кабул итүне концептуаль рәвештә хуплыйлар һәм икенче укылышка үз төзәтмәләрен әзерләргә ниятлиләр, дип искәртте. «Безнең фракция 2005 елдан бакчачылар проблемалары белән шөгыльләнә. Без түгәрәк өстәлләр уздырдык, конференцияләрдә катнаштык, Татарстан Президентына мөрәҗәгать иттек һәм аңа күрсәтелгән ярдәм өчен рәхмәтле, - диде ул. - Бакчачылык проблемалары турында системалы рәвештә фикер алышырга кирәк. Милекне рәсмиләштерү, юридик, оештыру мәсьәләләре... Һичшиксез, республикада бакчачылар өчен күп эш башкарылды, әмма аерым сораулар кала. Алга таба да эшкә кушылырга әзер». 

ТР Дәүләт Советы Рәисе Фәрит Мөхәммәтшин фикер алышуга нәтиҗә ясап, беренче чиратта бакчачыларга ярдәм итүгә юнәлтелгән закон проектын кабул итү зарурлыгын билгеләп үтте.