Бүген ТР Дәүләт Советы Рәисе Фәрит Мөхәммәтшин җитәкчелегендә Татарстан Республикасы делегациясе Казахстан Республикасында, Абай өлкәсенең башкаласы Семей шәһәрендә булды, анда беренче Халыкара Иртыш буе Сабантуе узды.

Фәрит Мөхәммәтшин өлкә хакиме Нурлан Уранхаев белән очрашуда акыл иясе һәм мәгърифәтче, казах әдәбиятына нигез салучы бөек казах шагыйре Абайның ватанына килү мөмкинлеге тудырганнары өчен рәхмәт әйтте. Фәрит Мөхәммәтшин Казахстан Республикасы Президенты Касым-Жомарту Токаевка республикабызга яхшы мөнәсәбәттә булулары өчен рәхмәт белдереп,  югары дәрәҗәдә төзелгән килешүләр Россия-Казахстан мөнәсәбәтләре кысаларында киң колач белән тормышка ашырылыр дигән ышаныч белдерде.

Нурлан Уранхаев билгеләп үткәнчә, Семейдә узган беренче Халыкара Иртыш буе Сабантуена Казахстан шәһәрләреннән һәм авылларыннан гына түгел, бәлки Иртыш ярларында урнашкан Омск, Тара, Тобол, Ханты-Мансийск шәһәрләреннән дә татарлар җыелган. "Безнең өлкә, бөтен Казахстан кебек үк, күп милләтле, – диде ул. – Бездә элек-электән шушы җирдә яшәгән татарлар белән тугандаш мөнәсәбәтләр урнашкан. Сабан туеның югары дәрәҗәдә оештырылуы безне шатландыра. Безнең тугандаш багланышлар тагын да ныгыр дип өметләнәбез".

Аннары делегация әгъзалары Татар сәнгать мәктәбендә булдылар, быел аның ачылуына 30 ел тула. Мәктәпкә нигез салучыларның берсе Габделәхәт Ахунжанов Татарстан җитәкчелегенә һәрьяклап ярдәм күрсәткәннәре өчен рәхмәт белдерде, учреждение эше турында сөйләде һәм кунакларны мәктәпнең иҗади талантлары белән таныштырды. Яшь баянчылар үзләренең осталыкларын күрсәттеләр. Очрашу истәлегенә Фәрит Мөхәммәтшин мәктәпкә татар гармуны - тальян бүләк итте.

Семей шәһәренең иң матур җирендә урнашкан Габдулла Тукай һәйкәленә чәчәкләр салу тантанасыннан соң Иртыш яр буенда, яр буе  хәйрияче Рафаил Хаҗипов ярдәмендә төзекләндерелгән, Фәрит Мөхәммәтшин һәм Нурлан Уранхаев иҗади интеллигенция һәм җәмәгатьчелек вәкилләре белән аралаштылар.

Аннары кунаклар бөек казах шагыйре Абай Кунанбаев һәйкәленә чәчәкләр салдылар, ул үз әсәрләрендә төрле милләт кешеләрен ачыктан-ачык һәм дустанә мөнәсәбәттә булырга өндәгән.

Аннары Акай өлкәсесе хәкиме һәм ТР Дәүләт Советы Рәисе Беренче Иртыш буе Сабантуенда кунак булдылар. Россиянең һәм Казахстанның төрле төбәкләреннән бәйрәмгә килгән кунакларны сәламләп, алар 2013 елда Татарстанның Беренче Президенты Минтимер Шәймиев катнашында салынган аллеяда агачлар утырттылар.

Фәрит Мөхәммәтшин үз чыгышында кунакларны Татарстан Республикасы Президенты Рөстәм Миңнеханов исеменнән бәйрәм белән котлады һәм Сабантуй Иртыш ярында яшәүче төрле милләт кешеләрен тагын да якынайтачагына ышаныч белдерде. "Гасырлардан килгән Сабан туе – безнең иң кадерле байлыгыбыз, ул тарихи ватаныбыздан еракта яшәүче милләттәшләребезнең җаннарын җылытучы татар мәдәнияте чишмәсе. Рухи якынлыкны тоярга, милләтара тынычлыкны һәм татулыкны ныгытырга ярдәм итә. Бүген биредә кунакларның күп булуын күрү миңа бик рәхәт! Чөнки кунакларсыз Сабантуй – ул бәйрәм түгел. Элек-электән татарлар бу көнне ялгызлыкта калуны өнәмәгәннәр. Туганнарын, дусларын, күршеләрен  һәм башка авыллардан танышларын чакырганнар, барысын бер мәйданга җыйналып күңел ачканнар".

Өлкә хакиме Нурлан Уранхаев үз чыгышында билгеләп үткәнчә, төбәктә яшәүче башка милләтләр кебек татарлар да иҗтимагый татулыкны һәм социаль-икътисади үсешне ныгытуга зур өлеш кертә. "Сабантуй күптән инде бер халыкның бәйрәме булудан туктады, – диде ул.–- Бу чын мәгънәсендә бөтенхалык бәйрәме. Бүген, беренче тапкыр, безнең өлкә төзелгәннән соң өч ай узгач, бу утрауда без бердәмлегебезне һәм киләчәк өчен җаваплылыгыбызны, тарихка, мәдәнияткә һәм традицияләргә тугрылыгыбызны күрсәтү өчен җыелдык".

Сабантуй Бейбитшилик утравында узды, анда 10 меңгә якын кеше катнашты. Бәйрәм чыгышлар, күргәзмәләр һәм милли уеннар белән үрелеп барды. Сабантуйның абсолют батырына төп приз - Татарстан Президентыннан квадроцикл тапшырылды.

Татарстан Республикасыннан бәйрәмне үткәрү өчен җаваплы булып Актаныш муниципаль районы беркетелгән иде.

Татарстан делегациясе составында Татарстан Республикасы Премьер-министры урынбасары, Бөтендөнья татар конгрессы Милли шурасы рәисе Васил Шәйхразиев, ТР Дәүләт Советы депутатлары Рамил Төхвәтуллин, Альбина Насыйрова һәм башка рәсми затлар бар иде.