Бүген республика парламенты утырышында "Фәнни шәһәрчек" территориясен Биектау муниципаль районы составыннан Казан шәһәре территориясе чигенә күчерүне күздә тоткан республика законы кабул ителде.

«Аерым муниципаль берәмлекләрнең территорияләре чикләрен үзгәртү һәм «Казан шәһәре муниципаль берәмлеге территориясе чикләре һәм статусы турында» һәм «Биектау муниципаль районы» муниципаль берәмлегенең һәм аның составындагы муниципаль берәмлекләрнең территорияләре чикләрен билгеләү һәм аларның статусы турында» Татарстан Республикасы законнарына үзгәрешләр кертү хакында» закон проектын

Казан башкарма комитеты җитәкчесе Рөстәм Гафаров тәкъдим итте. Ул хәбәр иткәнчә, "Фәнни шәһәрчек" территориясен Казан шәһәре муниципаль берәмлеге чигенә кертү өчен, җирле үзидарә органнары тарафыннан кирәкле барлык процедуралар уздырылган. 2022 елның 20 гыйнварында Биектау муниципаль районы һәм Казан шәһәре чикләрен үзгәртү мәсьәләсе буенча халык тыңлаулары үткәрелгән. Фикер алышу нәтиҗәләре буенча муниципаль берәмлекләрдә яшәүчеләр муниципаль берәмлекләр чикләрен үзгәртү турындагы инициативаны хуплаган. 15 апрельдә Казан шәһәр Думасы тиешле закон проектын Дәүләт Советына кертү буенча Казан шәһәр думасының закон чыгару инициативасы турында карар кабул иткән.

Дәүләт Советы депутаты, Дәүләт корылышы һәм җирле үзидарә комитеты әгъзасы Ольга Воронова комитетның уңай карары белән таныштырды һәм депутатлардан закон проектын хуплауларын сорады.

Дәүләт Советы «Аерым муниципаль берәмлекләрнең территорияләре чикләрен үзгәртү һәм «Казан шәһәре муниципаль берәмлеге территориясе чикләре һәм статусы турында» һәм «Биектау муниципаль районы» муниципаль берәмлегенең һәм аның составындагы муниципаль берәмлекләрнең территорияләре чикләрен билгеләү һәм аларның статусы турында» Татарстан Республикасы законнарына үзгәрешләр кертү хакында» закон проектын беренче укылышта һәм тулаем кабул итте.