Бүген Дәүләт Советының Дәүләт корылышы һәм җирле үзидарә комитеты рәисе Альберт Хәбибуллин Гагаузия Автономияле территориаль берәмлеге (Молдова Республикасы) делегациясе белән очрашты. Очрашу республика парламентында узды.

Яклар Татарстан Республикасы Дәүләт Советының һәм Гагаузия Халык Собраниесенең парламентара хезмәттәшлеген билгеләү, шул исәптән тиешле килешүне имзалау мөмкинлекләре турында фикер алыштылар. Бүген Гагаузия делегациясе Татарстан Дәүләт Советына шундый инициатива белән килде.

Альберт Хәбибуллин депутатлар корпусының үзара хезмәттәшлеге, парламент делегацияләре белән алмашу һәм турыдан-туры элемтәләрне үстерү мөһимлеген хуплады. "Сезнең тәкъдимегез якын арада Дәүләт Советы Рәисе Фәрит Мөхәммәтшинга хәбәр ителәчәк, федераль хакимият органнары белән шундый мөмкинлекне эшләүгә керешәчәкбез", - диде профильле парламент комитеты рәисе.

Татарстанга визиты кысаларында Гагаузия делегациясе Татарстан Республикасы Раис Р.Н. Миңнеханов тарафыннан кабул ителде, Татарстан Республикасы Инвестицион үсеш агентлыгында, «Майский» теплица комбинатында булды. Планда - Татарстан Республикасы Иҗтимагый палатасы һәм Татарстан халыклары ассамблеясе җитәкчелеге белән очрашу.