Бүген Казанның Азык-төлек һәм социаль туклану департаменты базасында Мәгариф, мәдәният, фән һәм милли мәсьәләләр комитеты утырышы узды, анда депутатлар укучыларның сыйфатлы туклануын оештыру мәсьәләләре буенча фикер алыштылар һәм республикада матди булмаган мәдәни мирас турындагы законга үзгәрешләр кертүне хупладылар.

Утырыш алдыннан депутатлар профильле министрлыклар һәм ведомстволар вәкилләре белән бергә азык-төлек һәм социаль туклану департаментының җитештерү цехларында һәм продукцияне саклау складларында булдылар. Предприятиенең генераль директоры, Дәүләт Советы депутаты Рима Мөхәммәтшина җитештерү куәтләре, сатып алына торган материалның сыйфатын контрольдә тоту системасы, тәэмин итүчеләр белән эшләү, техник модернизацияләү проектлары, шулай ук мәктәп коллективларында, балалар һәм аларның ата-аналары арасында сәламәт туклануны пропагандалау турында сөйләде. Аның сүзләренә караганда, җитештерү цехларының мәйданы 15 мең кв.метр тәшкил итә, складларда 14 көнлек продукция запасын саклау мөмкинлеге бар, предприятие көненә 300 мең кешене ашата, аена 226 тонна ярымфабрикат җитештерә.

Комитет утырышында «Татарстан Республикасында гомуми белем бирү оешмаларында укучыларны сыйфатлы кайнар тукландыруны оештыру эше турында» Дәүләт Советы Президиумы карарының үтәлеше турында мәгълүмат белән Татарстан Республикасы мәгариф һәм фән министры урынбасары Рамил Хәйруллин чыгыш ясады.

Быел 1 410 мәктәптә 483 меңнән артык бала белем ала, аларның 46,1 %ы - 1-4 сыйныф укучылары - бушлай кайнар туклану белән тәэмин ителә. Мәктәп ашханәләрен төзекләндерүгә һәм җиһазлар белән тәэмин итүгә ел саен республика бюджетыннан 1 миллиард сум акча бүлеп бирелә. 2021 елда 196, 2022 елда 167 гомуми белем бирү оешмасында эшләр башкарылган. Азык-төлек блокларын капиталь ремонтлау программасына 2023 елда 143 гомуми белем бирү оешмасы азык-төлек блогы кертелгән.

Мәгариф оешмасында яшәүче сәламәтлек мөмкинлеге чикләнгән  балалар көненә 5 тапкыр бушлай туклана, килеп йөрүчеләр - көненә 2 тапкыр. 18 яшькә кадәрге балалары булган гражданнарга мәктәптә туклану белән тәэмин итүгә субсидияләр бирелә, аның күләме 2022 елда көн саен 5-11 сыйныфларда бер укучыга 8,3 сум тәшкил иткән. Республиканың күпчелек районнарында сәламәтлек мөмкинлеге чикләнгән, инвалид балалар, махсус хәрби операциядә катнашучы гражданнарның гаиләләреннән һәм  РФ Кораллы Көчләренә мобилизация буенча хәрби хезмәткә чакырылган гражданнарның балалары, күп балалы, аз тәэмин ителгән һәм социаль куркыныч хәлдә булган гаиләләрдән балалар ташламалы туклану белән тәэмин ителә. Республиканың барлык гомуми белем бирү оешмаларында туклануны оештыру өлешендә мәктәпләрдә барлыкка килә торган мәсьәләләрне оператив хәл итү максатында ата-аналар контроле оештырылган.

Гомуми белем бирү оешмаларында укучыларны ашату балаларның төп азык-төлек матдәләренә һәм энергиягә физиологик ихтыяҗларын исәпкә алып төзелгән  меню нигезендә гамәлгә ашырыла.

Өстәмә мәгълүматны Татарстан Республикасы буенча Роспотребнадзор идарәсе җитәкчесе урынбасары Любовь Авдонина, Казанның азык-төлек һәм социаль туклану департаменты генераль директоры Рима Мөхәммәтшина, комитет каршындагы эксперт советы рәисе Роза Әхмәдиева бирде.

Мәсьәлә турында фикер алышуда комитет рәисе Айрат Зарипов, комитет рәисе урынбасары Людмила Рыбакова, депутатлар Рамил Төхвәтуллин, Ракил Зәйдуллин, Рауфәл Мөхәммәтҗанов, Нияз Гафиятуллин, Айдар Шәмсетдинов катнашты. Аларның азык-төлек блоглары өчен кадрлар белән проблемаларны хәл итү перспективалары, азык-төлек товарларын намуссыз тәэмин итүчеләргә йогынты ясау, мәктәпләрдә туклануны оештыру операторын конкурссыз билгеләү һәм башка сорауларына докладчылар тулы җаваплар бирде.

Мәсьәләне карау нәтиҗәләре буенча комитет тиешле карар кабул итте.

Утырышта шулай ук «Татарстан Республикасында матди булмаган мәдәни мирас турында» Татарстан Республикасы Законына үзгәрешләр кертү хакында» Татарстан Республикасы законы проекты каралды һәм агымдагы елның икенче кварталында комитет эше планы кабул ителде.