Бүген Татарстанга эш сәфәре кысаларында Дәүләт Думасының Гаилә, хатын-кызлар һәм балалар мәсьәләләре комитеты әгъзалары ТР Дәүләт Советының Социаль сәясәт комитеты белән берлектә Казанның социаль инфраструктура объектларында – «Игелекле Казан» коммерциячел булмаган оешмасында, «Ышаныч» балаларга һәм яшьләргә психологик-педагогик ярдәм үзәгендә, инклюзив ял үзәгендә һәм башка учреждениеләрдә булдылар.

РФ Дәүләт Думасының Гаилә, хатын-кызлар һәм балалар мәсьәләләре комитетының һәм профильле парламент комитетының социаль учреждениеләренә баруның эшлекле программасы киң булып чыкты.

Парламентарийлар караган беренче объект - «Игелекле Казан» коммерцияле булмаган оешмасы. Аның эшчәнлеге хәйрия учреждениеләрен берләштерү, сәламәтлек мөмкинлекләре чикләнгән кешеләр өчен, шулай ук авыр тормыш хәленә эләккәннәр өчен чаралар һәм проектлар оештыру белән бәйле.

«Игелекле Казан» коммерцияле булмаган автоном оешмасы базасында мөмкинлекләре чикле балалар белән эшләү өчен волонтерлар әзерләү курслары ачылган. Курс тыңлаучылары ишарәләр телен, «махсус» балалар белән аралашуның төрле методикаларын өйрәнәләр. 

Үзәк базасында шулай ук сәламәтлек мөмкинлекләре чикле кешеләргә ярдәм итүгә, адаптацияләүгә һәм үстерүгә юнәлдерелгән берничә проект эшли. Мәсәлән, оешмада аз хәрәкәтләнүче кешеләрне дәвалау, реабилитацияләү, ял итү һәм ял итү урыннарына йөртү өчен «социаль такси» проекты бар.

Аннары киңәшмәләр залында РФ Дәүләт Думасы депутаты Татьяна Ларионова инициативасы белән оештырылган "Табибларга рәхмәт!" дип аталган очрашу узды.  Парламентарийлар белән очрашуга махсус хәрби операция уздыру зонасыннан килгән һәм тыныч халыкка ярдәм күрсәткән медицина хезмәткәрләре чакырылган иде. Татьяна Ларионова медицина персоналының батырлыгы, фидакарь һәм медицина хезмәтен җайга салган өчен рәхмәт сүзләрен җиткерде. "Мин Лисичанскида булганда табибларның эшен күрдем. Мин табибларыбызның батырлыгына, игелегенә һәм патриотизмына сокландым, – дип ассызыклады депутат. – Һәр педиатрның кесәсендә кечкенә пациентларга бирү өчен берничә конфетка тиклем була иде.  Гомумән алганда, табиблар 13 меңгә якын баланы тикшергән, яртысыннан күбрәгендә патологиянең беренче тапкыр табылган.

Табиблар бригадасы җитәкчесе, Казанның 18 нче клиник үзәк хастаханәсенең отоларингология бүлеге мөдире Руслан Мөхәммәдиев көн саен педиатрлар, офтальмологлар, балалар кардиологлары, гинекологлар, хирурглар 100 дән 200 пациентны карадылар, дип сөйләде. «Эш хәвеф-хәтәр белән бәйләнгән иде, әмма без нәни пациентларның әти-әниләреннән яхшы сүзләр, шатлык яшьләре белән тулган күзләрен күреп рухландык, - дип сөйләде Руслан Мөхәммәдиев. - Беренче урында тайпылышлар арасында офтальмологик авырулар ачыкланды, икенчесендә - сөйләм бозу, психик үсешне тоткарлау, аутизм".

Россия парламентының түбән палатасы комитеты рәисе Нина Останина табибларга махсус хәрби операция зонасында эшләүче медицина хезмәткәрләре өчен социаль гарантияләр һәм ярдәм чаралары турында уйларга тәкъдим итте. "Без үз өстебезгә йөкләмәләрне алырга һәм Дәүләт Думасында табибларга ярдәм күрсәтү өчен Россия законнарын камилләштерү өлешендә тәкъдимнәрне яңгыратырга әзер. Сез кешеләрне яклау өчен профессиональ инструментлар кулланасыз, ә без сезне законнар дәрәҗәсендә якларга телибез ", - дип ассызыклады ул.

Ярдәм итү вариантларының берсе буларак ул табиблар торак сатып  һәм коммуналь хезмәтләр өчен түләүгә ташламалы шартлар бирү мөмкинлеген карарга тәкъдим итте.

Гаилә, хатын-кызлар һәм балалар мәсьәләләре буенча Дәүләт Думасы Комитеты исеменнән очрашу истәлеге итеп табибларга бүләк сертификатлары, чәчәкләр һәм “Табибларга рәхмәт!” дип язылган торт тапшырылды.

Очрашуда шулай ук ТР Дәүләт Советы депутатлары Светлана Захарова, Елена Кузьмичева, Айрат Зиатдинов, ТР сәламәтлек саклау министрының беренче урынбасары Альмир Абашев, ТР Министрлар Кабинетының ЗАГС идарәсе башлыгы Гөлшат Нигъмәтуллина, Казан шәһәре башкарма комитеты җитәкчесенең социаль мәсьәләләр буенча урынбасары Гүзәл Сәгыйтова, Казан шәһәре Башкарма комитетының социаль сәясәт идарәсе башлыгы Ирина Смирнова, “Игелекле Казан” коммерцияле булмаган автоном оешма директоры Татьяна Мерзлякова катнашты. 

Киләсе тукталыш «Ышаныч» балаларга һәм яшьләргә психологик-педагогик ярдәм үзәгендә булды. Ул 14-35 яшьлек үсмерләргә һәм яшьләргә бушлай хезмәт күрсәтә. Узган ел үзәк хезмәтләреннән 52 меңгә якын кеше файдаланган.

Себер тракты урамындагы "Барысы да балалар өчен" коммерцияле булмаган хәйрия оешмасы сәламәтлеге мөмкинлекләре чикләнгән балалар һәм яшүсмерләр өчен һәрьяклап ярдәм күрсәтә. Парламентарийларга үзәкнең балалар өчен "махсус" кием булдыру һәм тарату өстендә эшләвен сөйләделәр. Учреждениенең сәламәтлеге мөмкинлекләре чикләнгән һәм коворкинг булган балалар өчен кием тегү цехы бар. Кием-салымны профессионаллар гына текми, анар да тегәргә өйрәнә ала.

Мәйданы 437,9 кв.м. булган бина Казан шәһәренең Башкарма комитеты тарафыннан бирелгән. Бина файдалану түләүсез.

Бүген депутатлар шулай ук май ахырында Казанда ачылган "Ватанны саклаучылар" дәүләт фондының филиалында булдылар. Бинада социаль координаторлар һәм юридик ярдәм өчен кабинетлар, конференц-зал һәм башкалар бар. Фонд җитәкчесе Гүзәл Удачина депутатлар белән сөйләшүдә үзәк эшенең үзенчәлекләре турында сөйләде. "Төп категория - хәрби хәрәкәтләр ветераннары, махсус хәрби операция катнашучылары, аларның гаиләләре. Без ярдәм чаралары буенча шәхсиләштерелгән, адреслы озату алып барабыз, социаль координатор конкрет гаиләгә беркетелгән ", - дип билгеләде Гүзәл Удачина.

Татарстанда балаларның җәйге ялын ничек оештырылуын депутатлар «Восток» балаларны савыктыру лагере мисалында күрә алды. Алар балалар менюсыннан ризыкларны ашап карадылар, балалар белән аралаштылар. Балалар билгеләп үткәнчә, лагерьда ашау тәмле, ял программасы яхшы, шулай ук тагын бер футбол кырын төзекләндерү буенча теләк белдерделәр.

Социаль учреждениеләрдә булу программасы кысаларында парламентарийлар шулай ук «Юлдаш» яшьләр үзәгендә һәм Казан шәһәренең менталь хокук бозулар булган кешеләр өчен «Шәһәр округында халыкка социаль хезмәт күрсәтү комплекслы үзәге»ндә  булдылар.