Бүген Законлылык һәм хокук тәртибе комитеты утырышында парламентарийлар җәмәгать тәрбиячеләре турында республика законын гамәлгә ашыру мәсьәләләре турында фикер алыштылар, шулай ук гражданнар мөрәҗәгатьләре һәм түләүсез юридик ярдәм күрсәтү турында ТР законнарына үзгәрешләр кертүне күздә тоткан берничә республика закон проектын карадылар.

"Балигъ булмаганнарның җәмәгать тәрбиячеләре турында" ТР Законын гамәлгә ашыру чаралары турында мәгълүматны Балигъ булмаганнар эшләре һәм аларның хокукларын яклау буенча республика комиссиясенең җаваплы секретаре Илсөяр Гарифуллина тәкъдим итте. Ул билгеләп үткәнчә, комиссия эшләгән вакытта (2009 елдан башлап) Татарстанда җәмәгать тәрбиячеләренең депутатлар, республика һәм муниципалитетларның башкарма хакимият органнары, республика җәмәгатьчелеге белән нәтиҗәле хезмәттәшлек системасы барлыкка килде.

Законны гамәлгә ашыру кысаларында комиссия укыту семинарлары үткәрә, методик ярдәм күрсәтә, муниципаль комиссияләрдә законны гамәлгә ашыруга мониторинг ясый.

Муниципаль комиссияләр тарафыннан балигъ булмаганнарга 2076 җәмәгать тәрбиячесе беркетелгән, шул исәптән мәгариф, эчке эшләр, социаль яклау, яшьләр сәясәте, спорт, сәламәтлек саклау, мәдәният, хезмәт коллективлары һәм төрле дәрәҗәдәге депутатлар вәкилләре. Хәзерге вакытта җәмәгать тәрбиячеләре 2105 яшүсмергә беркетелгән.

Илсөяр Гарифуллина билгеләп үткәнчә, балигъ булмаганнар белән эшләүдә җәмәгать тәрбиячеләре шәхси үрнәк кулланалар, яшүсмерне иҗтимагый әһәмиятле эшчәнлеккә җәлеп итәләр. Муниципаль район башлыклары һәм депутатлар да яшүсмерләр язмышына битараф түгел.

2023 елның 9 аенда җәмәгать тәрбиячеләре булган балигъ булмаганнарның 75 проценты исәптән төшерелгән. Ел йомгаклары буенча бу сан 80-90 процентка җитәчәк. "Җәмәгать тәрбиячеләре яшь гражданнарны формалаштыру, аларны намуслы һәм җаваплы кешеләр итеп тәрбияләү өчен ныклы нигез булдыралар», - дип йомгаклады Балигъ булмаганнар эшләре һәм аларның хокукларын яклау буенча республика комиссиясенең җаваплы секретаре.

Фикер алышуда катнашкан депутатлар Александр Чубаров, Мансур Гарифуллин, Игорь Бикеев, Алсу Тарханова, Альберт Мөхәммәтшин һәм Валерий Власов муниципаль районнардагы мәктәптән тыш учреждениеләрдә "авыр" яшүсмерләр белән шөгыльләнү өчен бушлай түгәрәкләр булу, исәптән төшерү критерийлары, шулай ук җәмәгатьчелеккә методик ярдәм күрсәтү тәртибе белән кызыксындылар.

Законлылык һәм хокук тәртибе комитеты рәисе Шакир Яһудин, контроль мәсьәләне карап тикшерүгә йомгак ясап, республика һәм муниципаль комиссияләрнең, җәмәгать тәрбиячеләренең эшен югары бәяләде. "Һичшиксез, җәмәгать тәрбиячеләре турындагы закон тулысынча тормышка ашырыла. - диде ул. - Барлык катнашучылар белән координацияләү эшен дәвам итәргә, парламент һәм җирле үзидарә органнары депутатларын, җирле абруйлы кешеләрне, оешма һәм предприятие җитәкчеләрен актив җәлеп итәргә кирәк».

Бүген комитет утырышында гражданнарның мөрәҗәгатьләре һәм гражданнарга түләүсез юридик ярдәм күрсәтү турындагы республика законнарына үзгәрешләр кертү турындагы ике закон проекты да каралды.