Бүген Лениногорскида район Советының хисап сессиясе узды, анда 2023 елда башкарылган эшләргә йомгак ясалды һәм 2024 елга планнар турында фикер алыштылар. Утырыш эшендә Дәүләт Советы Рәисе Фәрит Мөхәммәтшин катнашты. Моннан тыш, эш сәфәре кысаларында парламент башлыгы Лениногорск политехник көллиятендә булды, анда производствода укыту осталары, педагоглар һәм укучылар белән аралашты, шулай ук WorldSkills халыкара стандартлары буенча җиһазландырылган яңа остаханәләрне карады.

Лениногорск политехник көллияте 70 елдан артык машина төзелеше, нефть үткәргечләрен һәм электр җиһазларын техник эксплуатацияләү, эретеп ябыштыру производствосы өлкәсендә эшче белгечләр, шулай ук аш-су осталары һәм кондитерлар әзерли. Хәзерге вакытта колледжда 650дән артык студент белем ала, ел саен 9 меңгә якын кеше квалификация күтәрү курсларын уза. "Технологияләр алга китте, һәм бүген республикабызның күптармаклы  икътисадының барлык юнәлешләре өчен квалификацияле кадрлар әзерләү төп мәсьәләгә әверелә", – дип билгеләп үтте Фәрит Мөхәммәтшин,

Район Советы утырышы алдыннан парламент башлыгы Лениногорск районы башлыгы Рәгать Хөсәенов озатуында җирле предприятиеләр, эшмәкәрләр һәм үзмәшгуль гражданнар, мәгариф учреждениеләре продукциясе күргәзмәсен карады.

Район Советының хисап сессиясендә 2023 елда районның социаль-икътисадый үсеше йомгаклары һәм 2024 елга бурычлар турында доклад белән Лениногорск районы башлыгы Рәгать Хөсәенов чыгыш ясады. Үз чыгышын ул махсус операциядә катнашучыларга ярдәм күрсәткән һәм бу изге эшне дәвам иткән лениногорскилыларга рәхмәт сүзләреннән башлады. "Узган ел сынаулар һәм чакырулар белән тулы иде, әмма алар безне берләштерде, – дип ассызыклады Рәгать Хөсәенов, – узган елның геройлары булып элеккечә безнең хәрбиләр кала, алар хәзер дә алгы сызыкта. Предприятиеләр, бизнес-берләшмә җитәкчеләре, битараф булмаган гражданнар катнашында мобилизацияләнгәннәргә, аларның гаилә әгъзаларына, ДХР һәм ЛХР халкына ярдәм итү буенча эш оештырыла. 125 тоннадан артык гуманитар йөк илтелгән.

Икътисади үсеш күрсәткечләренә килгәндә, район соңгы биш ел дәвамында республика рейтингында бишенче урында тора. "Ел саен тулаем төбәк продуктында тулаем эчке продуктның 3 процентын тәэмин итәбез, – дип билгеләп үтте район башлыгы, – шул ук вакытта икътисад структурасында сәнәгать җитештерүенә 64,5 процент туры килә. Төп предприятиеләр аякта нык торалар һәм барлык планлаштырылган проектларны гамәлгә ашыруны дәвам итәләр.

Россиянең нефть-газ секторы 2023 елда санкцияләр басымы астында булуга карамастан, Лениногорск нефтьчеләре узган елда 3 млн тоннадан артык нефть чыгарган.

Инвестицияләрнең гомуми күләме якынча 9 млрд сум тәшкил иткән. Лениногорск районы – әлеге күрсәткеч буенча республика районнары арасында лидерлар унлыгында. Нефть чыгару предприятиеләренең инвестиция проектлары шактый зур күләмдә тәэмин итә. "Өстенлекле бурыч - нефть чыгару өлкәсенә генә түгел, бәлки авыл хуҗалыгына, машина төзелешенә, туризмга да инвестицияләр җәлеп итү, – дип басым ясады Рәгать Хөсәенов.

Узган ел лениногорскилылар 60 мең тонна ашлык җыеп алганнар. Районда 5 эре һәм 16 фермер хуҗалыгы терлекчелек белән шөгыльләнә. Гомуми акчалата керемдә терлекчелек продукциясе өлеше 64% тәшкил итә. 2023 елда 3,9 мең тонна терлек һәм кош ите җитештерелгән, 13,5 мең тонна сөт савылган.

"Кызганычка каршы, 2023 елда Лениногорск кош фабрикасында кош гриппы таралу сәбәпле, кошларны тулысынча бетерергә туры килде –  250 мең баштан артык, якынча 60 млн сумлык  зыян килде, – дип сөйләде район башлыгы, – хәзерге вакытта предприятиене күркә үстерүне планлаштыручы яңа инвестор сатып алды. Проект буенча еллык җитештерү күләме 6,5 мең тонна ит тәшкил итә. Предприятиедә реконструкция һәм капиталь ремонт эшләре башланды"»

Мини-ферма төзү буенча республика программасы кысаларында 32 мини-ферма, җирле бюджет акчаларыннан 10 мини-ферма төзелгән.

Районда торак төзелеше актив алып барыла. Узган ел 56 фатирлы йорт, шулай ук 14 мең кв.метрдан артык шәхси торак файдалануга тапшырылган. Быел Тимеш авылында ятим балалар өчен 8 фатирлы өч йорт төзү планлаштырыла. Узган ел дәүләт һәм республика программаларын гамәлгә ашыру кысаларында, шулай ук нефтьчеләр ярдәме белән юллар яңартылган, күп фатирлы йортлар һәм ишегаллары ремонтланган, капиталь ремонттан соң медицина һәм социаль объектлар ачылган.

Районның актуаль проблемалары арасында Рәгать Хөсәенов икътисадның барлык тармакларында да күзәтелә торган кадрлар дефицитын билгеләде. Моннан тыш, инженерлык челтәрләре, җылылык һәм су белән тәэмин итү системалары реконструкция таләп итә, аларның тузганлыгы 80% тәшкил итә.

Район башлыгы шәһәрдә пассажирлар йөртү мәсьәләләренә аерым тукталды. "Шәһәр пассажирларын йөртү проблемасы соңгы 10 елда тәмам өлгереп җиткән иде, – дип билгеләп үтте Рәгать Хөсәенов, – Без республика транспорт министрлыгы белән берлектә әлеге проблеманы хәл итү юлларын эзләдек, республика җитәкчелегенә күп тапкырлар мөрәҗәгать иттек. Бу ел башында шәһәр транспорты өчен автобусларны тапшыру тантанасы булды".

"Традиция буенча ел башында республика министрлыклары һәм ведомстволары, муниципаль районнары дәрәҗәсендә узган елга йомгак ясала, – дип билгеләп үтте Фәрит Мөхәммәтшин, фикер алышуга йомгак ясап, – без бу утырышларда куела торган мәсьәләләргә игътибар белән карыйбыз». Гомумән, парламент башлыгы бәяләвенчә, санкцияләргә һәм объектив кыенлыкларга карамастан, Лениногорск районы 2023 елны уңышлы тәмамлап, республика икътисадына үз өлешен кертә алган. 2023 елның IV кварталы нәтиҗәләре буенча Лениногорск районы Татарстан Республикасының социаль-икътисадый үсеше рейтингында 20 нче урында тора.

Парламент башлыгы республиканың социаль-икътисадый үсеше нәтиҗәләренә җентекләп тукталды. 2023 ел нәтиҗәләре буенча тулаем төбәк продукты 4,1 трлн сум тәшкил иткән (РФ буенча 6 нчы урын), 289 млрд сумга авыл хуҗалыгы продукциясе җитештерелгән (РФда 5 нче урын), 3,4 млн. кв. м. чамасы торак файдалануга тапшырылган. Барлык федераль һәм республика программалары гамәлгә ашырылган: 4 меңнән артык объект төзелгән һәм ремонтланган.

Лениногорск районында федераль һәм республика программалары хисабына 486 млн.сумлык 38 объект төзелгән, капиталь ремонтланган һәм төзекләндерелгән. Инфраструктураны үстерүгә инвесторлар акчалары һәм «Татнефть» ААҖ грантлары белән 431 млн.сум акча тотылган. Фәрит Мөхәммәтшин нефтьчеләргә һәрьяклап һәм даими ярдәмнәре өчен рәхмәт белдерде.

Фәрит Мөхәммәтшин әйтүенчә, узган ел авыл хуҗалыгы җитештерүчеләре өчен җиңел булмаган. Шуңа да карамастан, республикада бөртеклеләр (3,6 млн тоннадан артык), бәрәңге һәм яшелчә (1,1 млн тонна), 2 млн. тоннага якын шикәр чөгендере  уңыш җыеп алынган. Терлекләрне кышлату өчен җитәрлек азык әзерләнгән.

Фәрит Мөхәммәтшин сүзләренә караганда, Лениногорск районы 2,29% сөрүлек җиренә ия булуга карамастан авыл хуҗалыгы җитештерүенең бик тыйнак күрсәткечләренә ия. "Гомумреспублика күләмендә сезнең акчалата керемнең чагыштырма өлеше нибары 0,86% тәшкил итә, 2023 елда агросәнәгать комплексының җыелма рейтингында Лениногорск районы 41 урында тора, – диде парламент башлыгы, – менә сезнең резервларыгыз. Бүген республикада шәхси хуҗалыкларга, авыл бизнесына, авыл хуҗалыгы кооперативларына ярдәм чаралары күп. Бирелгән мөмкинлекләрдән активрак файдаланырга кирәк"»

Фәрит Мөхәммәтшин сайлауларга аерым тукталды. Парламент башлыгы район Советы депутатларының һәм авыл җирлекләре башлыкларының игътибарын агымдагы елның мартында Россия Президентын һәм сентябрьдә Татарстан Дәүләт Советы депутатларын сайлауда катнашу буенча кешеләр белән аңлату эшен көчәйтү зарурлыгына юнәлтте. "Лениногорски сайлаучыларының сайлауларда актив булуын бик телим", - диде ул.

Дәүләт Советы Рәисе шулай ук район депутатларын республика парламентына закон чыгару инициативалары һәм тәкъдимнәр кертү буенча да активлыкны арттырырга чакырды.

"Лениногорск районы һәм Лениногорск шәһәре потенциалы шактый югары, әмма резервлар һәрвакыт бар, барлык өлкәләрдә дә хәлне шактый яхшырту өчен күбрәк эшләргә мөмкинлекләр бар, – дип билгеләп үтте Фәрит Мөхәммәтшин, журналистлар белән аралашканда сессия эшенә йомгак ясап, – әгәр район җитәкчелеге бүген каралган актуаль мәсьәләләрне тормышка ашыра алсалар, киләсе ел лениногорскилылар өчен тагын да уңышлырак булыр дип уйлыйм".