Дәүләт Советы депутатларының округларда эше дәвам итә. Бу атнада парламентарийлар республика ветераннарын һәм хатын-кызларын якынлашып килүче Халыкара хатын-кызлар көне белән котладылар, татар авыллары эшкуарларының бөтенроссия җыены һәм хатын-кызларның хезмәткә хокукларына һәм гарантияләренә багышланган профсоюз форумы эшендә катнаштылар.

 6 мартта Казанда "Сәйдәш" мәдәни үзәгендә «Ел хатын-кызы. Ел ир-аты: хатын-кыз карашы" шәһәр конкурсында җиңүчеләрне бүләкләделәр. 10 номинациядә 14 кеше җиңүче булды, алар арасында педагоглар, галимнәр, Россия геройларының әниләре, эшмәкәрләр, җитештерү хезмәткәрләре бар. Бәйгенең җиңүчеләрен һәм лауреатларын Дәүләт Советы Секретаре Лилия Маврина, республика Премьер-министры урынбасары Ләйлә Фазлыева, ТР Мәгариф һәм фән министры Илсур Һадиуллин, Казан мэры Илсур Метшин, Татарстанның халык артистлары Салават Фәтхетдинов һәм Рөстәм Абязов котладылар.

6 мартта Чаллы шәһәренең Ашыгыч медицина ярдәме хастаханәсендә учреждениенең  2023 елдагы эшенә йомгак ясадылар һәм алдагы чорга планнар билгеләделәр.  Утырыш эшендә Социаль сәясәт комитеты рәисе Светлана Захарова, республиканың сәламәтлек саклау министры Марсель Миңнуллин, автошәһәр мэры Наил Мәһдиев катнашты. Хастаханәнең баш табибы Марат Мөхәмәдиев учреждениенең бер еллык эшенең төп нәтиҗәләре турында сөйләде. Узган ел Ашыгыч медицина ярдәме хастаханәсе командасы «Уникаль очрак» номинациясендә «Ел табибы – Ак чәчәкләр» республика премиясе җиңүчесе булган. Моннан тыш, Ашыгыч медицина ярдәме хастаханәсендә ишемия инсультын дәвалауның яңа ысулы кертелгән. Наил Мәһдиев шәһәрнең социаль-икътисади үсеше нәтиҗәләрен тәкъдим итте һәм хастаханә коллективына халыкның тормышын һәм сәламәтлеген саклау өчен башкарган эшләре өчен рәхмәт белдерде.

6 мартта Мәгариф, мәдәният, фән һәм милли мәсьәләләр комитеты рәисе урынбасары Людмила Рыбакова Бөек Ватан сугышы ветераны, Ленинград камалышында яшәгән Зинаида Григорьевна Бушуеваны Халыкара хатын – кызлар көне белән котлады.

6 мартта Дәүләт Советы депутаты Раил Шәмсетдинов Халыкара хатын-кызлар көне алдыннан «Ак калфак» иҗтимагый оешмасының хатын-кызларын бәйрәм белән котлады. Хатын-кыз волонтерлар махсус хәрби операциянең башыннан алып хәрбиләргә мөмкин кадәр ярдәм күрсәтәләр, аерым алганда, дошман һөҗүмнәреннән сакларга ярдәм итүче маскировка челтәрләре үрәләр. Раил Шәмсетдинов иҗтимагый оешма активистларына игелекле эшләре өчен рәхмәт белдерде.

5 мартта Казанда XII Бөтенроссия татар авыллары эшкуарлары җыены узды, анда Россиянең 40 төбәгеннән, шул исәптән Татарстан Республикасыннан 800гә якын кече бизнес, фермер хуҗалыклары һәм хуҗалыклары вәкилләре чакырылган иде. Пленар утырыш эшендә ТР Дәүләт Советы Рәисе урынбасары Марат Әхмәтов катнашты.

5 мартта Казандагы «Ливадия Татарстан» профсоюз шифаханәсендә бөтен республикадан йөзләгән профсоюз лидерлары һәм активистлары хатын-кызларның хезмәткә хокукларына һәм гарантияләренә багышланган форумга җыелды. Форум эшендә Социаль сәясәт комитеты рәисе Светлана Захарова һәм Дәүләт Советы депутаты, ТР Профсоюзлар федерациясе рәисе Елена Кузьмичева катнашты. "Хатын - кызларның һөнәри, иҗади яктан үзләрен  табу мәсьәләләренә, аларның хезмәт хокукларын яклауга, шулай ук гаилә, ана һәм балачак институтына ярдәм итүгә профсоюзлар һәрвакыт өстенлекле игътибар бирде, - дип басым ясады  Елена Кузьмичева, утырышны ачып, – Бүгенге форум профсоюзларда хатын-кызлар хәрәкәте, хатын-кызларның социаль-хезмәт хокукларын яклауда дәүләт һәм профсоюзларның өстенлекле максатлары белән бәйле актуаль мәсьәләләр буенча фикер алышу мәйданчыгы булып тора".  Депутат шулай ук Татарстанда өч яклы диалогның нәтиҗәлелеген һәм профсоюзларның Татарстан Дәүләт Советы һәм Россия Дәүләт Думасы депутатлары белән әлеге юнәлештә конструктив хезмәттәшлеген ассызыклады.

5 мартта Экология, табигатьтән файдалану, агросәнәгать һәм азык-төлек сәясәте комитеты рәисе Азат Хамаев ТР Фермерлар, крестьян хуҗалыклары һәм авыл хуҗалыгы кулланучылар кооперативлары ассоциациясенең XXIV съезды эшендә катнашты. Узган ел шәхси хуҗалыклар һәм фермерлар тарафыннан 128 млрд сумнан күбрәк авыл хуҗалыгы продукциясе җитештерелгән.  2024 елда кече хуҗалык итү формаларына федераль программа белән алты юнәлештә,  республика программалары буенча тугыз юнәлештә 1,2 млрд сумлык турыдан-туры ярдәм каралган.

1 мартта депутат Руслан Нигъмәтуллин Чаллы шәһәрендә яшьләр сәясәте буенча башкарылган эшләрне йомгаклауда катнашты. «Шатлык» яшьләр үзәгендә  шәһәрнең яшьләр өлкәсе учреждениеләре 2023 елдагы эш нәтиҗәләрен тәкъдим иттеләр. Руслан Нигъмәтуллин активистларга, яшь армия отрядлары, кадет мәктәпләре, ветераннар һәм иҗтимагый оешмалар җитәкчеләренә «Патриотика» номинациясендә бүләкләр тапшырды. Үз чыгышында депутат күптән түгел Дәүләт Советы тарафыннан кабул ителгән «Патриотик тәрбия турында»гы Законны искә алып бу юнәлештә эшнең системалы алып баруның мөһимлеген билгеләп үтте.