Дәүләт Советы депутатларының округларда эше дәвам итә. Бу атнада парламентарийлар гражданнарны кабул иттеләр, мәктәпне тәмамлаучыларны котладылар, студентлар иҗаты фестивалендә, башка шәһәр һәм республика конкурсларында катнаштылар.

24 майда Дәүләт Советы Секретаре Лилия Маврина Казан шәһәре Совет районының 181 нче күп профильле мәктәбен тәмамлаучыларны котлады. Депутат аларга имтиханнар тапшырганда, югары уку йортларына кергәндә һәм алга таба укыганда уңышлар теләде. Шул ук көнне киләсе елларда бу мәктәпне тәмамлаучылар өчен язылган хат белән «киләчәк капсуласы»н салу тантанасы булды.

24 майда Идел буе спорт һәм туризм университетында «Студентлар язы» республика студентлар иҗаты фестиваленең гала-концерты булды. Республиканың 23 югары уку йортыннан 2000нән артык студентны берләштергән фестивальнең лауреатлары 9 иҗади юнәлеш буенча катнашучылар булды. Югары уку йортларының зур төркемнәре арасында гомуми зачетта Казан (Идел буе) федераль университеты, кече төркемнәр арасында Казан дәүләт мәдәният институты җиңү яулады. Җиңүчеләргә бүләкләрне Социаль сәясәт комитеты рәисе Светлана Захарова һәм Мәгариф, мәдәният, фән һәм милли мәсьәләләр комитеты рәисе урынбасары Людмила Рыбакова тапшырды.

24 майда «Бердәм Россия» партиясенең Лениногорск җирле бүлегенең җәмәгать кабул итү бүлмәсендә гражданнарны Дәүләт Советы депутаты Ринат Шәфигуллин кабул итте. Депутатка лениногорскилылар уку йортларының берсен ремонтлау мәсьәләсе белән мөрәҗәгать иттеләр, шулай ук шәхси характердагы мөрәҗәгатьләр дә булды. "Кешеләр катлаулы проблемалар белән килеп, аларны чишеп була торган урын барлыгын аңлыйлар. Без һәркемгә ярдәм итәргә тырышабыз», – диде Ринат Шәфигуллин.

23 майда Казанның 135 нче мәктәбендә «Мәгариф илкүләм проекты кысаларында шахмат зонасын ачу тантанасы булды. Чарада Дәүләт Советы депутаты Ольга Воронова катнашты. «Яшь шахматчыларга аларның турнирларда җиңүләре турында ишеттерәчәк көн җитүен телим! Яхшы уку өчен сезнең бөтен шартларыгыз бар», – дип башлангыч мәктәп укучыларына мөрәҗәгать итте Ольга Воронова.

23 майда Казан энергетика көллиятендә республиканың уку йортлары студентлары өчен «Вакыт лидеры» форумы узды. Чарада Дәүләт Советы депутаты Раил Шәмсетдинов катнашты. Форум кысаларында ул «шәхси бренд аша лидерлык сыйфатларын үстерү» темасына лекция укыды һәм катнашучыларга укытучы һәм республика парламенты депутатының һөнәри юлы турында сөйләде.

21 майда Дәүләт Советы депутаты Руслан Нигъмәтуллин Чаллыда гражданнарны кабул итте. Автоград халкы социаль проектларны гамәлгә ашыру һәм бизнеска ярдәм итүнең яңа чараларын кертү буенча үз идеяләрен тәкъдим итте.

20 майда Казан шәһәренең А.С. Пушкин исемендәге Мәдәният үзәгендә «Без уенчык ясадык» күргәзмәсе һәм «Рус халык уенчыгы» II Бөтенроссия конкурс-фестивале җиңүчеләрен бүләкләү тантанасы узды. Чарада катнашучыларны һәм кунакларны Мәгариф, мәдәният, фән һәм милли мәсьәләләр комитеты рәисе урынбасары Людмила Рыбакова сәламләде. Конкурска республиканың 24 муниципаль районыннан һәм шәһәреннән, шулай ук Россия Федерациясенең 13 төбәгеннән барлыгы 280дән артык эш килгән. Конкурс эшләренең авторлары – декоратив-кулланма сәнгать осталары, педагоглар, студентлар, мәктәп яшьтәге балалар һәм мәктәпкәчә яшьтәге балалар. Күргәзмәдә 140тан артык эш тәкъдим ителгән. Күргәзмә 22 июньгә кадәр дәвам итәчәк.

20 майда Чаллыда Дәүләт Советы депутаты Руслан Нигъмәтуллин  "Мин эшмәкәр!" конкурсында җиңүчеләргә бүләкләр тапшырды. Конкурс мәктәп укучылары арасында «Эшмәкәрлек лабораториясе» иҗтимагый проектында катнашучылар арасында узды, аның автордашы – Руслан Нигъмәтулин. Катнашучылар тәҗрибәле эшмәкәр остаз җитәкчелегендә ел дәвамында эшләнгән бизнес-проектларны тәкъдим иттеләр: автомобиль юу, үрелгән җиһазлар җитештерү, кием һәм аяк киеме дизайны, файдалы ризык белән вендинг аппаратлары, онлайн-укыту, арт-терапия һ. б. 77 нче гимназия укучысы Богдан Цибяков персонал яллау өчен актуаль сервис проекты белән җиңүче булды.