Бүген Казанда Татарстан Республикасы Рәисе Рөстәм Миңнеханов җитәкчелегендә Татарстаннан сайланган РФ сенаторлары һәм РФ Федераль Җыены Дәүләт Думасы депутатлары белән киңәшмә узды. Анда республика икътисадына федераль акчалар җәлеп итү мәсьәләләре буенча фикер алыштылар. Дәүләт Советы Рәисе Фәрит Мөхәммәтшин үткәргән киңәшмәдә республика Премьер-министры Алексей Песошин, профильле министрлыклар һәм ведомстволар җитәкчеләре катнашты. Республиканың муниципаль районнары башлыклары киңәшмәгә видеоэлемтә аша кушылды.
«2030 елга кадәрге чорга 19 илкүләм проект формалаштыру эше Федераль дәрәҗәдә төгәлләнә, - дип билгеләп үтте Рөстәм Миңнеханов, киңәшмәне ачып,- республиканың аларда катнашуын, документларны сыйфатлы әзерләүне һәм алынган йөкләмәләрне 100% ка үтәүне тәэмин итү мөһим». Рөстәм Миңнеханов әйтүенчә, республика икътисадына мөмкин кадәр күбрәк федераль акчаларны җәлеп итәргә кирәк. Ул депутатларга безнең министрлыклар белән берлектә Татарстанда инфраструктура проектларын гамәлгә ашыру мәсьәләләрен карарга кирәк дип белдерде. "Монда федераль коллегалар белән синхрон рәвштә эш алып барырга кирәк", - дип басым ясады Татарстан Республикасы Рәисе, киңәшмәдә катнашучыларга мөрәҗәгать итеп.
Рөстәм Миңнеханов республиканың социаль-икътисадый үсеше мәсьәләләренә аерым тукталды. Республика Рәисе ассызыклаганча, моңарчы күрелмәгән санкцияләр шартларында Татарстан икътисадта уңай динамиканы саклап кала алган. "Безнең бурыч-киләчәктә дә тотрыклы үсеш динамикасын тәэмин итү. Гражданнарыбызның тормыш сыйфаты турыдан-туры шуңа бәйле. Аерым алганда, икътисадка федераль акчаларны мөмкин кадәр күбрәк җәлеп итәргә кирәк, шул исәптән илкүләм проектларны гамәлгә ашыру кысаларында да», - дип билгеләде Рөстәм Миңнеханов.
Рөстәм Миңнеханов депутатларга махсус хәрби операциядә  катнашучыларга һәм аларның гаилә әгъзаларына ярдәмнәре өчен рәхмәт белдерде. "Татарстан Республикасының һәм илнең үсеше күбесенчә суверенитет, дәүләт иминлеге һәм аның тыныч киләчәге өчен көрәшүче хәрбиләрнең  гамәлләренә бәйле. Бу катлаулы чорда без гражданнарыбызның бердәмлеген һәм бердәмлеген күрәбез. Депутатларга махсус хәрби оперциядә катнашучылар белән эшләгән, хәрбиләрнең һәм аларның гаиләләренең хокукларын яклаган, махсус операциядә катнашучыларга ярдәм иткән, яңа территорияләрдә яшәүчеләргә гуманитар ярдәм күрсәткән өчен рәхмәт белдерәсем килә. Безнең егетләр мәсьәләләрен хәл итү өчен махсус хәрби операция зонасына сәфәрләрне дәвам итәргә кирәк», - дип белдерде Татарстан Рәисе.
Республика Рәисе депутатлар корпусының төп бурычларының берсе - халыкның көнүзәк проблемаларын хәл итү, дип өстәде. «Сезнең эшегездә кешеләр белән турыдан - туры элемтә мөһим: сайлаучылар белән очрашу, мөрәҗәгатьләр белән эшләү, гражданнарның иң борчыган мәсьәләләрен хәл итү», - дип өстәде Рөстәм Миңнеханов. Республика Рәисе шулай ук якшәмбе көнне җиденче чакырылыш Дәүләт Советына депутатлар сайлаулар булачагын искәртте. Ул барысын да тавыш бирүдә катнашырга өндәде, депутатларга - сайлау округларындагы актив эшчәнлекләре өчен, ә Фәрит Мөхәммәтшинга барлык дәрәҗәдәге парламентарийлар эшен координацияләгәннәре, гуманитар акцияләрне һәм социаль инициативаларны гамәлгә ашырганнары өчен рәхмәт белдерде.
Дәүләт Советы Рәисе Фәрит Мөхәммәтшин закон чыгару инициативаларын гамәлгә ашыру мәсьәләләренә тукталды. Гомумән алганда, алтынчы чакырылыш Дәүләт Советы эшләгән чорда депутатлар тарафыннан 21 закон чыгару инициативасы җибәрелгән, шуларның дүртесе Федераль закон буларак кабул ителгән.
Хәзерге вакытта Россия парламентының түбән палатасында Татарстаннан 3 закон чыгару инициативасы карала. Сүз аучылык кагыйдәләрен бозган өчен административ штрафларны арттыру, Интернетта субъектларның дәүләт символларына хөрмәт күрсәтми торган мәгълүмат керүне чикләү, җитештерү һәм куллану калдыклары турында закон проектлары турында бара. Кайбер тәкъдимнәр буенча Россия Закон чыгаручылар советында фикер алышу бара.
“ Ведомстволар белән тагын бер кат игътибар белән каравыгызны, перспективаларны бәяләвегезне, бәлки, аларны алга таба үстерү буенча тәкъдимнәр кертүегезне сорыйм", - дип мөрәҗәгать итте депутатларга Фәрит Мөхәммәтшин. Фәрит Мөхәммәтшин депутатларның игътибарын узган сайлау кампанияләре барышында гражданнарның наказларын контрольдә тоту зарурлыгына юнәлтте. Барлыгы 5457 наказ килгән. "Бюджетның тотрыклылыгы һәм баланслылыгы, социаль йөкләмәләрнең үтәлеше куелган бурычларны үтәүгә бәйле, - дип йомгаклады Фәрит Мөхәммәтшин. - Реаль секторга, кече һәм урта эшмәкәрлеккә, авыл хуҗалыгы җитештерүчеләренә ярдәм, халыкны, шул исәптән махсус хәрби операциядә  катнашучыларның гаиләләрен социаль яклау мәсьәләләре актуаль булып кала"»
Быелның беренче яртыеллыгында Татарстанның федераль дәүләт һәм максатчан программаларны гамәлгә ашыруда катнашуы турында ТР Премьер-министры урынбасары – икътисад министры Мидхәт Шаһиәхмәтов җентекләп сөйләде. Ул, аерым алганда, Татарстанның быел 27 дәүләт программасында, 13 илкүләм һәм 50 төбәк проектында катнашуын билгеләп үтте. Россия Федераль Җыенында Татарстан депутациясе белән очрашулар традициягә әйләнгән. Республикада 18 эшче төркем эшли, аларның һәрберсен куратор депутат җитәкли. Агымдагы елның августында төбәк сәясәте һәм җирле үзидарә юнәлеше буенча өстәмә эшче төркем төзелгән.
Эшче төркемнәр составына республика министрлыклары һәм ведомстволары вәкилләре керә. Татарстан Республикасы Рәисе Рөстәм Миңнеханов кушуы буенча эшче төркемнәргә Дәүләт Советы Рәисе Фәрит Мөхәммәтшин җитәкчелек итә.  
Эшче төркемнәр эшчәнлегенең төп юнәлешләре-илкүләм проектларда һәм дәүләт программаларында катнашу аша федераль акчаларны Татарстан икътисадына җәлеп итү, республиканың закон чыгару инициативаларын алга алып бару, гражданнарның наказларын тормышка ашыру.